ރަށާ ދިމާއަށް ދޯނި ދަތުރުކުރަމުން ދިޔައިރު ޔާނިއުގެ މޭ ދިއައީ ބާރަށް ތެޅެމުންނެވެ. ހިތްއަވަސްވެފައި އިން ޔާނިއުގެ
މޫނުމަތިން ފެންނަނީ އުފާވެރިކަމުގެ ހިނިތުންވުމެކެވެ. ދޯންޏަށް އެރީންސުރެ އެ ހިނުތުން ވުން އެ މޫނަކުން ނުވެއް ފިލައެވެ. އެތަށް ދުވަހެއްގެ އިންތިޒާރަށް ނިމުން އަންނަ ކަމުގެ އިޙުސާސް ޔާނިއުއަށް ކުރެވޭކަހަލައެވެ. ބައެއްފަހަރަށް ލޯމަރާލައެވެ. ހިނިތުންވެލައެވެ. ލަދުން އިސްޖަހާލައެވެ. މި އިނދެވެނީ މާސިންގާ ކަނޑުގެ މެދުގައިކަންވެސް ޔާނިއުއަށް އިޙުސާސް ނުވާކަހަލައެވެ. އޭނާގެ ހިތަށް ތަފާތު އިހުސާސުތަށް ޖަމާވަމުން ދިއައެވެ. އެ އިހުސާސުތަށް އޭނާގެ ހަރަކާތަކުން ވެސް ދިއައީ ފެންނަމުންނެވެ. ވާނީވެސް އެހެންތާއެވެ. އޭނާ ރަށުން ފުރީ އެނބުރި ރަށަށް ދެވޭނެ ކަމުގެ ކަމުގެ އުންމީދެއްނެތް ހިތަކައިގެންނެވެ. އެންމެ ލޯބިވާ ނައުރާގެ ހިތުގައި ޖައްސާ ރޮއްވާފައެވެ.
ނައުރާ އާއި ޔާނިއު އަކީ ރަށުގައި ނަން ކިޔާލެވޭ ދެ ލޯބިވެރިންނެވެ. ކުޑަކުޑަ އިރު އުފެދުނު
ރަޙްމަތްތެރި ކަން ލޯތްބަށް ބަދަލުވީ ކޮންއިރަކު ކަމެއްވެސް އެ ދެމީހުންނަށް ނޭނގެއެވެ. އެނގޭހާ ވެސް ކަމަކީ ހިތްހަމަޖެހުމާ އުފާތަށްވަނީ އެކަކު އަނެއްކަކާ އެކުކަމެވެ. ދެ ހިތުގައި ޖަހަނީ އެއްވިންދެއްކަމެވެ. ދެ ހަށިގަނޑެއްކަމަކު އެއް ފުރާނެއް ކަމެވެ.
ނައުރާ އަކީ ދާ ކޮންމެ ތަނަކަށް ބަޙާރު ގެނުވާފަދަ މަޖާ މިޒާޖެއްގެ ކުއްޖެކެވެ. ކުލަފަތި ހަށިގަނޑެކެވެ. އެތަށް ބައެއްގެ އެތަށް ހުށެއެޅުންތަކެއް ލިބެމުންދިއަ މޫނެކެވެ. އެތަށް ބައެއް އެދިއެދި ހުރީ ނައުރާ އެމީހުންގެ ހަޔާތާއި ގުޅުވާށެވެ. ބޭނުމަކަށް ވެފައި އޮތީ ނައުރާގެ ހިތް ފަތަހަ ކުރުމެވެ. ނަމަވެސް މިއިން ކޮންމެ ހުށައެޅުމަކަށް ނައުރާ ދެނީ ފުރަގަހެވެ. ސާފު ބަހުން ކުރަނީ އިންކާރެވެ. ނޭގިނަމަވެސް ޔާނިއުގެ ލޯބީގައި ނައުރާގެ ހިތްވަނީ ބަނދެވިފައެވެ. ނައުރާގެ ހިތުގައި ބިންވަޅު ކަނޑާ ނެގިފައި ވަނީ ޔާނިއުގެ ނަމެވެ. އެހިތުގައި އެހެން މީހަކަށް ދޭނެ ލޯތްބެއް ނެތެވެ. ނައުރާގެ ހިތާ ފުރާނައިގެ މިލްކުވެރިޔަކީ ޔާނިއުއެވެ. ޔާނިއުގެ ޅަހިތް ވެސް އިންތިޒާރު ކުރީ ހަމަ އެމަލަށެވެ. އެމަލުގެ ލައްޒަތު އެދިއެދި ހުރިނަމަ ވެސް އެކަން އޮތީ ޔާނިއުގެ ހިތުގައި ސިއްރުކުރެވިފައެވެ.
