ރާއްޖެއަށް އެންމެ ބޮޑު އާމްދަނީއެއް ލިބޭ ފަތުރުވެރިކަމުގެ ދާއިރާގައި ހަރަކާތްތެރިވާ މުވައްޒަފުން ކަންބޮޑުވާ އެތައް ކަންތައްތަކެއް ހައްލުނުވެހުންނަކަން އެމުވައްޒަފުންނާއި އެމުވައްޒަފުން ތަމްސީލްކުރާ ފަރާތްތަކުން އަބަދުވެސް ފާހަގަކުރަމުންދެއެވެ. އޭގެ ތެރެއިންވެސް އެންމެ ގިނަ ދުވަސްވަންދެން ހައްލުނުލިބިވާ އެއްކަމަކީ ރިސޯޓުތަކުން "ސަރވިސްޗާޖް" ދިނުމުގައި ހުންނަ މައްސަލަތަކެވެ.
މަދު ރިސޯޓްތަކުން މުވައްޒަފުންނަށް ހައްޤުވާ މިންވަރަށް "ސަރވިސް ޗާޖް" ދެމުންދިޔަނަމަވެސް ރާއްޖޭގައި ހިންގާ އެތައް ރިސޯޓުތަކެއްގައި "ސަރވިސް ޗާޖް" ނުދިނުމާއި، ދިނުން ލަސްކުރުމުގެ އިތުރުން އެކަމުގައި ތަފާތުކުރުން ގެންގުޅޭކަމުގެ އަޑުއަބަދުވެސް އިވެމުންދެއެވެ.
މިކަން ހައްލުކުރުމަށްޓކައި އެކި ފަހަރު މަތިން މަސައްކަތް ކުރެވުނު ނަމަވެސް އެކަމަށް ޤާނޫނީ ގޮތުން ގެންނަންޖެހޭ ހައްލުތަކާއި ޤާނޫނުގައިވާ ގޮތަށް އެކަން ތަންފީޒުކުރެވިފައި ނުވުމަކީ ދާދިފަހަކާޖެހެންދެން ފެންނަން އޮތް ހަޤީގަތެކެވެ.
"ސަރވިސް ޗާޖު"ގެ މައްސަލައާއި އެނޫންވެސް ރިސޯޓު މުވައްޒަފުން ތަހައްމަލް ކުރަމުންދިޔަ މައްސަލަތަކަށް ހައްލު ގެނައުމުގެ މަސައްކަތް މިއަދުގެ ސަރުކާރުން ވެރިކަމާ ހަވާލުވި ހިސާބުން ފެށިއެވެ. އެގޮތުން ކުރެވުނު މަސައްކަތުން ރައީސް އިބްރާހިމް މުޙައްމަދު ޞާލިހުގެ ސަރުކާރުން ވަޒީފާއާއިބެހޭ ޤާނޫނަށް އިޞްލާޙު ގެނެސް "ސަރވިސް ޗާޖު"ގެ މައްސަލައަށް ރަސްމީ ހައްލެއްވަނީ ގެނެސްދެއްވާފައެވެ. މިހާރު މިވަނީ މުވައްޒަފުންނަށް ސަރވިސް ޗާޖު ދޭންޖެހޭ އުސޫލުތައް ތަފްސީލީ ގޮތެއްގައި އެ ޤަވާއިދުގައި ހިމަނައި އެއަށް އަމަލުކުރަން ފަށާފައެވެ.
"ސަރވިސް ޗާޖާ ބެހޭ ގަވާއިދަށް" އަމަލުކުރަން ފެށުމުން، ރިޒޯޓުތަކުގައި މަސައްކަތްކުރާ މުވައްޒަފުންނަށް ހައްގުވާ މިންވަރު ކަށަވަރު ވެގެންދެއެވެ. މީގެ ދަށުން ވަޒީފާ ދޭ ފަރާތުގެ ޚިދުމަތެއް ދިނުމުގައި ސީދާގޮތުންނާއި ނުސީދާ ގޮތުން ބައިވެރިވާ ހުރިހާ މުވައްޒަފުންނަށް ހަމަހަމައަށް ސަރވިސްޗާޖް ހައްޤުވާނެއެވެ.
