އޮފީސް ނިމިގެން ގެއަށް އާދެވުނުއިރު ހުރީ ރޭގަނޑު ވަރަށް ލަސްވެއައެވެ. ފެންވަރާ ނަމާދޮކޮށް ހަދައިގެން ވެފަހުރި ވަރުބަލި ފިލުވާލުމަށްޓަކައި އެނދުގައި އޮށޯތީމެވެ. އެއޮތްގޮތަށް އޮވެ އަހަންނަށް ނިދިޖެހުނެވެ. ސިއްސައިގެންގޮސް އަހަންނަށް ހޭލެވުނުއިރު މުޅިމީހާ އޮތީ ދާހިއްލާ ފޯވެފައެވެ. ކޮޓަރީގައި ޖައްސާފައި ހުރި އެއަރކޯން އަކުން އެއްވެސް އަސަރެއް ނުކުރިއެވެ.
އަހަރެންގެ މޭ ތެޅެންފެށިއެވެ. ތުރު ތުރު އަޅަން ފެށިއެވެ. ކައިރިގައި އޮތް ފޯނުން ގަޑި ބަލާލީމެވެ. އޭރު ގަޑިން ދަންވަރު ތިންގަޑި ބައިވަނީއެވެ. އަހަންނަށް ހޭލެވުނީ ތަކުރާރުވަމުންދާ އެ ހުވަފެނުގެ އުނދަގުލުންނެވެ. އެއީ މީގެ އަހަރުތަކެއްކުރިން ވެސް ހަމަ ފެންނަމުންދާ ހުވަފެނެކެވެ. ހަޔާތުގެ އެކި އަނދިރި ދުވަސްތަކެވެ. އެދުވަސްތައް މާޒީއާއި އެކުވެދިއުމަށް ވަރަށް މަސައްކަތްކުރީމެވެ. ނަމަވެސް މިނިކަމެތި ހިތުގައި އެދުވަސްތައް ބިންވަޅުނެގިފައިހުރީ ހަނދާނުން ފޮހެލެވޭހާ ފަސޭހަގޮތަކަށްނޫނެވެ.
އެނހަދާންތަކާ ދުރަށްދިއުމަށް ފާހާނަޔަށް ވަދެ ވުޟޫކޮށްލައިގެން ނިކުމެ ޤުރުއާން ކިޔަވަންފެށީމެވެ. އަހަރެންގެ ހިތަށް ހިތްހަމަޖެހުން ލިބޭ ހަމައެކަނި ކަމަކީ މިހާރު ދީނީކަންކަމުގައި ފައިތިލަ ސާބިތުވެ ހުރުމެވެ. އިރުކޮޅެއްވަންދެން ކިޔަވާލަން އިނުމަށްފަހު އަނެއްކާވެސް ނިދޭތޯ މަސައްކަތްކުރީމެވެ. ދެފަރާތަށް ފޮރޮޅި ފުރޮޅިވެސް ނިދޭގޮތެއް ނުވިއެވެ. އޭރު ފަތިސް ނަމާދަށް ބަންގިދީފިއެވެ. ނަމާދުކޮށްނިމިގެން ކޮފީތައްޓެއް ހަދާލުމަށްފަހު ބެލްކަނީގައި ހުރި އުނދޯލީގައި އިށީންނީމެވެ. އެއްވެސް ހުރަހެއްނެތި ކުރިމަތިން ފެންނަމުން ދަނީ މާސިންގާ ބިޔަ ބޮޑުކަނޑެވެ. ކަނޑުގެ ބިޔަރާޅުތަކެވެ. ރާޅަކަށްފަހު ރާޅެއް ނަގަމުންދިޔައެވެ. އެރާޅުތަކުގެ ޝިކާރައަކަށްވެ ދުނިޔެދޫކޮށް ދިއުމަށްވެސް ކިތަންމެ ފަހަރަކު ހިތަށްއެރިއެވެ. ނަމަވެސް ހިތުގައި އީމާންތެރިކަން އޮތްލެއް ބޮޑުކަމުން އެފަދަ ކަމެއްކުރުމަށް އަހަރެން ޟަމީރު ތަނެއް ނުދެއެވެ.
އަހަރެން ތަހައްމަލްކުރަމުން މިދާ އެކަނިވެރިކަމާ މާޔޫސްކަން އަދި ނަފްސާނީ އަނިޔާތަކަކީ މިފަދަ އެހެން އިންސާނަކަށް ތަހަންމަލް ނުކުރެވޭވަރުގެ ކަންކަމެވެ. އަހަންނަކީ ލޯބިން އުޅެމުންދިޔަ ދެމަފިރިޔަކަށް ލިބުނު 2ކުދިންގެ ތެރެއިން ދޮށީ އަންހެން ދަރިފުޅެވެ. އުމުރުގެ ހަގުކަމުން މަންމަޔާ ބައްޕަކައިރީގައި އުޅުމަށް ލިބުނު މަދު ދުވަސްތަކުގެ ހަނދާންތަކެއް މާބޮޑަކަށް ނުވެއެވެ. ނަމަވެސް ހަނދާނުން ނުނެތޭ ދުވަހެއް ވެއެވެ. ލޯބިން އުޅެމުން އައި މަންމަ ބައްޕަގެ ދެމެދުގައި މައްސަލަޖެހި ދެބަސްވެ، ދެމީހުން ވަކިވި ދުވަހެވެ. ދެމީހުން ވަކިވާންޖެހުނީ އެދެމީހުންގެ ދިރިއުޅުމަށް އެޅުނު އެހެން އަންހެނެއްގެ ހިޔަންޏެއްގެ ސަބަބުންނެވެ. މިކަމުގެ ސަބަބުން މަންމައާއި ބައްޕަގެ ދެމެދުގައި މައްސަލަބޮޑުވެ އެންމެފަހުން ދެމީހުން ވަކިވިއެވެ.