ލޯބި ހާމަ ނުކުރި ނަމަވެސް ޔާނިއު އެކި ގޮތްގޮތަށް ދޭ ސިގްނަލް ތަކުގެ މާނަ ކިތައްމެ ރަނގަޅަކަށްވެސް ނައުރާ އަށް ތަރުޖަމާ ކުރަން އެގެއެވެ. ހަމަ އެކަނި އެކަކު އަނެއްކެއްގެ ދުލުން އެވާހަކަ ނުބުނާކަމެވެ. އެ ދެމެދުގައި އޮތް ގުޅުން ރަހުމަތްތެރިކަމުގެ ނަމުން ލޯތްބަށް ބަދަލުނުވެ އޮތް ހަމައެކަނި ސަބަބީ ދެ މީހުންގެ ވެސް އެ ހަނު ހުރުމެވެ. އެ ހަނު ހުރުމުގެ ފަހަތުގައި ވާ ސިއްތަކީ ޔާނިއުއާއި ނައުރާގެ ދުވަސްވީ އެކުވެރިކަމެވެ. އެކުވެރިކަމުގެ ހައްޤުގައި ދެމީހުން ވެސް އިންތިހާ އަށް ލޯބިވިކަމުގައި ވިޔަސް ދުލަށް އެވާހަކަ ގެންނަށް ބޭނުންނެ ނުވިއެވެ.
ޔާނިއުއާއި ނައުރާގެ ލޯބި އެކަކު އަނެކެއްގެ ކުރިމަތީގައި ޅުވާލައިދީ، ހިތުގައި އެކަކު އަނެއްކަކަށްވާ ލޯބި ވިސްނައިދިނީ އިއާންއެވެ.
އިއާންއަކީ މިދެކުދިންގެ ވެސް އެންމެގާތް އެކުވެރިޔާއެވެ. ސިއްރުތަށް ރައްކާކޮއްދޭ ބައިވެރިޔާއެވެ. ޔާނިއުގެ 18ވަނަ އުފަންދުވަހު އެ ހާމަކުރަން މަޖްބޫރުވީ އިއާންގެ ސަބަބުންނެވެ.
އެރެއަށްފަހު ދެކުދިންގެ ފޮނިފޮނި އުންމީދުތަށް ހާޞިލްވީއެވެ. ދެ ހިތަށްވެސް ލުއިވެގެން ދިޔައެވެ. ހިތުގައި އޮތް ލޯބި އެކަކު އަނެއްކަކުގެ ކަންފަތާ ހަމައަށް ފޯރުކޮށްދެވުން ލަސްކުރެވުނު މޮޔަ ހިތަށްވެސް އަރާފައިއެވެ. ދެމީހުން ވެސް ބުނަމުން ދިއައީ ކުރިން ބުނެވުނު ނަމަ ކިހާ ރަނގަޅުވީސް ހެއްޔެވެ.
ޔާނިއުގެ އުނގުގާ އިދެ ހިތްފުރެންދެން ކޮންމެރެއަކު ނައުރާ ވާހަކަދައްކައެވެ. ނައުރާ ފެންނަ ކޮންމެ ތަނަކުން ޔާނިއުގެ ކަތިނަޒަރުން ނައުރާގެ ހިތް ތޮރުފައެވެ. ދެމީހުން ވަކިވާ އެއްވެސް ވަގުތެއްނާދެވެ. ކޮންމެ ދުވަހަކު އެތަށް ފަހަރަކު ބައްދަލުވެއެވެ. އެތަށް ފޯންކޯލެއް ބަދަލު ކުރެވެއެވެ. އެތަށްހާސް މެސެޖުތަކަކުން އިންބޮކްސް ފުރާލައެވެ. ނިދީގައި އެތަށްފޮނި ހުވަފެންތަކަކުން ހިތްފުރާލައެވެ. ޙަބަރެއްނުވެ އިރުކޮޅެއް ވެލިޔަސް ހިތްނުތަނަވަސްވެ، ހާސްވާގޮތްވެއެވެ. އަބަދުވެސް ދެމީހުން އެކަކު އަނެއްކަކު ކާރީގައި ނެތް ނަމަ ހިތްހަމަ ޖެހުމެއް ނުލިބެއެވެ. ބައްދަލުވެއްޖެ ނަމަ ހިތްފުރި ބަންޑުންދާވަރަށް އެތަށް ސަމާސާއެއްކުރެއެވެ. ބަޔަކު އެންމެން ތެރެއިން ބަދަލުވިޔަސް ސިއްރު ސިއްރުން ޔާނިއުގެ މޫނުމައްޗަށް ޖައްސާ ހިތްގައިމު ހަރަކާތްކަތުން ނައުރާ ފިދާކޮއްލައެވެ. އެ ލޯބީގައި ބަހާރު މޫސުން އައިސްފައިވާފަދައެވެ.
މިދެލޯބިވެރިން ފެންނަ ކޮންމެތަނަކުން އިއާންފެނެއެވެ. ހީވަނީ އެއީ މިދެލޯބިވެރިންގެ ހަށިފާރަވެރިޔާ ހެނެވެ. އެއްވެސް ކަހަލަ ނުރައްކަލެއް ކުރިމަތިވެއްޖެ ނަމަ އެންމެ ފުތަމަ ޖެހޭނީ ތިމަންނާ އާއި ކުރިމަތި ލުމަށޭ ބުނާފަދަ ގޮތަށް އިއާން އަބަދުވެސް މި ދެމީހުންނާއި އެކު ހުރެއެވެ. އެކަމާ ގުޅޭ ގޮތުން ރަށު ތެރޭގައި ކޮންމެ ފަދަ ވާހަކައެއް ދެކެވުންނަމަ ވެސް އިއާން އެއިން ކަމަކާއި އަޅައެއް ނުލައެވެ. އެ އެކުވެރިކަމުގައި ދެމި ހުރުމަކީ އިއާންގެ ވައުދެވެ.
