ލޯކަލް ކައުންސިލް އިންތިޚާބުގެ ދެވަނަ ބުރު އޮންނަނީ މެއިމަހުގެ 1 ވަނަ ދުވަހާއި ޖޫންމަހުގެ 5 ވަނަ ދުވަހުކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އިލެކްޝަންސް ކޮމިޝަނުން ވިދާޅުވީ އަންނަ މެއި މަހުގެ 1 ވަނަ ދުވަހާއި ޖޫންމަހުގެ 5 ވަނަ ދުވަހުވެސް އިންތިޚާބުތަކެއް އޮންނާނެކަމަށެވެ.
އެކޮމިޝަނުން ބޭއްވި ނޫސްވެރިންގެ ބައްދަލުކުރެއްވުމުގައި ވާހަކަފުޅުދައްކަވަމުން އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ ނަތީޖާ އެއްވަރުވުމާއި ގުޅިގެން އަދި ޝަކުވާތަކާއި ގުޅިގެން ބައެއް ދާއިރާތަކުގައި އިންތިޚާބު އަލުން ބޭއްވުމަށް ނިންމާފައިވާކަމަށެވެ. އެގޮތުން މި އިންތިޚާބު ބޭއްވުމަށް އިލެކްޝަންސް ކޮމިޝަނުން ނިންމަވާފައިވަނީ އަންނަ މޭއި މަހުގެ އެއްވަނަ ދުވަސްކަމަށް ޝަރީފް ވިދާޅުވިއެވެ.
މިމުއްދަތުގެ ތެރޭގައި ކައުންސިލް މެމްބަރުންގެ ނަތީޖާ އެއްވަރުވެގެން 4 ރަށެއްގައި އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެމްބަރުންގެ ތެރެއިން ނަތީޖާ އެއްވަރުވެގެން 6 ރަށެއްގައި އަލުން އިންތިޚާބު ބޭއްވުމަށް ވަނީ ހަމަޖެހިފައެވެ. މީގެއިތުރުން ޝަކުވާތަކާއި ގުޅިގެންވެސް 3 ދާއިރާއެއްގައި އަލުން އިންތިޚާބު ބޭއްވުމަށް ވަނީ ހަމަޖެހިފައެވެ.
އަލުން އިންތިޚާބު ބޭއްވުމަށް ހަމެޖހިފައިވާ ދާއިރާތަކުގެތެރޭގައި:
ހއ.ތަކަންދޫ އަންހެނުންގެ ޚާއްސަ ގޮނޑިއަށް
ބ.ކިހާދޫ ކައުންސިލް މެމްބަރުކަމަށް
މ.ރަތްމަންދޫ ކައުންސިލް ރައިސްކަމަށް
ފ.ދަރަނބޫދޫ އަންހެނުންގެ ޚާއްސަ ޑޮނޑިއަށް
ލ.މާވާސު ކައުންސިލް ރައިސްކަމަށް
ލ.މާވަށު ކައުންސިލް މެމްބަރުކަމަށް
ތ.ގާދިއްފުށި އަންހެނުންގެ ޚާއްސަ ގޮނޑިއަށް
އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ ދެވަނަ ބުރު ބޭއްވުމަށް ހަމަޖެހިފައިވަނީ:
ހއ.އުލިގަމު
ނ.މަގޫދޫ
ރ.މާކުރަތު
ބ.ކެންދޫ
ވ.ފުލިދޫ
ލ.ކަލައިދޫ
އިންތިޚާބުގައި އެއްވެސް ފަރާތަކުން ވާދަނުކުރާތީ ބައެއް ދާއިރާތަކުގައި އިންތިޚާބަށް އަލުން ހުޅުވާލުމަށްވެސް އިލެކްޝަންސް ކޮމިޝަނުން ވަނީ ނިންމަވާފައެވެ. އެގޮތުން އަންނަ ޖޫން މަހުގެ 5 ވަނަ ދުވަހު މިދާއިރާތަކުގެ އިންތިޚާބު ބޭއްވުމަށް އީސީން ވަނީ މިހާރު ކަނޑައަޅުއްވާފައެވެ. މިގޮތުން އަލުން އިންތިޚާބަށް ހުޅުވާލަނީ އަންހެނުންގެ ތަރައްޤީއަށް މަސައްކަތްކުރާ
ކޮމިޓީތަކުގެތެރެއިން :
ހދ.ނޮޅިވަރަން
ހދ.ނޭކުރެންދޫ
ބ.ފުޅާދޫ
ކ.ދިއްފުށި
އއ.ފެލިދޫ
ވ.ރަކީދޫ
މ.ރަތްމަންދޫ
އަލުން އިންތިޚާބު ބޭއްވުމަށް ބައެއް ދާއިރާތަކުގައި ނިންމާފައިވަނީ ޝަކުވާތަކުގެ ސަބަބުންނެވެ. މީގެތެރޭގައި އިންތިޚާނުގެ ނަތީޖާއަށް ބަދަލުތަކެއް އަތުވެދާނެފަދަ ކަންކަން ހުރުމާއެކު އެފަދަ ދާއިރާތަކުގައި އަލުން އިންތިޚާބު ބޭއްވުމުގެ މަސައްކަތް މިހާރު ފަށާފައިވާކަމަށް އިލެކްޝަންސް ކޮމިޝަނުން ވިދާޅުވެއެވެ.
މިއިންތިޚާބުގައި މިހާތަނަށް ކައުންސިލްތަކުގެ 975 މަޤާމަކަށް މީހުން އިންތިޚާބުވެފައިވާއިރު އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް 905 ފަރާތެއްވެސް ވަނީ މިހާތަނަށް އިންތިޚާބުވެފައެވެ. މިއީ މިހަތަނަށް ރާއްޖޭގައި ބޭއްވި އެންމެ ބޮޑު އިންތިޚާބުކަމަށް އިލެކްޝަންސްއިން ވިދާޅުވެއެވެ. އަދި ވޯޓުލުމުގެ ޙައްގު ލިބިފައިވާ މީހުންގެ ތެރެއިން މިއިންތިޚާބުގައި ވޯޓުލާފައިވަނީ 68.19 އިންސައްތަ މީހުންނެވެ.