އޭރު މަންމަ އިނީ ދެވަނަދަރިފުޅަށް ބަލިވެއެވެ. އޭރު އަހަރެންގެ އުމުރަކީ 11 އަހަރެވެ. މަންމައާ ބައްޕަ ވަކިވުމުގެ ސަބަބުން އަހަންނަށްވަނީ ނަފްސާނީ ގޮތުން ވަރަށްބޮޑަށް އަސަރުކޮށްފައެވެ. ދެމީހުން ވަކިވުމަށްފަހު މަންމަ އުޅެމުންދިޔައީ މަންމަގެ ގޭގައެވެ. އާދައިގެ ދިރިއުޅުމެއްގައި ވަރަށް އެކަނިވެރިކޮށެވެ. މަންމައިނީ އޭރު ވިހަން ތައްޔާރުވެފައެވެ. މަންމަ އަކީ ވަރަށް އާދައިގެ ނިކަމެތި އާއިލާއަކަށް ނިސްބަތްވާ މީހެއްކަމުން ދިރިއުޅެމުން ދިޔައީ ވަރަށް އާދައިގެ ގޮތަކަށެވެ. މަންމަކުރާހިތާމަޔާ ލޮލުން އޮހޮރެމުންދިޔަ ކަރުނަތައް ބަލަން އަހަރެންގެ އެ މައުސޫމް ދެލޮލަކަށް ކެތެއް ނުވެއެވެ. ނަމަވެސް އަހަންނަށް ކޮށްދެވޭނެ މާބޮޑުކަމެއްނެތެވެ. ދެމީހުންގެ ވަކިވުމަށްފަހު ބައްޕަ އެހެން ކައިވެންޏެއް ކުރިއެވެ. އަދި މަންމަގެ ނިކަމެތިކަމުން ބެލޭނެގޮތެއްނެތިގެން މަންމަ އެދިގެން އަހަރެން ބޮޑުދައިތަޔާ ހަވާލުކުރިއެވެ.
ބޮޑުދައިތައަކީ އަހަރުމެންނާ އެހާގާތްކޮށްއުޅުނު މީހެއްނޫނެވެ. އަދި ބޮޑުދައިތަގެ މިޒާޖެއްވެސް އަހަންނަކަށް ނޭނގެއެވެ. މަންމަދެކޭގޮތުގައި އެއީ އަހަރެންގެ މުސްތަޤްބަލް އުޖާލާކުރުމަށް ނިންމި މުހިންމު ނިންމުމެކެވެ. ކޮންމެ މަންމަޔަކުވެސް އަދި ބައްޕަޔަކުވެސް ދަރީން ބަލާ ބޮޑުކުރާނީ ވަރަށް ބޮޑެތި ޤުރުބާނީއެއްވެ ބުރަތަކެއް އުފުއްލައިގެނެވެ. އެދެމީހުންނަކީ އަހަރެންގެ ހަޔާތުގައި މުހިންމު ރޯލެއް އަދާކުރާނެ ދެމީހުންނެވެ. ރަނގަޅުގޮތް ބުނެދީ ތެދުމަގު ދައްކަން ތިބި ދެމީހުންނެވެ. އިގިލި ކުރީގައި ހިފައިގެން ތަންތަނަށް ގެންދާންތިބި ދެމީހުންނެވެ. އެދެމީހުން އަހަންނަށް ދެރަގޮތެއް ވާކަށް ނޭދޭނެއެވެ.އަދި ހިތާދެކޮޅަށްނަމަވެސް އެނިންމި ނިންމުގެ ސަބަބުން މިއަދު އަހަރެން މި ތަހައްމަލް ކުރަމުންދާ އެކަނިވެރިކަމާ މާޔޫސްކަމަކީ ކިހާ ހިތިއެއްޗެއްކަން މަންމައަށް ކުރިން އެނގޭނަމަ ކޮންމެ ހާލެއްގައި އަހަރެން ގެންގުޅެން ޖެހުނުނަމަވެސް އަހަރެން ދުލެއް ނުކުރީސްކަން ހަމަ ޔަޤީނެވެ.
ބޮޑުދައިތަ އައިސް އަހަރެން ގެންދިޔަ ދުވަހަކީ ވަރަށް ހިތުގައި ޖެހުނު ދުވަހެކެވެ. ބޮޑުދައިތައަކީ މާލޭގައި ތަނަވަސް ދިރިއުޅުމެއް އުޅެމުން އަންނަ މީހެކެވެ. ބޮޑުދައިތަގެ 4 ކުދިން ތިބެއެވެ. އެކުދިން އަހަންނަށްވުރެ ދޮށްޓެވެ. ބޮޑުބޭބެއަކީ ވިޔަފާރިވެރިއެކެވެ. ބޮޑުދައިތައާ އެކު އަހަރެން އެގެއަށް ދިޔައީ ބޮޑުދައިތަގެ އަމިއްލަ ޕްރައިވެޓް ކާރުގައެވެ. ކާރުގާ މާގިނައިރުތަކެއްނުވެ ގެއަށް ދެވުނެވެ. ކާރު ގޮސް ހުއްޓީ މާފަންނު ކޮޅު ގެއަކަށެވެ. އަހަރެން ބޮޑުދައިތަގެ ގެއަށް އައި މީފުރަތަމަ ފަހަރެވެ. ކާރުން ފައިބައިގެން ބޭރަށްނުކުމެ ގެއަށް ނަޒަރު ހިންގާލީމެވެ. 10 ބުރިއަށް އިމާރަތްކޮށްފައިވާ ބޮޑު ގެއެކެވެ. ބޭރަށް ފެންނަފެނުމުން ވަރަށް ފުރިހަމައެވެ. ބޮޑުދައިތަ އާއި އެކު ގޭތެރެއަށް ވަނީމެވެ. މައިދޮރުން ވަންނަ އިރު ފެންނަންއޮންނަނީ ބޮޑު މަސް ފެންގަނޑެކެވެ. ފެންގަނޑުގެ ދެފަރާތުގައި ވަނީ މާގަސް ހައްދާފައެވެ. އެތެރެއަށް ވަދެގެން ދާން އޮންނަ ރާސްތާގެ ދެފަރާތުގައިވެސް ވަނީ ތަފާތު މާބަގީޗާ ހައްދާފައެވެ. ހިނގަމުން ދިޔައިރު އަހަރެންގެ ވާތްފަރާތުގައި ބަގީޗާގެ ތެރޭގައި ބޮޑު އުނދޯޔެއްއެލުވަފާ ހުއްޓެވެ. އުނދޯލީގައި ތިން ކުއްޖަކު އިށީންދެލައިގެން ހެއްލާލަ ހެއްލާލާ އިނެވެ. އެވާނީ ބޮޑުދައިތަގެ ކުދިން ކަމުގައި އަހަރެން ހިތަށް އެރިއެވެ. އިރުކޮޅަކުން ބޮޑުދައިތަ އެކުދިންނަށް އިޝާރަތްކޮށް ބުނެލިއެވެ.