ނައުރާގެ އުމުރުން 18 އަހަރުފުރުމާއެކު ކައިވެނީގެ ފޮނި އުއްމީދުތަށް ކުރެވެން ފަށައިފިއެވެ. ދެފަރާތުގެ
އާއިލާވެސް އެ ގުޅުމަށް ވަރަށް ޤަބޫލެވެ. ނަމަވެސް ޔާނިއު ބޭނުންވީ ކައިވެނި ކުރުމުގެ ކުރިން އަމިއްލަ ފައިމައްޗަށް ތެދުވާށެވެ. ރަނގަޅު ވަޒީފާއެއް އަދާކުރާށެވެ. ނައުރާއަށް ދުނިޔޭގެ ހުރިހާއުފަލެއް ދެވޭވަރުގެ ފުރިހަމަ މީހަކަށްވާށެވެ. މައިންބަފައިންގެ ތަނަވަސް ކަމުގައި އުޅެވެން އޮތަސް ޔާނިއުގެ އެގޮތް ބޭނުމެއްނުވިއެވެ. ޔާނިއު އެދޭގޮތަށް ކަންކުރުމަށް އާއިލާއިން ވެސް ބޭނުންވިއެވެ. ހަމައެކަނި ހުރި ދަރިފުޅަށްޓަކައި ޔާނިއުގެ މަންމައާއި ބައްޕަ ރެއާ ދުވާލު މަސައްކަތްކުރެއެވެ. މުޅި އުމުރު އުފަލާ އަރާމުގައި ހޭދަކުރިޔަސް ހުސްނުވާނެހާ ފައިސާ ޖަމާކުރިއެވެ. އެހެންނަމަވެސް ޔާނިއުގެ އުފަލަށްޓަކައި މިކަމަށްވެސް ރުހި ޤަބޫލުވީއެވެ. ޔާނިއު އަކީ އެމީހުންގެ ދުނިޔެއެވެ.
ޔާނިއު ވަޒީފާ ހޯދީ މާލެ ކައިރި ރިސޯރޓަކުންނެވެ. ނައުރާ މިކަމާ ކިތަންމެ ދެރަވިޔަސް މިއީ މުސްތަޤުބަލަށް
އަޅާ ފިޔަވަޅެއްކަން ޤަބޫލުކޮށް ކެތްކުރިއެވެ. ޔާނިއު ފުރުމުގެކުރިން ނައުރާއާ ބައްދަލުކުރިއެވެ. ދެމީހުންނަށް ވެސް ކުރެވުނުހާ ވެސް ކަމަކީ ރުއިމެވެ. ލޮލުންކަރުނަ ނުހިކެއެވެ. އެހެންނަމަވެސް ހިތްވަރުކޮއްފާ ދެމީހުން ވެސް ވާހަކަދެއްކިއެވެ. އިންތިޒާރު ކުރުމަށް ބުނަމުންދިޔައެވެ. ކިތަންމެ ދުރުގައި ހުއްޓަސް ހިތާއެންމެ ގާތުގައިވަނީ އެކަކު އަކެއްކަކުކަން ވިސްނާދެމުން ދިޔައެވެ. ދުވަހަކު ވެސް ދުރުނުވުމަށާ، ވަފާތެރިވުމަށް އެތައް ވައުދުތަކެއް ވިއެވެ.
ރަހުމަތްތެރިޔާ ގާތުގައި ނައުރާއަށް އެހީވުމަށާއި އަބަދުވެސް އުފަލުގައި ބެހެއްޓުމަށް އެންގުމަށްފަހު ޖެހިގެން އައި ދުވަހު ޔާނިއު ފުރައިގެން ހިގައްޖެއެވެ.
ދެކުދިންގެ ލޯއްބަކަށް އެއްވެސް އުނިކަމެއްނާދެވެ. ބަރާބަރަށް ގުޅައެވެ. އުފާވެރި އެތަށް ވަގުތުތަކެއް ހޭދަކުރެއެވެ. ނަމަވެސް ރިސޯރޓަކީ ރަށާދުރު ރިސޯރޓަކަށްވެފައި ޗުއްޓީ ލިބުންދަތިކަމުން ޔާނިއުއަށް ރަށަށް އާދެވޭ ގޮތެއްނުވެއެވެ. އެހެން ކަމުން އެދެމެދުގައި ބައެއް ފަހަރު ކުނި ޖެހޭގޮތް ވެއެވެ. ނައުރާ ބޭނުން ވަނީ އަބަދުވެސް ޔާނިއު ފެންނަ ހިސާބުގައި ހުންނާށެވެ. ޔާނިއު ނުފެންނަ ނަމަ އެ ދެލޮލުގެ ފިނިކަމެއް ނެތެވެ
ދެކުދިންގެވެސް އަމާޒަކީ ކައިވެނީގެ ގޮށްޖަހާލުމެވެ. ދިރިއުޅުމުގެ ދުވަސްތަށް އުފަލާ ހިތްހަމަޖެހުމުގައި ހޭދަކުރުމެވެ. އެކުދިންގެ ބަގީޗާގައި މާތަށް ފޮޅި ބަޙާރުއައުމެވެ. މިހުވަފެންތަކުގައި ކުލަޖެހޭނެ ދުވަހެއް ދެކިލުމަށް ދެކުދިން ވެސް ކެތްމަދުވެފައިވާކަން މޫނުމަތިން ވަރަށް ރަގަނޅަށް ހާމަވެއެވެ.
