މާދަމާ އޮންނަ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ އެންމެފަހުގެ ޚަބަރާއި މަޢުލޫމާތު ޕީއެސްއެމްނިއުސްއިން ގެނެސްދޭނެއެވެ.
މިކަމަށް ޚާއްސަ ވެބް ޕޭޖް މެދުވެރިކޮށް އިންތިޚާބުގެ ހުރިހާ މަޢުލޫމާތެއް ލިބިވަޑައިގަންނަވާނެވެ. އިންތިޚާބުގައި ވާދަކުރައްވާ ކެނޑިޑޭޓުންނާއި އެފަރާތްތަކުން ކުރިމަތިލާ ޕާޓީޓަކާއި އަމިއްލަ ކެނޑިޑޭޓުންގެ މަޢުލޫމާތުގެ އިތުރުން އިންތިޚާބީ ދާއިރާތަކުގެ މަޢުލޫމާތު މިޕޭޖުން ލިބިވަޑައިގަންނަވާނެއެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2020ގެ ޚަބަރާއި މަޢުލޫމާތު ގެނެސްދިނުމަށް މުޅި ނިއުސްޓީމު އިންތިޚާބުގެ ވަގުތުން ފެށިގެން ނަތީޖާ ޢިއުލާންކުރުމާހަމައަށް މަސައްކަތްކުރަމުންގެންދާނެއެވެ. މާލޭގެ އެކި ސަރަޙައްދުގައި ނިއުސްޓީމުގެ އިތުރުން ރާއްޖޭގެ އެކި ރަށްރަށުގައި ޕީއެސްއެމްގެ ޓީމުން ޙަރަކާތްތެރިވާނެއެވެ. އެހެންކަމުން މިއިންތިޚާބުގެ އެންމެ ފުރިހަމަ ނަތީޖާ އެންމެ ފުރަތަމަ ގެނެސްދިނުމަށް ނިއުސްޓީމުން މަސައްކަތްކުރާނެއެވެ. އަދި ވޯޓު ފޮށިތައް ކައިރީގައި ޙަރަކާތްތެރިވަމުންދާ ނޫސްވެރިން މެދުވެރިކޮށް އެސަރަޙައްދުތަކުގައި ވޯޓުލުމުގެ ކަންކަން ކުރިއަށް ދާ ގޮތުގެ އެންމެ ފުރިހަމަ މަންޒަރު ޕީއެސްއެމްގެ އިންތިޚާބު ކޮންޓިނިއުޓީ ޝޯ މެދުވެރިކޮށް އެންމެ ފަހުގެ ނަތީޖާ ޢިއުލާންކުރުމާހަމައަށް ގެނެސްދެމުން ގެންދާނެއެވެ.
އިންތިޚާބުގެ ވޯޓުލުން ފެށުމަށް ހަމަޖެހިފައިވަނީ މާދަމާ ހެނދުނު 7 ޖަހާއިރުގައެވެ. ވޯޓު ފޮށި ބަންދުކުރުމަށް ހަމަޖެހިފައިވަނީ ހަވީރު 5 ޖަހާއިރެވެ. އޭގެފަހުން 5 ފެށިގެން 6 ޖެހުމާ ހަމައަށް ކޯވިޑް-19އަށް ޕޮޒިޓިވްވެފައިވާ މީހުން ވޯޓުލުމަށްވަނީ ހަމަޖެހިފައެވެ.