ސަމާ!، އުނދޯލީގައި އެތިބީ ބޮޑުދައިތަގެ ދަރިން. އެކުދިންނާ ދޭތެރޭ ރަނަގަޅަށް ކަންތައް ކުރާތި، އަދި އެކުދިން ނުރުހޭ ގޮތަކަށް އެއްކަމެއްވެސް ނުކުރާތި. ބޮޑުދައިތަގެ ބަސްމަގުގައި ކުޑަކޮށް ހަރުކަށިގޮތެއް ހުރިކަން އަހަންނަށް ފާހަގަކުރެވުނެވެ. ނަމަވެސް އެއީ ބޮޑުދައިތަގެ ވާހަކަދެއްކުން ހުންނަ ގޮތްކަމަށް ވެދާނެ ކަމަށް އަހަރެން ހިތަށް އެރިއެވެ. ހިނގަމުންގޮސް ލިފްޓް ކައިރިއަށް ހުއްޓުނެވެ. އަދި ލިފްޓް ތިރިއަށް އަންނަންދެން ތިރީގައި މަޑުކޮށްލައިގެން ހުރިއިރު ލިފްޓްކައިރީގައި ހަރުކޮށްފައިހުރި ބޯޑަށް ނަޒަރު ހިންގާލީމެވެ. އެއްވަނަ ފަންގި ފިލާއިން ފެށިގެން ގޮސް 10 ވަނަ ފަންގި ފިލާޔާ ހަމަޔަށް ވަނީ ތަރުތީބުން އެކި މީހުންގެ ނަންތަކެވެ. އެއީ އެ އިމާރާތުގައި ކުއްޔަށް ތިބޭ މީހުންކަމުގައި ވެދާނެއެވެ. ބޯޑުގެ ހަވަނަ ފްލޯގައިވަނީ ބޮޑުދައިތަގެ ނަމެވެ.
ލިފްޓަށް އަރައިގެން އެޕާޓްމަންޓަށް ދެވެންދެންވެސް ބޮޑުދައިތަ އަހަންނާ މާބޮޑުވާހަކަތަކެއް ނުދައްކައެވެ. ބޮޑުދައިތަ ވާހަކަ ނުދައްކާތީ އަހަންނަކަށްވެސް ވާހަކަ ދައްކާކަށް ނުކެރެވެ. ތަޅުދަނޑިޖަހާ ބޮޑުދައިތަ ދޮރު ހުޅުވާލިއެވެ. ގޭތެރެ ވަރަށްވެސް ފުރިހަމައެވެ. ދޮރުންވަންއިރު ބޮޑުބޭބެ ސިޓިންގް ރޫމްގައި ޓީވީން ހަބަރު ބަލަން އިނެވެ. އަހަރެން ފެނުމުންވެސް މާބޮޑު ސަމާލުކަމެއް ނުދެއެވެ. ބޮޑުދައިތަ އަހަރެން ގޮވައިގެން ދިޔައީ ބަދިގެ އާ ދިމާލަށެވެ. އެޕާޓްމަންޓް ބޮޑުކަމުން ބަދިގެވެސް އިންނަނީ ވަކިންނެވެ.
އެޕާޓްމަންޓަގައި 5 ކޮޓަރި ހުރެއެވެ. ބަދިގެތެރޭންލާފާ ގޮސް ވަނީ ކުޑަކުޑަކޮޓަރިއަކަށެވެ. އެތާ ގޮދަޑިޔާ ފާރުގައި ހަރުކޮށްފައިހުރި ކުޑަވަރެއްގެ އެނބުރޭ ފަންކާއެއް ފިޔަވާ އިތުރު އެއްޗެއްނެތެވެ. ވައިބޭރުވާނެ އެއްވެސް ގޮތެއް ނެތެވެ. އަހަރެންގެ ހިތަށް އެރިއެވެ. " މީ ބޮޑުދައިތަ އަހަރެން ބަހައްޓަން ހަމަޖެއްސި ތަންބާވައެވެ. އަހަރެންގެ ފޮށި ކޮޓަރިތެރޭގައި ބެހެއްޓުމަށްފަހު ބޮޑުދައިތަ ބުނެލިއެވެ.
ސަމާ!،، މީ ސަމާގެ ކޮޓަރި. ގިނަވަގުތު ސަމާ އުޅޭނީ ބަދިގޭ މަސައްކަތުގައި ނޫނީ ގޭތެރެ ސާފުކުރުމުގައި ބޮޑުދައިތައަށް އެހީތެރިވުމުގައި. މިހެންބުނުމަށްފަހު ބޮޑުދައިތަ ނުކުމެގެން ދިޔައެވެ. އަހަރެން ހުރީ ބަސްހުއްޓިފައެވެ. އަހަރެން ހިތަށްއެރިއެވެ. އަހަރެން ބޮޑުދައިތައާއެކު މިގެއަށް އައީ މަސައްކަތުމީހަކަށްބާވައެވެ.
އަހަރެން މިގެއަށް އައީ ބޮޑުދައިތަގެ ދަރިއެއްފަދައިން މިގޭގައި އުޅޭށެވެ. އަނެއްކާ އަހަރެންގެ މަންނަ ބޮޑުދައިތަޔާ އެކު އެއްބަސް ވީ މިގޮތަށް ބާވައެވެ. ތަފާތު އެއްޗިހި ހިތަށްއެރިއެވެ. ނަމަވެސް މިކަންކަން އަމިއްލަ ޟަމީރު ޤަބޫލް ނުކުރާތީ އެކަމާ ވިސްނާކަށް ބޭނުމެއްނުވިއެވެ. ފާހާނަޔަށް ވަދެ ގައިދޮވެލާހަދައިގެން ނަމާދުކޮށްލީމެވެ. އަދި ބަދިގެތެރެއަށް ނުކުތީމެވެ. ބަދިގެތެރޭމަސައްކަތުގައި ބޮޑުދައިތަ އުޅެއެވެ. ބަދިގެއަށް ދިއުމުން ބޮޑުދައިތަ އަހަންނާ މަސައްކަތް ހަވާލުކުރިއެވެ. ސިންކުގާ ހުރި ތެލިތަކާ ތަށިތައް ދޮންނާށެވެ. އަހަރެންގެ މަންމަ އަހަރެން ގެންގުޅުނީ ކަންތައްތައްކުރުވައިގެން ނޫންކަމުން ގޭތެރޭގެ ކަންތައްތައްކުރަން އަހަންނަށް ވީ ވަރަށް އާކަމަކަށެވެ. އަހަންނަށް އެނގޭގޮތަކަށް އަހަރެން މަސައްކަތް ކުރަން ފެށީމެވެ.
