2003 ވަނަ އަހަރުން ފެށިގެން ޓެލެ ޕިކްޗާރސްއިން ޕްރޮޑިއުސްކޮށް ބެލުންތެރިންގެ މަޤުބޫލުކަން ހޯދާފައިވާ އެމެރިކާގެ ކޮމެޑީ ޓޯކް ޝޯ "ދަ އެލެން ޑީ ޖެނެރސް ޝޯ" ހުއްޓާލަން ނިންމައިފިއެވެ. އެލެން އިންޓަރވިއުއެއްގައި ބުނީ 19 ސީޒަނަށްފަހު ޝޯ ހުއްޓާލަން ނިންމި ސަބަބަކީ އޭނާގެ ހިތް އެގޮތަށް ބުނުމުންކަމަށެވެ. އަދި އޭނާ އަބަދުވެސް ހިތް ބުނާގޮތަށް އިތުބާރު ކުރާކަމުގައި އެލެން ވަނީ ބުނެފައެވެ.
3000ށް ވުރެ ގިނަ ޝޯ ގެނެސްދީފައިވާ މި ޝޯ ވަނީ 171 ޑޭޓައިމް އެމީ އެވޯޑާއި 61 އެމީ އެވޯޑް ހޯދާފައެވެ. މީގެ އިތުރުން 61 އެމީ އެވޯޑްގެ ތެރޭގައި "ދަ އޮޕެރާ ވިންފެރީ ޝޯ" ވެސް ފަހަތަށް ޖައްސާލުމަށްފަހު އައުޓްސްޓޭންޑިން ޓޯކް ޝޯގެ އެވޯޑް 4 ފަހަރަށް، އައުޓް ސްޓޭންޑިން ޓޯކް ޝޯ އެންޓަރޓެއިންމަންޓްގެ އެވޯޑް 7 ފަހަރަށް އެލެންގެ ޝޯ ވަނީ ހޯދާފައެވެ. ޝޯގެ 18 ވަނަ ސީޒަން ޕްރިމިއަރ ކޮށްފައިވަނީ މިދިޔަ އަހަރުގެ ސެޕްޓެމްބަރު މަހުއެވެ. ކޮމެޑީ އާއި މިޔުޒިކް އަދި އެކި ކަހަލަ ފަންނާނުން ގެނެސްދޭ މި ޝޯގައި ބައިވެރިންނަށް ތަފާތު އިނާމުތައް ލިބޭ ކުޅިވަރުތައްވެސް ހުޅުވާލައެވެ.
މުވައްޒަފުންލައްވާ ގަދަކަމުން މަސައްކަތްކުރުވުމާއި މުވައްޒަފުންނަށް ޖެއްސުންކުރާކަމަށް ބުނެ މިދިޔަ އަހަރު މި ޝޯއަށް ވަނީ ވަރަށްގިނަ ފާޑުކިޔުންތަކެއްވެސް އަމާޒުވެފައެވެ. މި މައްސަލައިގައި އެލެން ވަނީ މުވަޒަފުންގެ ކިބައިން މައާފަށްވެސް އެދިފައެވެ.
63 އަހަރުގެ އެލެން އަކީ އެމެރިކާގެ ކޮމެޑީއަން، ޓީވީ ހޯސްޓް އަދި ލިޔުންތެރިއެއްވެސްމެއެވެ. ޝޯތައް ހޯސްޓްކޮށްދިނުމުގެ އިތުރުން އެލެންވަނީ އެކަޑަމީ އެވޯޑްސް، ގްރެމީ އެވޯޑްސް އަދި ޕްރައިމް ޓައިމް އެމީސް ފަދަ އެވޯޑްތައްވެސް ހުށަހަޅާދީފައެވެ.