ފަލަސްޠީނާއި އިސްރާއީލުގެ ޤާނުނު ހަދާ މަޖިލީހުގައި ތަޤުރީރުކުރުމުގެ ދަޢުވަތު ރައްޔިތުން މަޖިލީހުގެ ރައީސް މުހައްމަދު ނަޝީދަށް ލިބިވަޑައިގެންފިއެވެ. މިކަން އެމަނިކުފާނު ހާމަކުރެއްވީ މިއަދުގެ ރައްޔިތުން މަޖިލީހުގެ ޖަލްސާގައެވެ.
ރައީސް ނަޝީދު ވިދާޅުވީ، މިދަޢުވަތު ލިބުނު ނަމަވެސް މިކަމާއި ގުޅިގެން އެމަނިކުފާނު އަދި ވަކިގޮތެއް ނިންމަވާފައިނުވާކަމަށެވެ. އަދި މިފަދަ ކަމަކަށް ދައުވަތު ލިބުމުން އެކަމުގެ މައުލޫމާތު ގިނަ ބަޔަކާ ހިއްސާކޮށް ޚިޔާލު ހޯއްދަވަން ބޭނުންފުޅުވާކަމަށެވެ.
ރައީސް ނަޝީދު ވިދާޅުވީ ފަލަސްޠީން ރައްޔިތުންނަށް އެއްވެސް ގޮތަކުން އެހީތެރިކަމެއް ފޯރުކޮށްދެވެން އޮތްނަމަ އެގޮތް ދިވެހިން ބޭނުންވާނެކަމަށާއި، އެމަނިކުފާނުވެސް ވިސްނަވަނީ އެގޮތަށްކަމަށެވެ.
"ފަލަސްތީނު ރައްޔިތުންގެ މިނިވަންކަމާއި، އެރައްޔިތުންނަށް ދަޢުލަތެއް ޙައްޤުކަން އެއީ އެއްވެސް ހާލަތެއްގައި އަޅުގަނޑަށް ޔަޤީން ކަށަވަރު، މިމަޖިލީހުގެ އެއްވެސް މެންބަރަކު އެކަމާ އިންކާރު ކުރާނެކަމެއްނޫން. އަޅުގަނޑުމެންނަށް ފަލަސްޠީނު ރައްޔިތުންނަށް އެހީތެރިކަމެއް ދެވެން އެެއްވެސް މިންވަރަކަށްވާނަމަ އެއީ ދިވެހިން އަބަދުވެސް އެދޭނެކަމެއް" ރައީސް ނަޝީދު ވިދާޅުވިއެވެ.
މިފަދަ މަޢުޟޫތަކުގައިވެސް ރައްޔިތުންގެ މެދުގައި ފާޅުކުރާ ޚިޔާލުތައް މުހިއްމުކަމަށާއި މިފަދަ ކަންކަމުގައި އަމަލުކުރަން ޖެހޭނީ ހުރިހާ އެންމެން ހިތްހަމަޖެހޭ ގޮތެއް ހޯދައިގެންކަމަށްވެސް ނަޝީދު ވިދާޅުވިއެވެ.
އެތައް އަހަރެއް ވަންދެން ނިގުޅައިގަނެފައިވާ ފަލަސްޠީނު ރައްޔިތުންގެ ޙައްޤުތައް އަނބުރައި ހޯދައިދެވޭނީ އދ. އިން ކަނޑައަޅާފައިވާ ގޮތަށް ފަލަސްޠީނުގެ މިނިވަން ދަޢުލަތެއް ޤާއިމުކުރެވިގެންކަން ފާހަގަކޮށް ބައިނަލް އަޤުވާމީ މައިދާނުގައި ރާއްޖެއިން އަބަދުވެސްދަނީ އެކަމަށް ތަކުރާރުކޮށް ވަކާލާތުކުރަމުންނެވެ.
ދިވެހި ސަރުކާރާއި ރައްޔިތުންގެ ފަރާތުން ފަލަސްޠީނުގެ ރައްޔިތުންނަށް އޮތް ތާޢީދު ދެގޮތެއް ނުވެ އެގޮތުގައި ދެމިއޮންނާނެކަން ސަރުކާރުން ވަނީ ހާމަކުރައްވާފައެވެ.