އަހަރެން އެގެއަށް ބަދަލުވީފަހުން އަހަރެންގެ މަންމަޔާ ބައްޕަ އަހަންނަށް ގެއްލުނީއެވެ. މަންމަ މަތިންވެސް ވަރަށް ހަނދާންވެއެވެ. މިގެއަށް ބަދަލުވީފަހުންވެސް މިހާރު 3 މަސްވީއެވެ. ބައްޕަވެސް އަދި މަންމަވެސް އަހަރެން ކޮބާތޯ، ކައިގެން ތޯ ހުރީވެސް ބަލާ ނުލައެވެ. މިގެއަށް ބަދަލުވީއްސުރެ އަހަރެން ސްކޫލަކަށް ނުދަމެވެ. އެއީ ބޮޑުދައިތަ އަހަރެން ސްކޫލަށް ފޮނުވަން ބޭނުން ނުވާތީއެވެ. އަހަރެން ކިޔެވުމަށް ވަރަށް ޝައުގުވެރިކަން ހުރެއެވެ. އެހެންކަމުން ބޮޑުދައިތަކައިރީ އެއްދުވަހު އަހަރެން ސްކޫލަށް ދާން ބޭނުންވާހަކަ ވަރަށް އާދޭހާއެކު ބުނުމުން ވަރަށް އުނދަގުލުން އެކަމަށް އެއްބަސްވިއެވެ.
ބޮޑުދައިތަގެ ޝަރުތަކަށްވީ ފަތިހުތެދުވެ ހެނދުނުގެ ނާސްތާޔާ، ގޭތެރޭގެ ކަންތައް ތައް ނިންމުމެވެ. ސްކޫލަށްދާހިތްއޮތްލެއް ބޮޑުކަމުން އެކަންކަންއެގޮތަށް ކުރުމަށް އަހަރެން އެއްބަސްވީމެވެ. އޭރު އަހަރެންގެ އުމުރުން އެންމެ 12 އަހަރެވެ. އެއީ ލޯބިން މަންމައެއްގެ އުނގުގާބޯއަޅައިލައިގެން އޮވެ ނިދާލާ އުމުރެވެ. ނަމަވެސް ލޯތްބަށްޓަކައި މިއަދުއަހަރެން ކިތަންމެ ބޭނުންކަމުގާ ވީނަމަވެސް އެލޯތްބެއް ލިބޭކަށް ނެތެވެ. ގޭތެރޭގެ މަސައްކަތުން އަވަދިވެގެން ނިދެނީ އެހާލަހުންނެވެ. އަދި ހެނދުނު ސްކޫލަށް ދެވޭނީ ގޭތެރޭގެ މަސައްކަތް ކޮށްފާ ކަމުން ވަރަށް ފަތިހާ ތެދުވަންޖެހެއެވެ. ގިނދުވަސްދުވަހު ސްކޫލަށް ދެވެނީ ގަޑިޖެހިގެނެވެ.
ބޮޑުދައިތަގެ ދަރިން ސްކޫލަށް ގެންދަނީ ގޭ ކާރުގައެވެ. އަހަރެން ކިތަންމެ ބޭނުން ކަމުގައިވީނަމަވެސް އަހަންނަށް ކާރުގައި ދިއުމުގެ ފުރުސަތެއް ނުލިބެއެވެ. ބޮޑުދައިތަގެ ދަރީންވެސް އަހަންނާ ވާހަކަދައްކައެއް ނޫޅެއެވެ. އެކުދިންވެސް ދެކެނީ އަހަންނަކީ އެގޭ ނޯކަރެއްގެ ގޮތުގައެވެ.އަހަރެން ކަނީވެސް ބޮޑުދައިތަމެންގެ އާއިލާ ކައިނިމުމުން ކޮޓަރިތެރޭގައެވެ. ބައެއްފަހަރު ބޮޑުދައިތަމެން ކައިނިމޭއިރު ބާކީ ހުންނާނީ ވަރަށް މަދު އެއްޗެކެވެ. އެކަހަލަ ދުވަސް ދުވަހު ހުންނަން ޖެހެނީ އެއްވެސް އެއްޗެއް ނުކައެވެ. ވަރަށް ބަނޑު ހައިވެސްވެއެވެ. ބައެއްދުވަސް ދުވަހު ހެނދުނު ސްކޫލަށް ދިއުމުގެ ކުރިން ގެއަށް ބޭނުންވާ ސާމާނު ގަތުމަށް ކައިރި ފިހާރަތަކަށްވެސް ދާންޖެހެއެވެ. ގެއަށް ބޭނުންވާ ބޯފެންގަންނަށްވެސް ދާންޖެހެނީ އަހަންނާއެވެ. ދެއަތަށް ދެ ފެންފުޅިލައިގެން ބަރުކަމުން ހިނގާލެވެނީ ކިރިޔާއެވެ. މިހެން އަންނަ ބައެއްދުވަސް ދުވަހު ކްލާސް ކުދިންނާވެސް ދިމާވެއެވެ.
އަހަރެންގެ ފަހަތުގައި އަހަންނަށް ހީ މަލާމާތްކޮށް ހަދައެވެ. ކްލާހުގައި އަހަންނާ ވާހަކަ ދައްކާ ހަދަނީވެސް ވަރަށް މަދުކުއްޖެކެވެ. ގަނާކުރުމުގެ ޝިކާރައަކަށް އަހަރެން ވަނީ ވެފައެވެ. މިވާހަކަތައް އަހަރެން ކިޔާދޭނެ މީހަކު ނެތެވެ. އަދި އަހަރެން ދައްކާ ވާހަކަތައް އަޑުއަހާނެ ފަރާތެއްވެސް ނެތެވެ. އެކަނިވާ ވަގުތު އަމިއްލައަށް އިނދެ ރުއިން ނޫން ކަމެއް ނުކުރަމެވެ. މައިންބަފައިން މަތިން ވަރަށް ހަނދާންވެއެވެ. މަންމަ ކޮބާބާއޭ ހިތަށް އަރައެވެ. އަހަރެންގެ ހާލުބަލާނުލަނީ އަދި އަހަރެން ހޯދަންނާންނަނީ ކީއްވެބާއޭ ހިތަށް އަރައެވެ. އަހަރެން ދޫކޮށްލީ އަހަރެންގެ ކޮން ކުށެއް އޮވެގެން ބާއޭ ހިތަށް އަރައެވެ. މަންމަ ދެކިލާހިތުން ބޮޑުދައިތަކައިރީ ކިތަންމެ ފަހަރަކު އެގެއަށް ގެންގޮސް ދިނުމަށް އެދުނީމެވެ. ޖަވާބުގައި ބޮޑުދައިތަ ބުނަމުން އައީ މަންމަ މިހާރު ދިރިއުޅެނީ އަވައްޓެރި ޤައުމެއްގެ މީހަކާ ކައިވެނިކޮށްގެން އެޤައުމުގާ ކަމަށެވެ.
