އަމިއްލައަށް މަރުވެފައި ހުއްޓާ ފެނުނު ޒުވާން ތަރި ސުޝާންތް ސިންގ ރާޖްޕޫތްގެ މައްޗަށް ބިނާކޮށް ހަދާ ފިލްމުތައް ހުއްޓުވާދިނުމަށް އެދި އެނާގެ ބައްޕަ ދިއްލީގެ ހައިކޯޓަށް ހިގައްޖެއެވެ.
މިިދިޔަ އަހަރުގެ ޖޫންމަހުގެ 14 ވަނަދުވަހު ދަންޖެހިގެން ސުޝާންތު މަރުވެފައި ހުއްޓާ ފެނުނީ އެނާ ދިރިއުޅޭ އެޕާޓްމެންޓްގައެވެ. މި މަރާއި ގުޅިގެން މަރުގެ ހަޤީގަތް ހޯދުމަށް އިްނޑީއާގެ ސީބީއައިން އަދިވެސް ގެންދަނީ މަސައްކަތް ކުރަމުންނެވެ. މި މައްސަލާގައި ބައެއް މީހުން ހައްޔަރުކޮށް ސުވާލުވެސް އެ އިދާރާއިން އަންނަނީ ކުރަމުންނެވެ. ދަންޖެހިފައި ހުއްޓާ ސުޝާންތު ފެނުނުނަމަވެސް އޭނާގެ އާއިލާ މީހުންނާއި ގިނަ ބަޔަކު އަދިވެސް ބުނަމުން އަންނަނީ ބަޔަކު މީހުން ސުޝާންތަ މަރާލީކަމަށެވެ.
ސުޝާންތުގެ މަރުގެ ވާހަކަތައް ކަމަށް ބުނެ ބައެއް ފަރާތްތަކުން ފިލްމުތައް ހަދާދޭތީ އެކަން ހުއްޓުވާދުނިމަށް އެދި އެނާގެ ބައްޕަ ކްރިޝްނާ ކިޝޯރު ސިންގ މިވަނީ ދިއްލީގެ ހައިކޯޓާއި ހަމައަށް ގޮސްފައެވެ. ސުޝާންތަ ބައްޕަ ކޯޓަށް ގޮސްފައިމިވަނީ ސުޝާންތުގެ ވާހަކަތަކާއި ތަހުގީގުގެ ވާހަކަތައް ހިމެނޭކަމަށް ބުނެ ތައްޔާރުކުރި " ނިޔާއޭ ދަ ޖަސްޓިސް" ގެ ޓްރެއިލަރވެސް އާއްމުކޮށްފައި ވަނިކޮށެވެ. މީގެއިތުރުން ސުޝާންތްގެ މަރާއި ގުޅިގެން "ސުސައިޑް އޯ މާރޑަރ" ، "އަ ސްޓާރ ވޯޒް ލޮސްޓް" އަދި "ޝަޝަންކް" ގެ ނަމުގައިވެސް ފިލްމެއް އަންނަނީ އުފައްދަމުންނެވެ.
މި މައްސަލާގައި ސުޝާންތެ ބައްޕަ ހައިކޯޓަށް ހުށައެޅި މައްސަލާގައި އެދިފައިވަނީ ސުޝާންތުގެ ޙަޔާތުގެ ވާހަކަތައް ނުވަތަ އޭނާގެ ނަން ބޭނުންކޮށްގެން ހަދާ ހުރިހާ ފިލްމެއް ހެދުން މަނާކޮށްދިނުމަށެވެ. މި މައްސަލާގައި ހައިކޯޓްގެ ފަނޑިޔާރު މަނޯޖް ކުމާރު ވަނީ ފިލްމު ހަދާ ޕްރޮޑިއުސަރުންނަށް ކޯޓް އަމުރެއް ފޮނުވާފައެވެ. ސުޝާންތްގެ ބައްޕަ ކޯޓަށް ހުށައަޅާފައިވާ މައްސަލާގައި އަންނަ މަހުގެ 24 ވަނަދުވަހުގެ ކުރިން ޖަވާބުދާރީވުމަށް ޕްރޮޑިއުސަރުންނަށް ކޯޓު އަމުރުގައި ވަނީ އަންގާފައެވެ.
ސުޝާންތްގެ ނަން ބޭނުންކޮށްގެން ފިލްމު ހަދާތީ އެނާގެ ދައްތަވެސް ވަނީ ކަންބޮޑުވުން ފާޅުކޮށްފައެވެ. ދައްތަ ސްވެތާ ސިންގ ކިރްތީ ބުނީ މީހެއްގެ ޒާތީ ދިރިއުޅުމަކީ އަސާސީ ޙައްގެއްކަމަށެވެ. އަދި އެއީ ވާރުތަވެރިންގެ ހުއްދަނެތި އެއްވެސް މީހަކަށް ނިގުޅައިގަނެވޭނެކަމެއް ނޫންކަމަށެވެ.
ސުޝާންތުގެ ވާހަތަކުގެ މައްޗަށް ތައްޔާރުކުރި " ނިޔާއޭ ދަ ޖަސްޓިސް" ޓްރެއިލަރ އާއްމުކޮށް އަންނަ ޖޫންމަހުގެ 11ވަނަދުވަހު ސިނަމާތަކުގައި ފިލްމު އެޅުވުމަށް ވަނީ ހަމަޖެހިފައެވެ. މި ފިލްމުގައި ސުޝާންތް ރޯލު ކުޅެނީ ޓީވީ އެކްޓަރ ޒުބައިރު ހާންއެވެ. ސުޝާންތެ ލޯބިވެރިޔާ ރިޔާ ޗަކްރަބަތީގެ ރޯލުން މި ފިލްމުގައި ފެންނަނީ ސްރެޔާ ޝްކުލާއެވެ. ކުރީގެ މަޝްހޫރު ބައެއް ތަރިންކަމަށްވާ ޝަކްތީއާއި ކިރަން ކުމާރު ފެނިގެންދާ މި ފިލްމުގެ ޑައިރެކްޓަރަކީ ދިލިޕް ގުލާޓީއެވެ.
ޓީވީ ސިރީޒްތަކުން މަޤުބޫލުކަން ހޯދި ޝުޝާންތު ބޮލީވުޑަށް ތަޢާރަފްވީ އާމިރު ޚާނުގެ ކާމިޔާބު ސުޕަރ ހިޓް ފިލްމު "ޕީކޭ" ގެ ސައިޑް ރޯލަކުންނެވެ. އަދި ބޮލީވުޑްގައި އޭނާ ވިދާލީ އިްނޑީއާގެ ކްރިކެޓް ކެޕްޓަން ދޯނީގެ ބަޔޯގްރަފީ "އެމް އެސް ދޯނީ، ދަ އަންޓޯލްޑް ސްޓޯރީ" އިންނެވެ. މި ފިލްމުގައި ސުޝާންތަ ދޯނީގެ ރޯލު އަދާކޮށްފައިވާ ފުރިހަމަކަމުން ގިނަ ބަޔަކު އޭނާހެ އެކްޓީންނަށް ވަނީ ތައުރީފުކޮށްފައެވެ.