ސިއްޙީ ކުއްލި ނުރައްކަލުގެ ހާލަތު އިޢުލާންކުރާގޮތް އޮންނަ އުސޫލު އިސްލާހު ނުކުރަން ރައްޔިތުންގެ މަޖިލީހުން ފާސްކޮށްފިއެވެ.
ފުވައްމުލަކު އުތުރު ދާއިރާގެ މެންބަރު މުޙައްމަދު ރަޝީދު، މަޖިލީހަށް ހުށަހެޅުއްވި ޢާންމު ސިއްޙަތު ރައްކާތެރިކުރުމުގެ ޤާނޫނަށް އިޞްލާޙު ގެނައުމުގެ ބިލު، މަޖިލީހުގެ ޖުޑީޝިއަރީ ކޮމިޓީން ދިރާސާކޮށް ފާސްކުރި ރިޕޯޓުގައިވާގޮތުން ދިވެހިރާއްޖޭގެ ހުރިހާ ސަރަޙައްދެއްގައި ނުވަތަ ކަނޑައެޅޭ ވަކި ސަރަޙައްދުތަކެއްގައި، ޢާންމު ޞިއްޙަތުގެ ކުއްލި ނުރައްކަލުގެ ޙާލަތު އިޢުލާނުކުރުމުގެ ބާރު ލިބިގެން ވަނީ ރައީސުލްޖުމްހޫރިއްޔާއަށެވެ.
އާއްމު ސިއްހަތުގެ ޤާނޫނުގައި މިހާރު އޮންނަ ގޮތުން ސިއްހީ ކުއްލި ނުރައްކަލުގެ ހާލަތު ކަނޑައަޅަނީ ޑިރެކްޓާ ޖެނެރަލް އޮފް ޕަބްލިކް ހެލްތުގެ ލަފާގެ މަތިން ހެލްތު މިނިސްޓަރެވެ. އަދި ރައްޔިތުންގެ މަޖިލީހުން އެޤަރާރު ފާސް ކުރާކަށްވެސް ނުޖެހެއެވެ.
މިއާއެކު ކޯވިޑް-19އާ ގުޅިގެން ޑިރެކްޓަރ ޖެނަރަލް އޮފް ޕަލްލިކް ހެލްތުގެ ލަފައާ އެއްގޮތަށް ހެލްތް މިނިސްޓަރަށް ސިއްޙީ ކުއްލި ނުރައްކަލުގެ ހާލަތު އިއުލާންކުރުމުގެ ބާރު ލިބިދީފައިވާތީ ސަރުކާރު ހިންގާ މައި ޕާޓީ އެމްޑީޕީ ތަމްސީލުކުރާ މަޖިލީގެ ބައެއް މެންބަރުން ގެންދެވީ ކަންބޮޑުވުން ފާޅުކޮށް އެގޮތަށް އޮންނަ އޮތުން ބަދަލުކުރަން ގޮވާލައްވާފައެވެ. އަދި ކަމާގުޅޭ ޤާނޫނު އިސްލާޙުކުރުމަށް މަޖިލީހަށް ހުށައެޅި އިސްލާހާއެކު ސިއްޙީ ކުއްލި ނުރައްކަލުގެ ހާލަތު އިޢުލާން ކުރުމުގެ ބާރު ރައީސުލްޖުމްހޫރިއްޔާއަށް ދީ، މަޖިލީހުން އެކަމަށް ރުހުން ދޭގޮތަށް ޤާނޫނަށް ބަދަލު ގެންނަން ކޮމިޓީން ފާސްކުރިއެވެ.
ނަމަވެސް މިކަމާއި ގުޅޭގޮތުން މަޖިލީހުގެ ތަޅުމުން ގޮތެއް ނިންމުމަށް ކޮމިޓީ ރިޕޯޓަށް ބަހުސްކުރުމަށް ހުޅުވާލި ފުރުސަތުގައި އެމްޑީޕީއަށް ނިސްބަތްވާ ފުނަދޫ ދާއިރާގެ މެމްބަރު މުޙައްމަދު ޝާހިދު ވިދާޅުވީ އާއްމު ސިއްޙަތުގެ ކުއްލި ނުރައްކަލުގެ ހާލަތަކީ ޤާނޫނު އަސާސީއަށް ބަދަލުގެނައުން މަނާކޮށްފައިވާ ހާލަތެއް ކަމަށް ބެލެވެން ނެތްކަން މިދިޔަ އަހަރު ސުޕްރީމް ކޯޓުން ދިން އިސްތިރާޝީ ލަފާގައި ސާފުކޮށް ބުނެފައިވާކަމަށެވެ. އެހެންކަމުން މިހާރުވެސް ޤާނޫނުގައި ސިއްޙީ ކުއްލި ނުރައްކަލުގެ ޙާލަތު އިއުލާންކުރުމުގެ ކަންކަން އޮތް ގޮތަށް ބޭއްވުމަށާއި، މަޖިލީހަށް ހުށައަޅައި ކޮމިޓީން ފާސްކޮށްފައިވާ ބިލުގެ 33 ވަނަ މާއްދާ އާއި 34 ވަނަ މާއްދާ އުނިކުރުމަށް އޭނާ ހުށަހެޅުއްވިއެވެ.
މިހުށައެޅުންތަކާއި، މަޖިލީހުގައި ކުރެވުނު ބަހުސްތަކަށްފަހު ބިލް ފާސްވީ ސިއްޙީ ކުއްލި ނުރައްކަލުގެ ހާލަތު އުވާލުމުގެ ބާރު މަޖިލީހަށް ދޭން، ނުފެންކަމަށެވެ. މިގޮތަށް ފާސްވީ ވޯޓުގައި ބައިވެރިވި 39 މެންބަރުންގެ ވޯޓުންނެވެ. އަދި އެބާރުތައް މަޖިލީހަށް ލިބޭގޮތަށް ނުވަތަ ހުށައެޅި އިސްލާޙުތަކާއެކު ބިލް ފާސްނުކުރުމަށް 29 މެންބަރުން ވޯޓުދިނެވެ.