ކޮންމެއަކަސް ދުވަސް ތައް މިގޮތުގައި ހޭދަވަމުން ގޮސް އަހަރުތަކެއް ފާއިތުވެގެން ހިނގައްޖެއެވެ. މިހާރު އަހަރެންގެ އުމުރުން 24 އަހަރެވެ. ގްރޭޑް 8 ކާ ހަމައިން ސްކޫލުންވެސް ކެނޑުނީއެވެ. ކިޔެވުމަށް ވަގުތު ނުދެވުމާ، ސްކޫލް ކުދިންގެ ގަނާކުރުމާ ފުރައްސާރަޔަށް ކެއް ނުކުރެވިގެން ވަކިވީއެވެ. ކިތަންމެ ކިޔަވާ ހިތްވީކަމުގައިވިނަމަވެސް ތަޤްދީރުގައި އަހަންނަށް އެފުރުސަތެއް ނެތެވެ.
އަހަރެންގެ އުމުރުން 23 އަހަރުގައި ވަޒީފާއަކަށް ކުރިމަތިލީމެވެ. އަހަންނަކީ ޒަމާނީ ތަޢުލީމް ހާސިލް ކޮށްފާވާމީހެއް ނޫނެވެ. އަދި ސާނަވީ ތަޢްލީމްވެސް ނިމެންދެން ހާސިލްކޮށްފާވާ މީހެއް ނޫނެވެ. ވުމާއެކު މާމަތީ ވަޒީފާއެއް ނުލިބޭނެކަންވެސް އެނގެއެވެ.
އަމިއްލަ ވިޔަފާރިވެރިއެއްގެ އޮފީހުގެ ކައުންޓަރު ގައި އަދާކުރާ ވަޒީފާއެއް ހަމަޖެހުނެވެ. އެއީވެސް އަހަރެންގެ އަމިއްލަ މަސައްކަތުންނެވެ. ވަޒީފާއަށް ދިއުމަށް ބޮޑުދައިތަ އެއްގޮތަކަށްވެސް ޤަބޫލެއް ނޫނެވެ. ބޮޑުދައިތަގެ ނުރުހުމާ ހިތްހަމަނުޖެހުމާއެކުވެސް އަހަރެން ހިތްއެދޭގޮތަށް ކަންތައް ކުރީމެވެ. އަހަންނާ ދިމާލަށް ވަރަށް އެއްޗިހި ކިއެވެ. އަހަރެން ކުޑައިރު އެއްވެސް އާރެއް ބާރެއް ނެތްއިރު ކެއްތެރިކަމާއެކު އެގޭގައި އަހަރުތަކެއް ކަޑައްތުކުރިކަމުގައިވީނަމަވެސް މިހާރު އަހަންނަކީ ތަސައްރަފް ފުދިފައިވާ ތަންދޮރު އޮޅުންފިލާ ވަރުގެ މީހެކެވެ. އަބަދަކު އެވޭނީ ހަޔާތުގައި ދުވަސްތައް ހޭދައެއް ނުކުރެވޭނެވެ. އަހަރެންވެސް އުފާވެރި ދިރިއުޅުމަކަށް އިންތިޒާރުކުރަމެވެ. އަހަރެންގެ ހަޔާތަށް އައި ބަނަ ދުވަސްތަކުގެ ބަދަލުގައި އުފާ ފާގަތި ދުވަސްތަކަކަށް އިންތިޒާރުކުރީމެވެ. އަހަރެން ގަޔަށް މަހާލަން ލިބެނީވެސް މީހުން ލާ ބާކޮށްފަ ހުންނަ އެއްޗިއްސެވެ. އަމިއްލަ ބޭނުމަށް ބޭނުންކުރާ ޒަރޫރީ އެއްޗިހިވެސް ލިބެނީ ބޮޑުދައިތަ ދިނިއްޔާއެވެ. މިއަޅުވެތިކަމަކީ އަބަދަކު އަހަންނަށް ތަހައްމަލް ކުރެވޭނޭ ކަމެއްނޫންކަން ވިސްނުނު ހިސާބުން ވަޒީފާއެއް ހޯދުމަށް ވިސް ނަންފެށީއެވެ.
ތެދުވެރިކަމާ އަމާނާތްތެރިކަމާ އެކު ވަޒީފާ އަދާކުރަމުންދާތާ 5 އަހަރާ ގާތްވީއެވެ. ވަޒީފާގެ ކުރިއެރުން ލިބި ލިބޭ އާމްދަނީވެސް އިތުވިއެވެ. އެހެންދުވަހެކޭވެސް އެއްގޮތަށް މިއަދުވެސް އަހަރެން އޮފީހަށް ދިއުމަށް ގޭން ނުކުމެގެން ހިނގައިގަތީމެވެ. ހިނގައިގަތްތާ މާ ގިނައިރުތަކެއް ނުވެ އަހަރެންގެ ނަމުން މީހަކު ގޮވާލިހެން ހީވިއެވެ. ހީއެއް ކަމަށް ހިތާ އަޅާނުލާ އަނެއްކާވެސް ކުރިއަށް ހިނގައިގަތީމެވެ. ދެވަނަފަހަރަށް އަނެއްކާވެސް "ސަމާ" ގެނަމުން ގޮވާލިއެވެ. މިފަހަރު ތަންކޮޅެއް ގާތުންނެވެ. ފަސްއެނބުރި ބަލާލީމެވެ. އެއީ އަހަރެން ދަންނަ މީހެއްނޫނެވެ. ސިއްސައިގެންގޮސް ބަލަހައްޓައިގެން ހުރެވުނެވެ. އެމީހާވެސް ކަޅިޖަހާނުލާ ހުރީ އަހަންނަށް ބަލަހައްޓައިގެނެވެ.އަހަންނަށް ތީ ކާކުތޯ ސުވާލުކުރެވުނެވެ. ޖަވާބުގައި މީ ޝިފާންއޭ ބުނެލިއެވެ.