ވަޒީފާގައި އަހަރުވުމާ ގާތްވެފައި ވަނިކޮށް ޔާނިއުއަށް ކުރިމަތިވީ ހިތާމައިން ފުރިގެންވާ ދުވަސްތަކެކެވެ. ކުޑައިރުންސުރެ
ރިއްސާތީ އުޅޭ ބޮލުގައި ރިހުން ބޮޑުވެ ބައެއްފަހަރަށް ކެއްނުކުރެވޭ ހިސާބަށް ދާންފަށައިފިއެވެ. އެތަށް ފަހަރެއްގެ މަތިން މާލެ ގޮސް ޑޮކްޓަރަށް ދެއްކުނެވެ. އެތަށް ތަހްލީލްތަކަކައްފަހު އެގުނީ ޔާނިއުގެ ބޮލުގައި ޓިއުމަރެއް އުފެދިފައިވާކަމެވެ. މިހުރިހާ ކަމެއް ޔާނިއު ދިޔައީ ނައުރާއަށް ސިއްރުކުރަމުންނެވެ. ނައުރާ ދެރަވާނެވަރު ހިތަށް އަރާފައި ބުނަން ނުކެރިފައި ހުރެވެނީއެވެ. ކިރިޔާ ހުންވަރިއެއް ވިޔަސް ތެޅި ފޮޅޭ ނައުރާއަށް ލޯބިވާ ޔާނިއުއަށް އެވަރުކަމެއް ވީމައި ކެއްކުރެވޭނެ ހެއްޔެވެ؟
ނަމަވެސް އިއާން ގެ ނަސޭހަތަކީ ހުރިހާ ކަމެއް ހަގީގަތަށް ސާފުކޮށް ނައުރާ އަށް ކިޔައިދިނުމެވެ. ނޭގުމެއްގެ ތެރޭގައި ނައުރާ ނުބެހެއްޓުމަށް އިއާން ބުނެއެވެ. ނައުރާ ވާ ލޯބި ސާފުކޮށް ފެންނަ އިރު އެއްވެސް ކަމެއް ސިއްރު ކުރުމަކީ އެއީ އެއްވެސް ސިފައެއްގައި ރަނގަޅު ކަމެއް ނޫންކަމަށް ބުނި ނަމަވެސް އެ ހުރިހާ ވާހަކަ އެއް ނައުރާ އަށް ކިޔައި ދިނުމަށް ޔާނިއު އެއްބަސް ކުރެވޭ ގޮތެއް ނުވިއެވެ.
ވަގުތު ކުޑަތަންވެފައިވާ ޔާނިއުއަށް އޮޕަރޭޝަނަށްފަހު ވެސް ސަލާމަތްވެވޭނެ ކަމުގެ ފުރިހަމަ އުއްމީދެއް
ޑޮކްޓަރުން ނުދެއެވެ. ޔާނިއުއަށް ޖެހުނީ ވީއެންމެ އަވަހަކަށް ރާއްޖެއިން ބޭރަށް ފުރާށެވެ. އެބުރި އާދެވޭނެ ވަކި ދުވަހެއް ނޭގޭއިރު އާދެވޭނެ ކަމުގެ އުއްމީދެއް ވެސް ނެތް ޔާނިއު މިކަމާ ކުރިމަތިލީ ވަރަށްކެރިގެނެވެ. މައިން ބަފައިންނަށް ޙަބަރު ލިބުމުން ބޭނުންވީ ވަގުތުން ބޭރަށް ފުރާށެވެ. ޔާނިއުއަށް ފަރުވާ ލިބެންދެން އެދެމަފިރިންގެ ދިރިއުޅުން އެއްކޮށް ސިންގަޕޫރަށް ބަދަލްކުރުމަށް ޔާނިއުގެ ބައްޕަ ނިންމިއެވެ. ޔާނިއުގެ އެދުމުގެ މަތިން ރަށު މީހުންނަށާއި ނައުރާއަށް މިކަން ސިއްރުކުރިއެވެ. އަވައްޓެރިންނާއި ރައްޓެހިންނަށް ވެސް އެގިފައިއޮތީ ދިރިއުޅުން ސިންގަޕޫރަށް ބަދަލުކުރާކަމުގެ ވާހަކަތަކެވެ.
ފުރުމުގެ ކުރިން އެންމެ ފަހު ފަހަރަ ޔާނިއު ނައުރާ ދެކެން ބޭނުންވިއެވެ. ޔާނިއު ރަށަށް އައެވެ.
ފުރަތަމަ ވެސް ބައްދަލުކުރީ އިއާންއާއި އެވެ. ވެގެން އުޅޭ ހުރިހާ ގޮތެއް އިއާންއަށް ކިޔައިދެވުނީ ގިސްލަމުންނެވެ. އެހެން ނަމަވެސް ރޮމުންވެސް ނައުރާއަށް އަޅާލުމަށް ބުނަމުން ދިޔައެވެ. ވާނުވާ އިއާންއަށް އަންގާނެކަމަށާއި، ޔާނިއުއަށް އެއްވެސް ކަމެއް ދިމާވެއްޖެނަމަ ޔާނިއުމަތިން މުޅިން ހަނދާންނެތޭވަރަށް ނައުރާއަށް ލޯބިދިނުމަށް އިއާންއަށް ވަސިއްޔަތްކުރިއެވެ. ޔާނިއު ރަގަނޅުވެއްޖެ ނަމަ އެބުރި ނައުރާ ގާތަށް އާދެވެންދެން އޭނާއަށް ހިއްވަރުދީ އުފަލުގައި ބެހެއްޓުމަށް އެދެމުން ދިޔައެވެ.
