މިއަހަރުގެ ދިވެހި ބަހުގެ ދުވަހުގެ މުނާސަބަތުގައި ދިވެހި ބަހަށް އިތުރު މުއްސަނދިކަމެއް ގެނުވާނެ ޒަމާނީ އުފެއްދުންތަކެއް ތަޢާރަފްކޮށްފިއެވެ.
މިއީ ދިވެހި ބަސް ކުރިއެރުވުމަށްޓަކައި ދިވެހި ބަހުގެ އެކަޑަމީން ކުރައްވާ މަސައްކަތްތަކަށް އެހީތެރިވެ ބަހަށް ޚިދުމަތް ކުރުމުގެ ގޮތުން ޓެކްނޮލޮޖީގެ ދާއިރާގައި މަސައްކަތްކުރާ ބައެއް ފަރާތްތަކުން ތަޢާރަފްކޮށްފައިވާ އައު އުފެއްދުންތަކެކެވެ.
ދިވެހިބަހަކީ ޒުވަނުންނާއި ކުޑަކުދިންގެ މެދުގައި މަޤުބޫލު އަދި އޮފީސް މުވައްޒަފުންގެ މަސައްކަތުގައި މުޢާމަލާތްކުރުމަށް ބޭނުންކުރާ މައިގަނޑު ވަޞީލަތަށް ހެދުމަކީ ދެވެހިބަހުގެ އެކަޑަމީގެ މައިގަނޑު އަމާޒެވެ. އަދި ނެތިދިޔުމުގެ ބިރު ހީވެފައިވާ ބަހުގެ އެކި ބައިތަކަށް މީހުން ޝައުގުވެރިކުރުވާފަދަ ގޮތަކަށް ގެނެސްދިނުމަށްވެސް އަންނަނީ އެކި މަސައްކަތްކުރަމުންނެވެ.
ކޮންމެ އަހަރެއްގެ އެޕްރީލްމަހުގެ 14ވަނަ ދުވަސް ދިވެހި ބަހުގެ ދުވަހުގެ ގޮތުގައި ފާހަގަކުރުމުގެ އެންމެބޮޑު އެއް މަޤުސަދަކީވެސް މިއެވެ. ދިވެހިބަހުގެ އެކަޑަމީގެ މިމަސައްކަތަށް އެއްބާރުލުންދީ އަމިއްލއަށް އިސްނަގައިގެން އެކި ދާއިރާތަކުން ފާހަގަކުރެވޭ ޒުވާނުން އަންނަނީ މަސައްކަތްކުރަމުންނެވެ. މީގެތެރެއިން ފާހަގަކުރެވޭ އެއް ޓީމަކީ ކަމަނަ ޓީމެވެ.
އޭޖެންޓް ކަމަނަ
މިދުވަހާ ގުޅިގެން ތަޢާރަފްކޮށްފައިވާ އެންމެ ހިތްގައިމު އެއް މަސައްކަތަކީ "ކަމަނަ"ގެ ނަމުގައި ކަމަނަ ޓީމުން އެކުލަވާލާފައިވާ ވެބްސައިޓެވެ. މިވެބްސައިޓު މެދުވެރިކޮށް ދިވެހި ބަހުން ކިޔާއެއްޗެއް ރެކޯޑުކޮށް ލިޔުމަށް ބަދަލުކުރުމައި ލިޔެފައިވާ އެއްޗެއްގެ އޯޑިއޯއަށް ބަދަކޮށް އަޑުއެހެއެވެ. މީގެ ސަބަބުން އޮފީސްތަކުގައި މަސައްކަތްކުރާ ފަރާތްތަކަށް ބޮޑެތި ލުއިފަސޭހަތަކެއް ލިބިގެންދާނެކަމަށް ކަމަނަ ޓީމުން ފާހަގަކުރެއެވެ. ކަމަނަ އަކީ އާޓިފިޝަލް އިންޓެލިޖެންސްގެ ދާއިރާއިން ރާއްޖޭގައި އުފައްދާފައިވާ މިފަދަ ފުރަތަމަ އޭޖެންޓެވެ.