"ސަރވިސްޗާޖު"ގެ ގޮތުގައި ވަޒީފާ ދޭ ފަރާތަށް ކޮންމެ މަހަކު ލިބޭ ފައިސާގެ ޖުމުލަ އަދަދުގެ %9 މުވައްޒަފުންނަށް ލިބޭނެއެވެ.
ސަރވިސް ޗާޖުގެ ގޮތުގައި ވަޒީފާދޭ ފަރާތަށް ކޮންމެ މަހަކު ލިބޭ ފައިސާގެ ޖުމްލަ އަދަދުގެ ތެރެއިން އިދާރީ ފީއެއްގެ ގޮތުގައި ގިނަވެގެން ނެގޭނީ %1 ކަމަށްވެސް ޤާނޫނުގައި ވަނީ ކަނޑައަޅާފައެވެ. އެހެންކަމުން ސަރވިސް ޗާޖުގެ ގޮތުގައި ނަގާ އަދަދުގެ ހައްޤު މިންވަރު މުވައްޒަފުންނަށް ލިބޭނެކަމުގެ ޔަޤީންކަން ޤާނޫނާއެކު ވަނީ ލިބިގެންގޮސްފައެވެ.
ސަރވިސް ޗާޖު ހިސާބުކުރުމުގައި މުވައްޒަފު ޚިދުމަތްކުރި ދުވަސްތައް ކަނޑައެޅުމުގައި ވަޒީފާއާއިބެހޭ ޤާނޫނުގެ ދަށުން މުސާރަ ލިބޭގޮތަށް މުވައްޒަފަށް ޙައްޤުވާ އެކިއެކި ޗުއްޓީތަކުގެ ދުވަސްތަކާއި އަރާމުކުރުމަށް މުވައްޒަފަށް ހައްޤުވާ ދުވަސްތައް އުނިކޮށްގެން ނުވާނެކަމަށް މި ޤަވާއިދުގައި ވަނީ ކަނޑައަޅާފައެވެ. އެހެންކަމުން މިހާރު ޗުއްޓީގައި ހުންނަ މުވައްޒަފުންނަށްވެސް ޗުއްޓީގައި ހުންނަ މުއްދަތުގައި ސަރވިސް ޗާޖު ލިބޭނެއެވެ.
ސަރވިސް ޗާޖު ނުދީފިނަމަ ނުވަތަ ޤަވާއިދު ބުނާގޮތުން މުވައްޒަފުންގެ މެދުގައި ސަރވިސް ޗާޖް ބެހުމުގައި، މި ގަވާއިދާ ޚިލާފުވެއްޖެނަމަ، ވިޔަފާރީގެ ކުޑަ ބޮޑު މިނަށް ބަލައި، އެއްލައްކަ ރުފިޔާއަށްވުރެ ބޮޑުނޫން އަދަދަކުން ޖޫރިމަނާ ކުރެވޭނެއެވެ.
ސަރވިސް ޗާޖަކީ ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންގެ ބުރަ މަސައްކަތުން އެމީހުން ހޯދާ އެއްޗެކެވެ. ނަމަވެސް ބައެއް ފަހަރު ސަރވިސް ޗާޖު ނުހައްޤު ގޮތުގައި އެހެން ފަރާތްތަކުން ދަނީ ބޭނުންކުރަމުންނެވެ. މި ޤަވާއިދާއެކު މުވައްޒަފުންނަށް ސަރވިސް ޗާޖު ލިބޭނެކަމުގެ ޔަޤީންކަން ވަނީ ކަށަވަރުވެ، ޔަޤީންވެފައެވެ.