އެރޭ ޔާނިއު ނައުރާއާއި ބައްދަލުކުރީ ދެއެކުވެރިންގެ ލޯބިފެށުން ފެށި މަންޒިލުންނެވެ. އުފަންދުވަހުގެ
ޕާރޓީ ބޭއްވުނު އެބޮޑު ތުނޑިންނެވެ. އެތުނޑިއަށް ނައުރާ ގެންދިޔައީ އިއާންއެވެ. މިހާދުވަހަށްފަހު ކުއްލިއަކަށް އެތަނުން ޔާނިއު އާއި ބައްދަލުވީތީ ނައުރާގެ ހިތްނެށިޔަސް ޔާނިއުގެ ހިތްވަނީ މާޔޫސްވެފައެވެ. ދެކުދިންނަށް ވަގުތު ދެމުން އިއާން ދުރުގައި އިށީނެވެ. ޔާނިއު ހުރީ އިސްޖަހާލައިގެންނެވެ. ނައުރާއަށް ޔާނިއުގެ ހަށިގަނޑުގައި ބައްދާލެވުނީ ބޭއިޙްތިޔާރުގައެވެ. އެވަގުތު ހޯސްލާފައި ޔާނިއުގެ ލޮލުން ކަރުނަ އޮހިގަތެވެ. ދޭންޖެހޭ ހިތާމަވެރި ޙަބަރުން ހިތްކުދި ކުދި ވަނީއެވެ. އެހެންނަމަ ވެސް މިވަގުތު މިނޫން ގޮތެއް ނެތްކަމަށް ބަލާ ޔާނިއު އޭނާގެ ނިންމުން އެންގިއެވެ. " އަ..އަ..އަހަރެންނަށް ކައިވެނި ކުރެވޭކަށްނެތް..އަހަރެން މިއުޅެނީ މުޅިއާއިލާ އެކީ ރާއްޖެއިން ބޭރަށް ދިރިއުޅުން ބަދަލުކުރަން..." ޔާނިއު އަށް ވާހަކަދެއްކެނީ ވަރަށް އުނދަގުލުންނެވެ.
މިހިސާބަށް ވާހަކަ ދިޔައިރަށް ނައުރާ ޔާނިއުއާ ދުރަށްޖެހިލިއެވެ. ރަގަނޅަށް ޔާނިއުގެ މޫނަށް ބަލާލިއެވެ.
ތެދެއްތޯ ނޫނީ ދޮގެއްތޯ، ނުވަތަ ސަމާސާއެއްތޯ ޔަޤީން ކުރަނީ ވެސް ކަންނޭގެއެވެ. ޔާނިއު ކަރުނަ ފޮރުވަމުން އިތުރަށް ވާހަކަ ދެއްކިއެވެ. " މިހިސާބުން މިގުޅުން ނިމުނީ" ޔާނިއުގެ އަޑުގައި ވަނީ ހިތްދަތިކަމެވެ.
ޔާނިއުގެ ފައިދަށަށްތިރިވެ ރޮމުން ނައުރާ ދެއްކި ވާހަކަތަށް ޔާނިއު އަޑު އަހަމުން ދިޔައިރު ހިތަށް ހީވަނީ ކަށިހަރަމުންދާހެނެވެ. "އަހަރެންނަށް އެހެން ނުހަދާ!!! އާއިލާގައި ހުރީ މުސްކުޅި ބައްޕައެކަނި.... ހެޔޮ ނުވާނެ ތިވިސްނުން ބަދަލުކުރޭ.. އަހަރެން ހިތަށް ތިގޮތަށް އަނިޔާ ނުދީ. އާދޭސް ކުރަން. އަހަރެން ދޫކޮށްނުލާ!!! އަހަރެން ވަރަށްލޯބިވޭ" އަހަރެން ކުށަކީ ކޮބާ. އަހަރެންނަށް ގޯސްކޮށް ކަމެއް ކުރެވިފަ އޮތިއަޔާ ބުނޭ އެކަމެއް ރަނގަޅު ކުރާނަށް. ޕްލީސް އަހަރެން ދޫކޮށްނުލާ. އާދޭސް ކުރަން "". ގިސްލަ ގިސްލާފައި ނައުރާ ދިޔައީ އާދޭސް ކުރަމުންނެވެ.