http://kamana.ai/
އެމްވީ އަކަ
ދިވެހި ފޮންޓުތައް ތަޢާރަފްކުރުމާއި އެކި އެޕްތަކުގައި ބޭނުންކުރާނެ ޚާއްސަ ދިވެހި ފޮންޓުތައް ފަރުމާކުރެވޭ ފަދަ ހިތްވަރު ހުރި ބަޔަކަށް ދިވެހިންވަނީ މިއަދުވެފައެވެ. މިއަހަރުގެ ދިވެހި ބަހުގެ ދުވަސް ފާހަގަކުރުމަށް ތާރީޚާއި ބަހުގެ ދާއިރާގައި ފާހަގަކޮށްލެވޭ ބޭފުޅެއްކަމަށްވާ ހަސަން ޙަމީދު މިފަހަރު ގެނެސްދެއްވީ "އެމްވީ އަކަ"ގެ ނަމުގައި ޚާއްސަ ދިވެހި ފޮންޓެކެވެ. ހަސަން ޙަމީދު ވިދާޅުވަނީ މި ފޮންޓަށް އެމްވީ އަކަ ކިޔުއްވީ ފޮންޓުގައި ހިމެނޭ އަކުރު ތައް އަކައެއް ނުވަތަ ހަތަރެސްކަން ގޮޅިއެއްގޮތަށް ހުންނާތީއެވެ.
މިފޮންޓުގެ ދެބޭނުމަކީ ސުރުޚީ ލިޔުމަށާއި ދިވެހި ލިޔުންތަކުގެ މައިގަނޑު ނުވަތަ ބޮޑީ ޓެކްސްޓް ލިޔުމަށް ޚާއްސަކޮށްގެންނެވެ. ބަހުގެ ދުވަހެއް ފާހަގަކުރަމުން އަންނައިރު މިއީ މިދާއިރާއިން އިތުރަށް ލިބުނު ކުރިއެރުމެކެވެ.
http://www.hassanhameed.com/?page_id=17283
ތާނަ ބްރެއިލް ފޮތާއި އިތުރު ބައެއް ފޮތްތައް
ދިވެހި ބަހުގެ އެކަޑަމީންވަނީ ދުވަހާ ގުޅިގެން ތާނަ ބްރެއިލް ފޮތެއް ނެރެފައެވެ. ލޯފަތް ކުދިންނަށް ޚާއްސަކޮށް ލިޔަންކިޔަން ދަސްކޮށްދިނުމުގެ ކޯސްތައްވެސް ހިންގަވާފައިވާ އަޙްމަދު ރަޝީދުގެ ތާނަ ބްރެއިލްގެ ދިވެހިބަހުގެ ގަވާއިދު އެއްވަނަ ބައި ފޮތް ވެގެންދާނީ މިފަދަ ކުދިންނަށް ކުރިއަށް ދިޔުމަށް އެޅޭ މުހިއްމު ފިޔަވަޅަކަށްކަމަށް އެކަޑަމީން ދެކެވަޑައިގަންނަވައެވެ. އަދި ހަމަ މިފަދަ ކުދިންނާ މުޢާމަލާތު ކުރުމުގައި ޢާއްމުނަށްވެސް ފަސޭހަތަކެއް ލިބިގެންދާނެ ފޮތަކަށް މިފޮތްވެގެންދާނެއެވެ.
ދިވެހި ބަހުގެ ދުވަސް ފާހަގަކުރުމުގެ ތެރެއިން ބަހުގެ އެކަޑަމީން ނެރުނު އިތުރު ފޮތްތަކުގެ ތެރޭގައި އަންނަބީލާ ޙަބީބާ ޙުސެއިން ޙަބީބުގެ ފޯކްލޯރު ފޮތާއި މުޙައްމަދު ޝާހިދުގެ ޙަލީމްގެ "ދިވެހި ގެ" ހިމެނެއެވެ. މީގެއިތުރުން ދުވަހާ ގުޅިގެން ދިވެހިބަހުގެ އެކަޑަމީންވަނީ އެއެކަޑަމީގެ ރަސްމީ ޓިކްޓޮކް އެކައުންޓް އިފްތިތާޙްކޮށްފައެވެ. މީގެއިތުރުންވެސް ސަރުކާރުގެ މުވައްސަސާތަކާއި ސްކޫލްތަކުގައިވެސް ދުވަސް ފާހަގަކުރުމުގެ ގޮތުން އެކި ޙަރަކާތްތައް ހިންގާފައިވާކަމަށް ބަހުގެ އެކަޑަމީން ވިދާޅުވެއެވެ.