އަދި ކުޑަކޮށް ހުއްޓުންއެރިއެވެ. އަދި ބުނެލީމެވެ. " ޝިފާން"؟ އަހަރެން ޝިފާނެއް ނުދަންނަން. އަދި ނުދަންނަ މީހުނާ ވާހަކަދައްކާކަށް ބޭނުމެއްނޫން ކަމަށް ބުނެ އަހަރެން އޮފީހަށްދާން ކުރިއަށް ހިނގައިގަތީމެވެ. އޭރުހުރީ ވަރަށް ލަސްވެފާކަމުން އަހަރެން ހިނގަމުން ދިޔައީ ވަރަށް ބާރަށެވެ.
އަހަރެންގެ ފަހަތުން މީހަކު އަންނަކަމެއް އަހަންނަކަށް ނޭނގެއެވެ. އޮފީހާކައިރިއަށް ގޮސް ފަހަތްބަލާލިއިރު ފަހަތުގައި އެމީހާ ހުއްޓެވެ. އަހަރެން އިތުރު އެއްޗެއްނުބުނެ އޮފީހަށް ވަނީމެވެ. އޮފީހުގައި އިންއިރުވެސް އަހަންނަށް ވިސްނެނީ އެއީ ކާކުބާވައެވެ. އަހަރެން ފަހަތުން އައީ ކީއްވެބާވައެވެ. ހަވީރު އޮފީސް ނިމުމުން ގެއަށް ދިއުމަށް ނުކުތް އިރުވެސް އެމީހަކު އަހަރެންގެ އިންތިޒާރުގައި ދޮރުމަތީގައި ހުއްޓެވެ. ޝިފާންގެ އުދަގޫ އަހަންނަށް ތަކުރާރުވާން ފެށިއެވެ. އަހަރެންގެ ފޯނަށްވެސް ގުޅަނީއެވެ. ބޭރަށްނުކުންނައިރަށް ފަހަތުންވެސް ހިނގަނީއެވެ. އެންމެފަހުން ޝިފާން އަހަންނަށް ލޯބިހުށަހެޅިއެވެ. އަދި އަހަންނާއެކީ ޒަވާޖީ ހަޔާތެއް ފެށުމަށް ބޭނުންވާކަމަށް ބުންޏެވެ. އަހަރެންވެސް މަޑުމަޑުން ޝިފާންގެ އެ ހުށަހެޅުން ޤަބޫލްކުރެވެން ފެށިއެވެ.
އަހަރެންވަނީ އަހަންނަށް އަޅާލާ އޯގާތެރިކަމާއެކު ވާހަކަދައްކާލާ ލޯތްބާ ހަމްދަރުދީ ވާނެ ފަރާތަކަށް އިންތިހާޔަށް ބޭނުންވެފައެވެ. އަހަރެންވަނީ މަހްރޫމްވެފާވައި ލޯތްބަށްޓަކައި އިންތިހާޔަށް ބޭނުންވެފައެވެ. ކައިވެނީގެ ކުރިން އަހަރެން ޝިފާން އަށް އަހަރެންގެ ހަޤީގަތް ހާމަކޮށްދިނީމެވެ. ޝިފާން އަކީ މާލޭގެ ގަދަރުވެރި އާއިލާއަކަށް ނިސްބަތްވާ މީހެކެވެ. ކިޔަވައިގެންހުރި ހަރުދަނާ މީހެކެވެ. އަހަރެން ޝިފާން ކައިރީ ބުނީމެވެ.
ޝިފާން!، އަހަންނަކީ ވަރަށް އާދައިގެ ނިކަމެތިމީހެއް. މައިންބަފައިން ދުނިޔޭގަ ތިއްބަސް އެއީ ނެއްބައެއް. އަހަރެންގެ ވަންނާނެ ތަނެއްވެސް ނުހުންނާނެ. އަދި މިވާހަކައް އަޑުއަހަން ކަނުލާ އިނުމަށް ފަހު ޝިފާން ބުނެލިއެވެ. ސަމާ!، އަހަރެން ސަމާޔާ ކައިވެނިކުރަން މިއުޅެނީ ސަމާގެ ހަޤީގަތް އެނގިހުރެ. އަހަރެން ސަމާގެ ފަރާތުން އެއްވެސްއެއްޗިހިތަކެއް ބޭނުންވެގެނެއްނޫން. އަހަރެން ޝިފާން ގާތު އެދުނީ އެންމެ ކަމަކުއެވެ. އެއީ ދުވަހަކުވެސް އަހަރެންނަށް ދެރަގޮތެއް ނުހެދުމަށެވެ. އަހަރެން އުފަލުގައި ބެހެއްޓުމަށެވެ. އެކަމަށް ޝިފާން އެއްބަސް ވިއެވެ. ޝިފާންގެ މައިންބަފައިން އަހަރުމެންގެ ކައިވެންޏާ ޤަބޫލެއްނޫނެވެ. އެއީ އަހަރެންނަކީ ނިކަމެތި ކުއްޖަކަށްވާތީއެވެ. އެއާއިލާޔާ ކުފޫ ހަމަނުވާތީއެވެ. ނަމަވެސް ޝިފާންގެ ނިންމުމާ ދެކޮޅުނަހަދާން އަހަންނާ އިންނަށް ޤަބޫލްވިއެވެ. ކައިވެންޏަށް ފަހު އަހަރެން އޮފީހުންވެސް ވަކިވީމެވެ. އެއީ އާއިލާއަށް ވަގުތު ހުސްކުރުމަށްޓަކައެވެ. ކައިވެންޏަށްފަހު އަހަރެން އުޅެމުން އައީ ޝިފާންގެ ގޭގައެވެ. ޝިފާންގެ މައިންބަފައިން ގާތުގައެވެ.
