އަންނަ އަހަރު ގުރޭޑު އެކަކަށް ވަދެވޭނީ 2021 ވަނަ އަހަރުގެ ޑިސެމްބަރު މަހުގެ ނިޔަލަށް 7 އަހަރު ފުރިފައިތިބޭނެ ކުދިންނަށްކަމަށް މިނިސްޓްރީ އޮފް އެޑިއުކޭޝަނުން ވިދާޅުވެއްޖެއެވެ.
މިނިސްޓްރީ އޮފް އެޑިއުކޭޝަނުން ޢާއްމުކޮށްފައިވާ ކުދިން ސްކޫލަށް ވެއްދުމާއި އެއް ސްކޫލުން އަނެއް ސްކޫލަށް ކުދިން ބަދަލުކުރުމުގެ އުސޫލަށް ބަދަލުގެނެސްފައި މިވަނީ އަންނަ އަހަރުގެ ދިރާސީ އައު އަހަރުގެ ކިޔެވުން އޯގަސްޓް މަހު ފެށުމަށް ނިންމުމާއި ގުޅިގެންނެވެ.
މިއުސޫލުގައިވާ ގޮތުން ކުރިއަށް އޮތް އަހަރު ގުރޭޑު އެކަކަށް ވަދެވޭނީ އަންނަ އަހަރުގެ ޑިސެމްބަރު މަހުގެ 31 ވަނަ ދުވަހަށް ޢުމުރުން 7 އަހަރުވެފައިވާ ކުދިންނަށެވެ. އަދި 2022 ވަނަ އަހަރުގެ މާޗުމަހުގެ ނިޔަލަށް އުމުރުން 7 އަހަރު ފުރޭނެ ކުދިންގެ ބެލިވެރިންނަށް އެކުދިން ގުރޭޑު އެކަކަށް ވެއްދުމުގެ އިޚްތިޔާރު އޮންނާނެކަމަށް އެޑިއުކޭޝަން މިނިސްޓްރީން ވިދާޅުވެއެވެ. އެހެންނަމަވެސް މިގޮތަށް ސްކޫލަށް ވަންނަ ކުދިންނަށް ޚާއްސަ ޕްރޮގްރާމެއް އެކުއްޖަކު ވަންނަ ސްކޫލަކުން ރާވަންޖެހޭނެކަމަށް މިނިސްޓްރީގެ އުސޫލުގައިވަނީ ބަޔާންކޮށްފައެވެ.
މިއުސޫލުގައި ވާގޮތުން ސަރުކާރު ސްކޫލެއްގެ ގުރޭޑު އެކަކަށް ކުއްޖަކަށްވަދެވެ ވޭނީ ފާއިތުވި 2 އަހަރު ޕްރީސްކޫލް ނުވަތަ ޅަފަތުގެ ތަޢުލީމާއި ތަރުބިއްޔަތުގެ ޕްރޮގްރާމެއްގައި ބައިވެރިވެފައިވާ އަދި ނިމިގެންދިޔަ އަހަރުގެ ޔޫކޭޖީ މަރުޙަލާ ނިންމާފައިވާ ނުވަތަ އެފެންވަރު ހުރި ކުދިންކަމަށެވެ. އަންނަ އަހަރު އެލްކޭޖީއަށް ވަދެވޭނީ އޯގަސްޓް މަހުގެ އެއްވަނަ ދުވަހާއި ހަމައަށް 4 އަހަރު ފުރި އަދި 5 އަހަރު ނުފުރޭ ކުދިންނަށް ކަމަށް މިއުސޫލުގައި ވަނީ ބަޔާންކޮށްފައެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އެޑިއުކޭޝަން މިނިސްޓްރީގެ މީޑިއާ ހެޑް އަޙްމަދު މުޖާހިދު ވިދަޅުވީ ސްކޫލަށް ކުދިން ވެއްދުމާއި އެއްސްކޫލުން އަނެއް ސްކޫލަށް ބަދަލުކުރުމުގެ އުސޫލަށް މާބޮޑު ބަދަލެއް އައިސްފައި ނުވަކަމަށެވެ.
މިއުސޫލުގެ ދަށުން ބަދަލު ގެނެވިފައިވަނީ ހަމައެކަނި އަންނަ ދިރާސީ އާ އަހަރުގެ ކިޔެވުން ފެށޭ ތާރީޚަށް ގެނެވުނު ބަދަލާއެކު ތާރީޚުތަކަށް ގެނެވުނު ބަދަލާއި ގުޅިގެން ކަމަށް އެޑިޔުކޭޝަން މިނިސްޓްރީން ވިދާޅުވެއެވެ. އަދި އަލަށް ގެނެވުނު ބަދަލު ސްކޫލަތަކަށް އެނގޭނެކަމަށް މިނިސްޓްރީން ވިދާޅުވެއެވެ. އަދި މިހާރު ގެނެވުނު ބަދަލާ ގުޅިގެންވެސް ކުދިން ސްކޫލްތަކަށް ވެއްދުމުގައި ޑިމާންޑަށް ބޮޑު ބަދަލެއް އަންނާނެކަމަށް ޤަބޫލުނުކުރެވޭކަމަށް އެޑިއުކޭޝަނުން ވިދާޅުވެއެވެ.
ދިރާސީ އާއަހަރު ފެށުން އަންނަ އަހަރުގެ މެދުތެރެއަށް ބަދަލުކުރަން އެޑިއުކޭޝަން މިނިސްޓްރީން ނިންމާފައިވަނީ ކޯވިޑް-19އާއި ގުޅިގެންކަމަށް މީގެކުރިން އެމިނިސްޓްރީން ވަނީ ވިދާޅުވެފައެވެ. އަދި މިބަދަލު ދާއިމީ ބަދަލެއްގެ ގޮތުގައި ގެންނަ ބަދަލެއްގެ ގޮތުގައި ކަނޑަނާޅާކަމަށްވެސް އެމިނިސްޓްރީން ވިދާޅުވެއެވެ.
މޮޔަ
އަންނަ އަހަރު ޑިސެމްބަރ ގަ 7 އަހަރެެއް ނުވާނެ އަންނަ އަހަރުގެ އޯގަސްޓަކަށް. ޢެކަމަކު އަންނަ އަހަރު ޑިސެމްބަރ އަށް 7 އަހަރު ވާނެ ކުދިން އޯގަސްޓުގަ ސުކޫލަށް ވެއްދޭނެ.. އިބާރާތް ހަމަ ޖައްސަ ބަލަ