ނައުރާ ކުރަމުންދިޔަ އާދޭހަށް އިޖާބަދޭން ޔާނިއު ކިތަންމެހާ ވެސް ބޭނުންނެއެވެ. އެހެންނަމަ ވެސް
މިއަދު ނައުރާގެ ކުރިމަތީގައި ހިތްވަރު ނުކޮއްފިނަމަ މާދަމާ ނައުރާ މާ ރޯނެއެވެ. ލޮލުން ފައިބަމުންދާ ކަރުނަތަށް ފޮރުވުމަށް ޔާނިއު މޭގައި އަތް އަޅާލިއެވެ. " އުއްމީދުކުރަން މަޢާފު ލިބޭނެކަމަށް" ފައިދަށުގައި އިށީނދެއިން ނައުރާއަށް ބަލާލާނެ ހިތްވަރެއް ވެސް ޔާނިއުއަކަށް ނުލިބުނެވެ. އުނގުގައި ބައިންދައިގެން ފިރުމައިދޭން މިއަދު ޔާނިއު ކިތަށްމެހާ ވެސް ބޭނުމެވެ. އެހެން ނަމަވެސް އިތުރަށް އެތާ މަޑުކޮއްގެން ނައުރާ ރޯއަޑު އަހާނެ ހިއްވަރެއްނެތެވެ. ނައުރާގެ ކަރުނައިގެ ކުރިމަތީގައި އޭނާ ބަލިކަށިވެދާނެތީ ބިރުގަންނަ ކަހަލައެވެ. ޔާނިއު ފަހަތަށް އެނބުރި ބާލަވެސް ނުލާ ހިނގައި ގަތީ ކަރުނައިން ފުރިގެންވާ ލޮލަކާއި ހިތާމައިން ފުރިގެންވާ ހިތަކައިގެންނެވެ.
ނައުރާ އަޑުން އަޑުނަގާ ރޯންފެށިއެވެ. އެމަންޒަރުބަލަން ކެތްނުކުރެވިގެން އިއާން ޔާނިއު ހުއްޓުވިއެވެ.
ދުވެފައި ޔާނިއުއާ ހަމައަށް ދެވުނު އިރު އިއާންގެ މޫނުމަތީގައި ވެސް ވަނީ މާޔޫސްކަމެވެ. އޭރުވެސް ދޮންވެލިގަނޑުމަތީގައި ކުޑަކަކޫ ޖަހައިގެން އިދެ ނައުރާ ރޮމުންދެއެވެ. "ކި..ކީއް..ކީއްވެ؟ ނައުރާ އަށް ހަޤީގަތް ކިޔައިދީ... އޭރުންވެސް ހަމަ ރޯނީ އެއްނު... މިހާރުވެސް އެކުރަނީ ހިތާމައެންނު..." އިއާންގެ އަޑުގައި ރުޅިވެރިކަމާ ހަމްދަރުދީވެއެވެ.
" އެހިތާމަ މާދަމާ ނަފުރަތަށް ބަދަލުވާނެ.... އެކަމަކު ތެދު އެނގިއްޖެއްޔާ މުޅި އުމުރަށް ހިތާމަ ކުރަންޖެހިދާނެ....އޭރުން ދިރިއުޅުން އުނދަގޫކަމަކަށްވާނެ.... އިއާން ނައުރާއަށް އެހީވޭ!!!!" އާދޭހުގެ ރާގަކަށް މިހެން ބުނުމަށްފަހު ޔާނިއު އެތަނުންގޮސް އޮބާލިއެވެ. އެރޭގެ ބަކީ އޮތް ބައިގައި ޔާނިއު ކުރި ކަމަކީ ރުއިމެވެ. އެ ހިތުގައި ވަނީ ފުން ހިތާމައެއް އުފެދިފައިއެވެ. ކެތްކުރަން ދަތިވެ އެ އިހުސާސުތަށް ކަރުނައިގެ ސިފައިގައި އޭނާ ކޯތާފަތް ތެތްމަމުން ދެއެވެ.
ނައުރާގެ ހާލަކީވެސް ހަމަ އެއެވެ. ވާނުވާގައި އިން ނައުރާގެ ހިތުގައި ވަނީ ޝަކުވާއެވެ. އެހިތުގައި ވާ ލޯބި ނައުރާ ވަނީ ތަފްސީލުކޮށް ޔާނިއު އަށް ކިޔާދީފައިއެވެ. ދުވަހަކުވެސް މި ފަދަ ގޮތަކަށް އެދެމީހުންގެ ލޯބި ގެ މި ގުޅުން ނިމިދާނެ ކަމަށް ނައުރާ ހުވަފެނުން ވެސް ދެކެފައިއެއް ނުވެއެވެ. އަދި ހަމަ އެހެންމެ ކައިވެންޏާއި މިހާ ކައިރަށް އައިސް ޔާނިއު ކަންތަށް ކުރި ގޮތުން މިއަދު ނައުރާގެ ހިތް ޝަކުވާއިން ބަންޑުން ވެއްޖެއެވެ. ރޮއެރޮއެ އެ ދެލޯ ވަރުބަލި ވެއްޖެއެވެ. ނަމަވެސް ކަރުނަ އައުމަށް ކުޑަވެސް މަޑެއް ނެތެވެ. ނައުރާގެ މުޅި ދުނިއެ ބަނަވެ އޭނާ ބިކަވި ކަމުގެ އިހުސާސް ވަނީއެވެ. އެންމެ ކުޑަމިނުން ކުށަކީ ކޮބައިކަން ވެސް ނުބުނެ ޔާނިއު އޭނާ ކުރިމަތިން ގެއްލުނީއެވެ..
ރާއްޖެއިން ބޭރަށް ދިޔަފަހުން ކޮންމެ ދުވަހަކު އިއާންއަށް ހާލު އަންގައެވެ. ނައުރާގެ ހާލުބަލައެވެ.