އަހަރެން ދެކެނީ ޝިފާންގެ މައިންބަފައިންނަކީވެސް ހަމަ އަހަރެންގެ މައިންބަފައިން ކަމުގައެވެ. އަހަރެން އުންމީދުކޮށްގެންހުރީ އަހަރެންގެ މައިބަފައިންގެ ފަރާތުން އަހަންނަށް ނުލިބުނު ލޯބި ޝިފާންގެ މައިންބަފައިންގެ ފަރާތުން ލިބޭނެކަމަށެވެ. ނަމަވެސް ކަންވީ މުޅިން ދިމާ އިދިކޮޅަށެވެ. އަހަރެން އެގެގައި އުޅުނީ ވަރަށް ހާލުގައެވެ. އަހަންނަށް ކުރެވޭ އެއްވެސް ރަނގަޅުކަމެއް ނޯވެއެވެ. ޝިފާން ނެއްތަންތާނގާ އަހަންނަށް އެއްޗިހިކިއުން ނޫން ކަމެއް ނޯވެއެވެ. މީއަހަންނަށް ހުރި ގޮތްބާވައެވެ. މިއިން އެއްވެސް ކަމެއް ޝިފާންއަކަށް އަހަރެން ނާންގަމެވެ. އެއީ އަހަރެންގެ ކައިވެނި ދެމެހެއްޓުމަށްޓަކައެވެ.
ޝިފާން، ޝިފާންގެ މައިންބަފައިންދެކެ އިންތިހާއަށް ލޯބިވެއެވެ. އެމީހުންގެ ޝަކުވާތަކުގެ އަޑުއަހާކަށް ޝިފާނަކަށް އެހާ ފަސޭހައެއްނުވާނެއެވެ. އެހެންކަމުން އެކަމަށްވެސް އަހަރެން ކެތްތެރިވީމެވެ.ކައިވެންޏަށް ފަސްއަހަރުވީއިރު ލޯބިލޯބި ދެފިރިހެންކުދިން ތިއްބެވެ. ދުވަސްތައްފާއިތުވަމުން ދިޔައެވެ. ޝިފާންގެ ރައްޓެހިންނާއެކީ ރޭގަނޑު ބޭރުގާ އުޅޭވަގުތު ގިނަވާންފެށިއެވެ. ރޭގަނޑު ނިދަން އާންމުކޮށްއަންނަ ގަޑިއަކަށް ނާދެއެވެ. އަހަންނާދޭތެރޭ އެހެންޏާ ބަހައްޓާ ގާތްކަމަށް ބުރޫއަރަންފެށިއެވެ. އެކަމާބެހޭގޮތުން އަހަރެން ޝިފާންއާ ސުވާލުކުރީމެވެ.
ޝިފާން!، މިހާރަކަށް އައިސް ޝިފާންއަށް ވަރަށް ބޮޑު ބަދަލެއް އަންނަ ތަން އެބަފާހަގަކުރެވޭ!. ޖަވާބުގައި ޝިފާން ވަރަށް ހަރުކަށިގޮތަކަށް ބުންޏެވެ. " އަހަރެން ސަމާޔާއެކީ އުޅޭކަށްބޭނުމެއްނޫން. އަހަރެން އުޅޭގޮތާ ކުރާކަންތައްތަކާ ނުބެހޭތި. އެހެންނޫނިއްޔާ ސަމާއަށް ޖެހޭނީ ހުސްއަތާ މިގޭން ނުކުމެގެން ދާން" މީ ޝިފާން އަހަންނާދިމާލަށް ދުވަހަކުވެސް ބުނި އެއްޗެއްނޫނެވެ. އަދި އެދުވަހުގެ ފަހުން އަހަންނާ ވާހަކަދެއްކުންވެސް މަދުކޮށްލިއެވެ. އަހަންނަށް ކުރެވުނު ގޯސްކަމަކީ ކޮބާބާއޭ ހިތަށް އަރައެވެ. ހެނދުނު ބޭރަށް ދާމީހާ މިހާރު ގެއަށް އަންނީ އަހަރެންވެސް ނިދާފަހުންނެވެ. ކުރިން އަހަންނަށް ދެމުން އައި ލޯތްބާއި އަޅާލުން މިހާރު ޝިފާންގެ ފަރާތުން އަހަންނަކަށް ނުލިބެއެވެ.
އެއްދުވަހެއްގެ މެންދުރުފަހެވެ. ވަރުބަލިވެގެން އެނދުގައި ޖައްސާލައިގެން އޮތީމެވެ. ކުއްލިޔަކަށް ވަރަށް ބޮޑަށް އަހަރެންގެބޮލުގާރިއްސަން ފެށިއެވެ. އެހެންޏާ ނުރިއްސާގޮތަކަށެވެ. ހަށިގަނޑުގެ އެކި ތަންތަން ތޮޅެންވެސް ފަށައިފިއެވެ. ހާސްވާގޮތްވާންފަށައިފިއެވެ. އަހަރެން ވަރަށް ބިރުގަތެވެ. ބުނާނީވެސް ވަކި ކާކުކައިރީގަހެއްޔެވެ. މިހާސްކަންމަތީ ހުއްޓާ ފެނުނީ ޝިފާން އައިސް ގެއަށް ވަން މަންޒަރެވެ. ޝިފާން އައިގޮތަށް އައިސް އަހަރެންކައިރިއަށް ހުއްޓުނެވެ.
ސަމާ!، ސަމާތިހިރީ މިނިވަންކޮށްފަ!. ކުރިންވެސް ބުނި ފަދައިން އަހަރެން ދެން ސަމާޔާއެކީ އުޅޭކަށް ބޭނުމެއްނޫން" އެބަސްތަކާއެކީ އަހަންނަށް ހުރެވުނު ތަންވެސް ނޭންގުނެވެ. ގިސްލާރޮވެންފެށިއެވެ. މޮޔައެއްފަދައިން ބިންމައްޗަށްވެއްޓި ހަޅޭއްލަވަން ފެށުނެވެ. ބާރަށް ރޯންފެށުނެވެ. އެއަޑަށް ޝިފާންގެ މަންމައައިސް އަހަރެން އެގޭން ނެރުމަށް ޝިފާން އަށް އެންގިއެވެ. ރޮމުން އަހަރެންގެ ދެދަރިންގައިގައި އަހަރެން އޮޅުލައިގަތީމެވެ. އެކުދިން ވާނީ އުމުރުން 3 އަހަރާ 4 އަހަރެވެ. ޝިފާން މަންމަ އައިސް ކުދިން އަހަންނާ ދުރުކުރިއެވެ. އަދި ކުދިން އަހަރެންއަތުން ގަދަކަމުން އަތުލިއެވެ.
