އިންޑިޔާ ކަނޑުގެ ސަލާމަތީ ކަންކަން ހަރުދަނާ ކުރުމަށާއި ހަނގުރާމަވެރި ޖަމާއަތްތަކާއި ދެކޮޅަށް މަސައްކަތް ކުރުމަށް އިންޑިޔާ އާ ސްރީލަންކާ އިން އެއްބަސްވެއްޖެއެވެ.މި އެއްބަސްވުން އެކުލަވާލާފައިވަނީ މިހާރު އިންޑިޔާއަށް ރަސްމީ ދަތުރުފުޅެއް ކުރައްވަމުންގެންދަވާ، ސްރީލަންކާގެ ބޮޑުވަޒީރު ރަނިލް ވިކްރަމަސިންގްހަ އިންޑިޔާގެ ބޮޑުވަޒީރު ނަރެންދްރަ މޯދީ އާއެކު ބޭއްވި ބައްދަލުވުމެއްގައެވެ.މި ބައްދަލުވުން ނިންމަވާލެއްވުމަށްފަހު، ނޫސްވެރިންނާއި ބައްދަލުކުރައްވާ، މޯދީ ވިދާޅުވީ އިންޑިޔާ ކަނޑުގެ ސަރަހައްދުގައި ޓެރަރިޒަމްގެ އަމަލުތައް ހުއްޓުވުމަކީ ދެ ޤައުމުން އެންމެ ބޮޑަށް އިސްކަންދޭ ކަން ކަމަށެވެ. އަދި، އިންޑިޔާއިން ލަންކާއަށް ދެމުންދާ އަސްކަރީ އެއްބާރުލުމާއި ތަމްރީނުގެ ފުރުސަތުތައް ކުރިއަށްވުރެ ފުޅާ ދާއިރާއެއްގައި ދިނުމަށްވެސް ތައްޔާރުކަމަށް އޭނާ ވިދާޅުވިއެވެ.މި ބައްދަލުވުމުގައި ސިއްހީ ދާއިރާއާ ސާކް ސެޓެލައިޓާއި ބެހޭ ގޮތުން މަޝްވަރާތައް ކުރިއަށް ދިޔަ ކަމަށްވެސް މީޑިޔާ ރިޕޯޓުތައް ބުނެއެވެ.މި ދަތުރުގައި ދެ ޤައުމުން ވަނީ ހަތަރު އެއްބަސްވުމެއްގައި ސޮއި ކޮށްފައެވެ.މީގެ ތެރޭގައި ލަންކާގެ ވަވުނިޔާގައި ހުންނަ ޑިސްޓްރިކްޓް ހޮސްޕިޓަލަށް އިންޑިޔާ އިން ސިއްހީ ސާމާނު ފޯރުކޮށްދިނުމުގެ އެއްބަސްވުމަކާއި، ލަންކާގައި އިމަޖެންސީ އެމްބިއުލާންސް ސިސްޓަމެއް ޤާއިމްކުރުމުގެ އެއްބަސްވުމެއްވެސް ހިމެނެއެވެ.މިއީ، މިދިޔަ މަހު މަގާމާއި ހަވާލުވެވަޑައިގެންނެވިފަހުން ރަނިލް ވިކްރަމަސިންގްހަ ކުރައްވާ ފުރަތަމަ ރަސްމީ ދަތުރުފުޅެވެ.