އިއްޔެ ބޭއްވި ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ވޯޓުލުމުގެ ޙައްގު ލިބިފައިވާ މީހުންގެ ތެެރެއިން ވޯޓުލާފައިވަނީ 67 އިންސައްތަ މީހުންކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
ޕީއެސްއެމް ނިއުސްއަށް މައުލޫމާތު ދެއްވަމުން އިލެކްޝަންސް ކޮމިޝަނުގެ ރައީސް އަޙްމަދު ޝަރީފް ވިދާޅުވީ ޙާލަތު ހުރިގޮތުން މިފަހަރުގެ އިންތިޚާބުގައި ވޯޓުލުމަށް ނިކުންނާނެކަމަށް ލަފާކުރި އަދަދަށްވުރެ އިތުރަށް މީހުން ވޯޓުލާން ނިކުމެފައިވާކަމަށެވެ. އެގޮތުން ކޯވިޑާއި ގުޅިގެން އިލެކްޝަންސްއިން އަންދާޒާކޮށްފައިވަނީ ވޯޓުލުމަށް ނުކުންނާނީ ޙައްގުލިބިފައިވާ މީހުންގެ ތެރެއިން 45 އިންސައްތައާއި 50 އިންސައްތައާއި ދެމެދުގެ ޢަދަދެއްކަމަށް ޝަރީފް ވިދާޅުވިއެވެ. އެހެންނަމަވެސް ވޯޓުލުމުގެ ހައްޤު ލިބިފައިވާ 273128 މީހުންގެ ތެރެއިން މުޅި ރާއްޖެއިން 67 އިންސައްތަ ވޯޓުލާން ނުކުމެފައިވާކަމަށް ޝަރީފް ވިދާޅުވިއެވެ. އަދި އޭގެތެރެއިން 22 އިންސައްތައަކީ މާލެއިން ވޯޓުލުމަށް ނިކުތް މީހުންކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ މުޅި އިންތިޚާބުގެ ކަންކަން ކުރިއަށްގެންދިޔަ ގޮތާއިމެދު ހިތްހަމަޖެހޭކަމަށެވެ. އެގޮތުން ތިންތިޚާބުގެ ނަތީޖާއަށް އަސަރުކުރާވަރުގެ ޝަކުވާއެއްވެސް އިންތިޚާބުގެ ތެރޭގައި ހުށައެޅިފައިނުވާކަން ޝަރީފް ފާހަގަކުރެއްވިއެވެ. އެހެންނަމަވެސް ބަލިމަޑުކަމެއްގެ ތެރޭގައި ފިޔަވަޅުތަކެއް އަޅައިގެން އިންތިޚާބެއް ބާއްވަން ޖެހުމުން ދަތިތަކެއް ކުރިމަތިވިކަމަށް އިލެކްޝަންސްއިން ވިދާޅުވެއެވެ.
ރާއްޖޭގައި އިއްޔެ ބޭއްވި ލޯކަލް ކައުންސިލްތަކުގެ އިންތިޚާބު އަމާންކަމާއި، އޮމާންކަމާއެކު ނިންމާލާފައިވާއިރު، މިއީ މިދިޔަ އަހަރު ބާއްވަން އޮތް އިންތިޚާބެކެވެ. ނަމަވެސް ކޯވިޑާއި ގުޅިގެން އިންތިޚާބު ފަސްކުރުމަށް ނިންމައި، އެކަމަށް ޚާއްސަ ޤާނޫނެއްވެސް ފާސްކުރިއެވެ.