ޝިފާން އަހަރެންގެ އަތުގައި ހިފާ ގަދަކަމުން ދާމާކޫއްތާފާ ގޭން ނެރުނެވެ. އަހަރެންގެ ފުރާނަޔަށްވުރެ ލޯބިވާ ދެދަރިން އަހަންނާ ވަކިކުރިއެވެ. އަބަދުގެ އަބަދަށެވެ. އަހަރެން ގޭން ބޭރުކޮށްލީ އަހަރެންގެ އަންނައުނުތައްވެސް އަތުލުމަށްފަހުއެވެ. ލައިގެންހުރި އެއްޗިހި ފިޔަވާ އިތުރު އެއްޗެއް ނެތެވެ. އަހަރެންގެ ކުށަކީ ކޮބާ ކަމެއް ހުދުއަހަންނަކަށްވެސް ނޭނގެއެވެ. އަހަރެންގޮސް ވަންނާނީ ވަކި ކޮންތާކަށް ހެއްޔެވެ. ގޮތްހުސްވެފާހުރެ ވަކިމިސްރާބެއްނެތި ހިނގަންފެށީމެވެ. މަގުމަތިން އަހަންނާ ބައްދަލުވީ އަހަރެން އުޅުނު އޮފީހުގެ ރަހްމަތްތެރިއެއްކަމަށްވާ މުނާޔާއެވެ. އެވަގުތު އަހަންނަކަށް ވާހަކައެއް ނުދެއްކެއެވެ.
މީހާ ތުރުތުރު އަޅަނީއެވެ. މޫނުމައްޗަށް އަނދިރިވާންފެށިއެވެ. ދެންވީގޮތެއް އަހަންނަކަށް ނޭނގެއެވެ. ހޭވެރިކަންވީއިރު އޮތީ އަހަރެންގެ ރަހްމަތްތެރިޔާގެ ގޭގައެވެ. ކައިރީގައި ފިރުމާލަ ފިރުމާލާ އޭނާ ހުއްޓެވެ. އަހަންނަށްވަނީ ނަފްސާނީގޮތުން ވަރަށްބޮޑަށް އަސަރުކޮށްފައެވެ. ހީހީފަ ރޮވެނީއެވެ. އަހަރެންގެ ރަހްމަތްތެރިޔާ އަހަރެންގޮވައިގެން ސައިކިއެޓްރިކް އަކަށް ދެއްކުމަށް ގެންދިއައެވެ. އަދި ޑޮކްޓރުގެ ލަފާގެ މަތިން އަހަރެންވަނީ އުމުރު ދުވަހަށް ނަފްސާނީ ބައްޔަށް ބޭސްކާންޖެހޭ ބަލިމީހަކަށްވެފައެވެ. އަހަރެން މިހާރު ކޮޅަށް މިހުންނަނީ އަހަރެންގެ އީމާންތެރިކަން ވަރުގަދަކަމުންނެވެ. އަހަރެންގެ ލޯބިވާ ދަރިންވެސް އަހަންނާ ވަކިކުރީއެވެ.
އެދުވަހުގެ ފަހުން އެކުދިންގެ ދެކިލުމަށްވެސް އެގެއަށް ވަނުން މަނަލެވެ. އަހަންނަށް ފަހުން އެގުނުގޮތުގައި އަހަންނާ ޝިފާން ވަކިކުރުމަށް ޝިފާންގެ އާއިލާގެ ފަރާތުން ވަނީ ސިހުރުހަދާފައެވެ. ނަމަވެސް އަހަރެންގެ ހިތް އެމީހުންނަށްޓަކާ ސާފެވެ. އަހަރެންގެ އެކުވެރިޔާގެ އެހީތެރިކަމާއެކު އެގޭގައި މަޑުކުރީމެވެ. އަދި ކުރިންވަޒީފާގައި އުޅުނު އޮފީހުން ވަޒީފާވެސް ﷲގެ އިރާދަފުޅާއެކީ ހަމަޖެހުނެވެ. މިއަދު އެހުރިހާ ހަނދާންތަކާ ވޭނީ ދިރިއުޅުމުން ފިލާވަޅުތަކެއްވެސް ހާސިލްވިއެވެ. ލޯތްބަށްޓަކައި އަހަރެން ކުރި ދަތުރުގެ ނިމުން ކިތަންމެ ހިތިކަމުގައިވީނަމަވެސް، އަހަރެންގެ ދަރީންނަން އެފަދަ ހިތި ތަޖްރިބާއެއް މިންވަރު ނުކުރެއްވުމަށް އެދި ﷲ ހަޞްރަތުގައި އަބަދުވެސް ދުއާދަންނަވަމެވެ.
އަހަރެންނަށް މިއަދު މިވާގިލިބުނީ އަހަރެންގެ ރަހްމަތްތެރިޔާގެ ހެޔޮކަމުންނެވެ. އަހަރެންގެ ބަދުނަސީބު ހަޔާތާއިގެން އަހަރެން ކުރިއަށް ދާން މަސައްކަތްކުރާނަމެވެ. އަދި އީމާންތެރިކަން ވަރުގަދަކޮށް އެފަރާތުން ވާގިއެދުމުގެ މަތީ ފައިތިލަ ސާބިތުކޮށް ކެތްތެރިވާނަމެވެ. އަދި އަހަރެން އަބަދުވެސް އިންތިޒާރުކުރަނީ އަހަރެންގެ ދެކުދިން އެކުދިންގެ މަންނަ ކައިއަށް އަންނާނެދުވަހަކަށެވެ
އެޑިޓަރުގެ ނޯޓް
މީ ދިވެހިރާއްޖޭގެ އަޑުން މިރޯދަމަހު ގެެނެސްދޭ ކުރު ވާހަކަ މުބާރަތަށް ހުށައަޅާފައިވާ ވާހަކަތަކުގެ ތެރެއިން ވާހަކައެކެވެ. މި ވާހަކަ ލިޔެ ހުށައެޅީ މ. ކެރިން ލައިޓް / ޢަބްދުﷲ މަމްދޫހްއެވެ. ރޭޑިއޯއިން މި ވާހަކަ ބްރޯޑްކާސްޓްކޮށްފައިވަނީ 05 ރަމަޟާން 1442 އެވެ.