ދިޔަފަހުން ހޭދަވި 6 މަސްތެރޭ ހޭވެރިކަންހުރި ކޮންމެ ދުވަހަކު ޔާނިއު ނައުރާގެ ވާހަކަ ދައްކައެވެ. އިއާންގެ ހެޔޮވާހަކަ ތަކުރާރުކޮށް އާއިލާއާއި ހިއްސާކުރެއެވެ. އެންމެފަހުން އޮޕްރޭޝަން ކާމިޔާބުވެ އެނބުރި ރާއްޖެ އާދެވޭ ގޮތްވުމުން، އެވާހަކަވެސް ފުރަތަމަ އެންގީ އިއާންއަށެވެ. ނައުރާ ބަލާދިނީތީ ޝުކުރުއަދާކުރަމުން ނައުރާ ގަތަށް އެނބުރި ދާން ތައްޔާރުވަނީ ކަމުގެ އުފާވެރި ޙަބަރު ދިނީ ހެވިފައިއިދެއެވެ.
ހިޔާލުގެތެރެއިން ޔާނިއު ސިއްސުވާލީ މަންމަގެ އޯގާތެރި އަޑެވެ. "ދަރިފުޅާ ރަށަށް އާދެވިއްޖެ!!!!"
ދޯނި ރަގަނޅަށް ޖެޓީއާއި ގާތްވެސް ނުކުރެވެނީހެން ޔާނިއު ދޯނިން ފުއްމާލިއެވެ. އަވަސް އަވަހަށް މިސްރާބުޖެހީ ނައުރާއާއި ބައްދަލުކުރުމަށެވެ. ޔާނިއު އެނބުރި އައުމުން ނައުރާ އުފާވާނެ ވަރު ވިސްނާލާފާ ޔާނިއުގެ މޫނު މައްޗަށް އުފާވެރިކަން ގެނުވައެވެ. ދުވަމުން އެނބުރެމުން ތެޅެމުން ފޮޅެމުން ކަހަލަ ގޮތަކަށް އެގެއަށް އާދެވުނެވެ.
ގެހުރީ ތަޅުލާފައެވެ. ވަރަށް މަދުން ނޫނީ މިގެއަކީ ތަޅުލާފަ ހުންނަ ގެއެއްނޫނެވެ. ނައުރާ ނެތަސް އަބަދު ވެސް
ބޮޑުއަށީގައި ނައުރާގެ ބައްޕަ އޮންނާނެއެވެ. ހާސްވިނަމަ ވެސް ފޮނިއުއްމީދަކައިގެން ޔާނިއު ދެންމިސްރާބުޖެހީ އިއާންގެ ގެއަށެވެ. އެގެއަށްވަދެ އިއާންގެ ކޮޓަރީގެ ދޮރުހުޅުވާލީ އެއްވެސް ހިޔާލެއް ފިކުރެއްނެތިއެވެ. ކޮޓަރީގައި އެއްވެސް މީހަކު ފެންނާކަށް ނެތެވެ. ނަމަވެސް ފެނުނު ތަސްވީރުތަކުން ޔާނިއުގެ ހިތްކުދިކުދި ވިއެވެ. ދުނިޔެ އެފުއް މިފުށަށް ޖެހުނު ކަހަލައެވެ.
ކުރިމަތިން ފެންނަށްހުރި ބޮޑު ފްރޭމްގައި އެހުރީ އިއާންއާއި ނައުރާގެ ކައިވެނީގެ ފޮޓޯއެވެ. އުފާވެރި ކަމުގެ އެކިއެކި ތަސްވީރުތަކުން ކޮޓަރިވަނީ ޒީނަތްތެރި ކޮއްފައެވެ. ގަބުވެފައި އިރުކޮޅަކު އެތަނުގައި ޔާނިއުއަށް ހުރެވުނެވެ. އެކަމަކު ހަމަ ވިސްނުން ލިބުމާއެކު އަވަސްވެގަތީ މީހަކަށް ނުފެނި އެތަނުން ދިއުމަށެވެ. އެހެން ނަމަވެސް ކޮޓަރިއަށް ވަންނަންއައި އިއާނުގެ ގައިގާ ޔާނިއު ލައިގަތީ އޮޅުމަކުންނެވެ. ޔާނިއުގެ ހާލަތުފެނި އިއާންއަށް ހުރިހާ ކަމެއް ފަހުމްވިއެވެ. ޔާނިއު ހަމައަކަށް އެޅުވުމަށްޓަކައި ގޭގެ ބޮޑުކޮޓަރީގައި ހުރި ގޮނޑިއެއްގައި ބޭންދިއެވެ. ކައިރީގައި އިށީނދެ އިއާން ވާހަކަ ފެށިއެވެ.
ނައުރާ ޔާނިއު ދެކެ ވާ ލޯބި އަނެއްކާ ވެސް ވިސްނައިދޭން މިޖެހުނީ އިއާން އަށެވެ. " .... އަހަރެންނަށް މާއާފް ކުރޭ..މިވާހަކަ އަހަރެން ޔާނިއުއަށް ނޭންގީ ޔާނިއުއަށް އެހާލަތުގައި މިވަރު ބޮޑުކަމަކާ ކުރިމަތި ނުލެވިދާނެތީ..." އިސްޖަހައިގެން އިން ޔާނިއުގެ ކޮނޑުގައި އަތް ޖައްސާލަމުން އިއާން ވާހަކަ ދެއްކިއެވެ.
