ރަމަޟާންމަހުގެ ފުރަތަމަ ދުވަހާއި އޭގެ ކުރީދުވަހުން ފެށިގެން، ވެމްކޯގެ ކުނި ނެގުމުގެ އުސޫލަށް ނުފެތޭގޮތަށް މާލޭގެ މަގުތަކަށް ގިނަ ޢަދަދެއްގެ ކުނި އަޅަމުން އަންނާތީ އެކަން އެގޮތަށް ނުކުރުމަށް ވެމްކޯއިން އިލްތިމާސްކުރައްވައިފިއެވެ.
ވެމްކޯއިން ނެރުނު ނޫސްބަޔާނެއްގައި ވިދާޅުވެފައިވަނީ މަގުތަކުގައި ކުނި ގިނަވުމުގެ ޝަކުވާ ޢާއްމުންގެ ފަރާތުން ލިބެމުން އަންނަކަމަށެވެ. މިކަމާ ގުޅިގެން ވެމްކޯއިން ބެލިބެލުމުން މިއީ ވެމްކޯގެ ކުނި ނެގުމުގެ އުސޫލަށް ނުފެތޭގޮތަށް ނެރެފައި ހުރި ބަރު އަދި ބޮޑެތި ކުނިކަން އެކުންފުނިން ފާހަގަކުރައްވަވެ.
އަދި ރަޖިސްޓަރ ނުކޮށް ވެމްކޯގެ ޚިދުމަތުގެ ނާޖާއިޒް ފައިދާ ބައެއް މީހުން ނަގަމުން އަންނާތީ ވެމްކޯއިން ވަނީ ކަންބޮޑުވުން ފާޅުކޮށް އެގޮތަށް ޢަމަލުކުރަމުންދާ ގޭބިސީތަކުގެ ޢަމަލުތައް ކުށްވެރިކުރައްވާފައެވެ.
ކޯވިޑް-19އާއި ގުޅިގެން ވެމްކޯއިން މާލެ ސަރަޙައްދުގެ ގޭބިސީތަކުން ކުނިނެގުމުގައި ޢަމަލުކުރަމުން އަންނަނީ އެގޭބިސީއެއްގެ ކުނި ޢިމާރާތުގެ ތިރީ ފަންގިފިލާއިން ކުނި ނަގާގޮތަށެވެ. މީގެ ސަބަބުން ރަޖިސްޓަރ ނުކުރާ ފަރާތްތަކުންވެސް މަގުތަކަށް ކުނި ނެރެފައި ބަހައްޓާކަން ވެމްކޯއިން ފާހަގަކުރެއެވެ.
ރަމަޟާންމަހަކީ އަޅުކަމުގެ މައްސަރަކަށްވެފައި މިދުވަސްވަރު ވެމްކޯގެ މުވައްޒަފުންނަށްވެސް އަދި ޢާއްމުނަށްވެސް ލުއިފަސޭވާނެފަދަ އުސޫލަކުން ކުނިނެގުމުގެ ކަންކަން ވެމްކޯއިންވަނީ ހަމަޖައްސަވާފައެވެ. އެގޮތުން ކުނި ބޭރަށް ނެރުމަށް ވެމްކޯއިންވަނީ ރޭގަނޑު 22:00އިން 23:00އަށް ކަނޑައަޅުއްވާފައެވެ. އެހެންކަމުން މިގަޑިތަކުގައި ކުނި ބޭރަށް ނެރުމަށް ސަމާލުވުމަށް ވެމްކޯއިން އިލްތިމާސްކުރައްވައެވެ.
ރަމަޟާންމަހަކީ ޢާއްމުކޮށްވެސް ކުނި އިތުރުވާ މައްސަރަކަށްވާތީ މިމަހުގައި މަގުތަކުގައި ކުނި ގިނަނުވާނޭހެން ވެމްކޯއިން އަންނަނީ މަސައްކަތްކުރައްވަމުންނެވެ. މަގުތައް ސާފުކޮށް ބޭއްވުމުގައި ޢާއްމުންގެ އެއްބާރުލުމަށްވެސް ވެމްކޯއިން އެދެއެވެ. އެގޮތުން ކުނި ގެއިން ނެރޭއިރު ރަނގަޅަށް ބަންދުކުރުމަށް ސަމާލުވުމަށް ވެމްކޯއިން އިލްތިމާސްކުރައްވައެވެ.
ހަމީދު
މި ދަނޑިވަޅުގެ ނާޖާއިޒަ ފަ އިދާ ނަގާފައި ވަނީ ވެމްކޯއިން. ކޮވިޑް އޭ ކިޔާފަ މަގުމައްޗައް ކުނި ނެރެން ބުނީ. ވެމް އިން ގްރައުން ފްލޯއިން ކުނި އުކާދޭ އަގަކީ 100ރ ނަމަވެސް ފީ އަކަށް ބަދަލެއް ނުގެނެސް 150ރ ނަގަމުން ދާތާ އަހަރު މިވީ. ނާޖާއިޒް ފައިދާ ނެގިފަ އޮފީ ކޮން ބަޔަކަށް ބާ. ކޮބާތޯ ޢިންސާފް