ހުޅުމާލޭގައި ކުރިއަށްގެންދާ ކޮމިއުނިޓީ އަރބަން ފާމިން ޕްރޮގްރާމްގައި ބައިވެރިވުމުގެ މުއްދަތު އިތުރުކޮށްފިއެވެ. ފާމިން ޕްރޮގްރާމްގައި ބައިވެރިވުމުގެ ފުރުސަތު މިމަހުގެ 5 ވަނަ ދުވަހާއި ހަމައަށް އެޗްޑީސީންވަނީ އިތުރުކޮށްފައެވެ.
ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ވިދާޅުވީ މުއްދަތު އިތުރުކުރުމަށް ނިންމީ މިޕްރޮގްރާމްގައި ފުރަތަމަ ހުޅުވާލި ފުރުސަތުގައި ފޯމު ހުށައަޅާފައިވާ ފަރާތްތަކުގެ ފޯމުތަކުގެ ތެރެއިން މައްސަލަ ހުރި ފޯމުތައް އިސްލާޙުކޮށް އަލުން ހުށައެޅުމުގެ ފުރުސަތު ދިނުމަށް ކަމަށެވެ. މީގެ އިތުރުން ޕްރޮގްރާމުގައި ބައިވެރިވުމަށް ގިނަބަޔަކު ޝައުގުވެރިކަންފާޅުކުރަމުން އަންނާތީ ވީހާވެސް ގިނަބަޔަކަށް ފުރުސަތު ފަހިކޮށް ދިނުމުގެ ގޮތުން މުއްދަތު އިތުރުކުރީ ކަމުގައިވެސް އެޗްޑީސީން ވަނީ ވިދާޅުވެފައެވެ.
ކޮމިއުނިޓީ އަރބަން ފާމިން ޕްރޮގްރާމްގައި ބައިވެރިވެވޭނީ 3 މީހުންގެ ގުރޫޕު ހަދައިގެންކަމަށް އެޗްޑީސީން ވިދާޅުވެއެވެ. އެގޮތުން ހޮވޭ ގުރޫޕުތަކަށް 600 އަކަފޫޓުގެ 16 ޕްލޮޓް ދޫކުރުމަށް ހަމަޖެހިފައިވާކަމަށް އެކޯޕަރޭޝަނުން ވިދާޅުވެއެވެ.
މިޕްރޮގްރާމަށް ކުރިމަތިލެވޭނީ ހުޅުމާލޭގައި ދިރިއުޅޭ ޢުމުރުން 18 އަހަރުން މަތީގެ މީހުންނަށެވެ.
ހުޅުމާލޭ ނެއިބަރހޫޑް-3 ކައިރީގައި ކުރިއަށްގެންދިޔުމަށް ހަމަޖެހިފައިވާ މިޕްރޮގްރާމް ކުރިއަށްގެންދަނީ ތިން ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހީގެ ތިންމަހުގައި ފީއެއް ނުނެގިނަމަވެސް ދެވަނަ ފިޔަވަހީގައި ހަތަރުވަނަ މަހުން ފެށިގެން ކޮންމެ ޕްލޮޓަކުން ކޮންމެ މަހަކު 1275 ރުފިޔާގެ ފީއެއް ނަގާނެއެވެ. އަދި ތިންވަނަ ފިޔަވަހީގެ ގޮތުގައި ކަނޑައަޅާފައިވާ ހަތްވަނަ މަހުން ފެށިގެން ކޮންމެ މަހަކު ޕްލޮޓަކަށް 2500 ރުފިޔާގެ ފީއެއް ދައްކަންޖެހެއެވެ.
އެޗްސީޑީން ވިދާޅުވީ ފުރަތަމަ ހަމަ ސްދުވަހަށް ބަހާލައިގެން 25 ކިލޯގެ 25 ބަސްތާ ގަސްކާނާ ކޮންމެ ޕްލޮޓަކަށް ދިނުމާއި، 3 މަހު ފެނާއި ކަރަންޓުގެ ޚަރަދަށް ހޭދަކުރުމަށް 500ރުފިޔާގެ އެލަވަންސެއްވެސް ދޭނެކަމަށެވެ.
"ކޮމިއުނިޓީ އަރބަން ފަރމިންގ" ޕްރޮޖެކްޓަކީ އެޗްޑީސީއާއި ޔޫއެންޑީޕީ އާއި އެގްރިކަލްޗަރ މިނިސްޓްރީ އަދި އިކޮނޮމިކް މިނިސްޓްރީ ގުޅިގެން ކުރިއަށްގެންދާ މަސައްކަތެކެވެ. މި ޕްރޮގްރާމްގެ އެންމެ ބޮޑު މަޤުސަދަކީ ރަށުގައި ތިބެގެން މަންފާ ހޯދޭނެ މަގު ފަހިކޮށްދިނުމެވެ.