ދުނިޔޭގެ ކުރިއެރުމާއި ތަރައްޤީ އާއި ސުލްޙައަށް މަސައްކަތްކުރުމުގައި އޮތް ހަމައެކަނި ޙައްލަކީ އދ: ޝާހިދު
އެކުވެރި ދައުލަތްތަކުގެ ޖަމިއްޔާ، އދ.އަށް އިސްލާޙީ ބަދަލުތަކެއް ގެންނަންޖެހޭކަމަށް ޤަބޫލުކުރައްވާކަމަށާއި އެހެންނަމަވެސް އދ.ގެ މުހިއްމުކަމާމެދު ބަހުސް ކުރެވޭނެ ޖާގައެއް އޮތްކަމަށް ދެކެވަޑައިނުގަންނަވާކަމަށް ފޮރިންގ މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
އދ.ގެ 75 ވަނަ ޢާއްމު ބައްދަލުވުމުގައި ވާހަކަފުޅުދައްކަވަމުން ރާއްޖޭގެ ފޮރިންގ މިނިސްޓަރ ޢަބްދުﷲ ޝާހިދު ވިދާޅުވީ އދ.އަކީ އަދިވެސް ދުނިޔޭގެ ކުރިއެރުމާއި ތަރައްޤީއާއި ސުލްޙައަށް މަސައްކަތްކުރުމުގައި އޮތް ހަމައެކަނި ޙައްލުކަމަށެވެ.
އދ.ގެ މުހިއްމުކަމުގެ މައްޗަށް އަލިއަޅުއްވާލައްވައި ވާހަކަފުޅުދައްކަވަމުން މިނިސްޓަރ ޝާހިދު ވިދާޅުވީ، ރާއްޖެ ފަދަ ކުޑަ ޖަޒީރާ ޤައުމުތަކަށް ބޮޑެތި ޤައުމުތަކާއި އެއްހަމައެއްގައި ވާހަކަދެއްކުމުގެ ބާރު ލިބިގެންދިޔައީ އދ.ގެ ސަބަބުންކަމަށެވެ. ދުނިޔޭގެ ހަމަޖެހުމާއި އިސްލާޙަށް މަސައްކަތްކުރުމަށް ހުރިހާ ފަރާތުންވެސް އދ.ގެ އުސޫލުތަކަށް އަލުން ތަބާވެ އެއަށް ޢަމަލުކުރުމަށްވެސް މިނިސްޓަރގެ ވާހަކަފުޅުގައި ވަނީ ދުނިޔޭގެ ޤައުމުތަކަށް ގޮވާލައްވާފައެވެ. އެގޮތުން އެންމެ އަސާސީ އިންސާނީ ޙައްގުތަކާއި އިންސާނީ ކަރާމާތާއި ޙައްގުތަށް ބޮޑެތި އަދި ކުދި ޤައުމުތަކުގައިވެސް ކަށަވަރުވާންޖެހޭކަމަށް މިނިސްޓަރ ޝާހިދު ވަނީ ވިދާޅުވެފައެވެ.
ފޮރިންގ މިނިސްޓަރ ވަނީ އަލުން އެކަތިގަނޑަކަށްވެ އެއްއަމާޒެއްގައި ހުރިހާ ޤައުމެއް ގުޅިގެން ތަރައްޤީއަށް މަސައްކަތްކުރުމަށް ގޮވާލައްވާފައެވެ. މިނިސްޓަރގެ ތަގުރީރުގައި ވަނީ ރާއްޖެއިން ރޮހިންގޔާއާއި ފަލަސްތީނުގައި އަނިޔާ ލިބެމުންދާ މުސްލިމުންގެ ދިފާޢުގައި މަސައްކަތް ކުރުމުގައި ރާއްޖެއިން ސާބިތުކަމާއެކު ދެމިއޮތްކަން ތަކުރާރު ކުރައްވާފައެވެ. އަދި މުޅި ދުނިޔެއަށް ކުރިމަތިވެފައިވާ ކޯވިޑް-19ގެ ޙާލަތުން އަރައިގަތުމަށް ޤައުމުތައް ގުޅިގެން މަސައްކަތްކުރުމުގެ މުހިއްމުކަމުގެ މައްޗަށްވެސް މިނިސްޓަރ ވަނީ ވާހަކަފުޅުދައްކަވާފައެވެ.
މީގެ 55 އަހަރުކުރިން ރާއްޖެއިން އދ.ގެ ޢާއްމު ބައްދަލުވުމުގައި ހާމަކުރި ވާހަކަތައް ތަކުރާރުކުރައްވަމުން މިނިސްޓަރ ވަނީ ރާއްޖެއަކީ ކުޑަ އަދި އާބާދީ މަދު ޤައުމެއް ނަމަވެސް ރާއްޖެއިން އަދާކުރަންޖެހޭ ކަންކަން ދުނިޔޭގެ ފެންވަރުގައި އަބަދުވެސް ކުރައްވަމުން ގެންދަވާނެކަމުގެ ޔަގީންކަން އަރުވާފައެވެ. އަދި ރާއްޖޭގެ ރައިސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ސުލްޙަ އާއި އަމާންކަން ކަށަވަރުކުރެއްވުމަށް ކުރައްވަމުންގެންދަވާ މަސައްކަތްތައް އދގެ އާއްމު މަޖިލީހުގައި މިނިސްޓަރ ޝާހިދު ވަނީ ފާހަގަކުރައްވާފައެވެ. މީގެ އިތުރުން މިތަޤުރީރުގައި ރާއްޖެއާއި ރާއްޖެ ފަދަ ކުދި ޖަޒީރާ ޤައުމުތަކަށް ކުރިމަތިވަމުން އަންނަ ބޮޑެތި ދަތިތަކަށް މިނިސްޓަރ ޝާހިދު ވަނީ އަލިއަޅުއްވާލައްވާފައެވެ. އެގޮތުން މޫސުމީ ބަދަލުތަކާއި ޕްލާސްޓިކްގެ ނުރައްކަލާއި ގުޅޭގޮތުން މިނިސްޓަރ ވަނީ ވާހަކަފުޅު ދައްކަވާފައެވެ.
މިއަހަރު އދ.އަށް 75 އަހަރު ފުރޭއިރު ރާއްޖެ އދ.ގެ މެމްބަރު ޤައުމަކަށް ވިތާ 55 އަހަރު ފުރުނީވެސް މިއަހަރުގައެވެ. އެޖަމިއްޔާގެ މެމްބަރަކަށްވުމަށްފަހު ރާއްޖެއިން އަންނަނީ ދުނިޔޭގެ ބޮޑެތި ޤައުމުތަކާއި އެއްހަމައެއްގައި އިންސާނީ ޙައްގުތައް ކަށަވަރުކުރުމަށް އދ.ގައި ވަކާލާތުކޮށް މަސައްކަތްކުރަމުންނެވެ.