" ނައުރާ އަކީ އަދިވެސް ޔާނިއުގެ ހައްޤެއް.... ނައުރާ އަހަރެންނާ ކައިވެނިކުރީ އޭނަގެ ބައްޕައަށް ޓަކައި...ބައްޕައަށް ހިތް ހަމަ ޖެހުމެއް ހޯދަދޭން..އޭނާ އަހަރެން ދެކެ ލޯތްބެއް ނުވޭ. އެ ހިތުގައި ވަނީ ހަމަ އެކަނި ޔާނިއު."
ޔާނިއުގެ ހިޔާލުގައި ދުވަސްތަށް ގުނުމުގައި ނައުރާ ހޭދަކުރީ ހިތްދަތި ދިރިއުޅުމުގެ ވާހަކަ ފެށިއިރު އިއާންގެ ލޮލުން ވެސް ކަރުނަ ފާއްދާލައިފިއެވެ. ޔާނިއުގެ ހިޔާލުތަކާ ހިތާމައިން އަރައި ނުގަނެވިގެން ނައުރާ އުޅުނު ހިތްދަތި ދިރިއުޅުން ފެންނަ ކޮންމެ މީހަކު ރޯނެއެވެ. އެފަކީރު ނުނިދިގެން ތެޅުނީ ކިތަށް ކިތަށް ރޭ ހެއްޔެވެ؟ ދުނިޔޭގައި ހުރީ ހަމައެކަނި ބައްޕަގެ ހައްޤުގައެވެ. އެހެންނަމަވެސް ބައްޕައަށް ވެސް ނައުރާގެ ހާލުދެކެން ކެތްނުވީއެވެ. ނައުރާގެ ގާތުން އެދެމުން ދިޔައީ ބައްޕަ ދުނިޔޭގައި އޮއްވާ ކައިވެނި ކުރުމަށެވެ. ބައްޕަ ދުނިޔެއިން ވަކިވުމުގެ ކުރިން ނައުރާއާއި ހަވާލުވާނެ މީހަކު ހޯދުމަށް ބައްޕަ އެތަށް ފަހަރަކު އެދުނެވެ. އަނެއްކޮޅުން ޔާނިއު ފުރައިގެން ދިއުމުން ރަށުމީހުންގެ މަލާމާތް ނައުރާއަށް ވަރަށް ލިބުނެވެ. މިއިން ކޮންމެ ކަމަކާ ވެސް ކުރިމަތިލީ ރޮމުންނެވެ. ފެންނަ މީހަކަށް ހީވަނީ ބަލިއެދުން ނުތެދުވެ އަހަރުތަކެއް ވެފައި އިން މީހެއްފަދައިންނެވެ. މޫނުމަތިން ފެންނަ މާޔޫސްކަން އަނެކާ މާޔޫސް ކޮއްލައެވެ.
ބައްޕަގެ ހާލު އެންމެ ބޮޑުވެގެން އައި އިރުވެސް ބައްޕަ އެދެމުން ދިޔައީ ކައިވެނި ކުރުމަށެވެ. އެންމެ ފަހުން ނައުރާއަށް ކެތް ނުވެގެން އިއާންގާތުން ކައިވެންޏަށް އެދުނީއެވެ. ޔާނިއުގެ އެދުންވެސް ފުރިހަމަ ކޮއްދިނުމަށް އެޅޭ ރަގަނޅު ފާލަކަށް ބަލާ އިއާން ވެސް ނައުރާ އާއި ކައިވެނި ކުރި ނަމަވެސް ދިރިއުޅެމުން ދިޔައީ ދެ އެކުވެރިން ފަދައިންނެވެ. މީހުންގެ ލޮލުގައި އަދުން އެޅުވުމަށް ލޯބިވާ ދެމަފިރިންގެ ގޮތުގައި ދެއްކިޔަސް ނައުރާ އިޔާން ދެކެ ކިހާ ލޯބި ވާކަން އިއާން އަށް އެގެއެވެ. ކައިވެންޏަށް ފަހު މަހެއްވެސް ނުވެ ނައުރާގެ ބައްޕަ ނިޔާވިއެވެ. ރިހޭ ފައިމައްޗަށް ފޮއިވެއްޓި ނައުރާގެ ދުނިޔެ ފުނޑުފުނޑުވިއެވެ.
ވާހަކަތަށް އަޑުއަހަމުންދިޔައިރު ޔާނިއުއަށް ގިސްލަ ގިސްލާފައި ރޮވެއެވެ. އޯގާތެރި ކަމާއެކު ކަރުނަ ފޮހެދެމުން ޢިއާން ހިއްވަރު ދެމުން ދިޔައެވެ. " މިހާރު ނައުރާ ކޮބާ؟.." ތުރުތުރު އަޅާ އަޑަކުން ޔާނިއު އަހާލިއެވެ.
" އަހަރެންގެ މަންމަ ބަލިވެގެން މާލެ ދިޔައީ ...އަންނަ ހަފްތާތެރޭ އަންނާނެ." އިއާން ވާހަކަދެއްކީ އޯގާތެރިކަމާއެކުގައެވެ. އިތުރަށް އެއްވެސް އެއްޗެއް ނުބުނެ ޔާނިއު އެތަނުން ދިޔައީއެވެ.
އެކަމަކު އިއާންގެ ފަރާތުން ފެނުނީ އުފާވެރި ކަމަށްވުރެ ހިތާމައިގެ އަސަރެވެ. ހުއްޓުމެއްނެތި ރޮމުންދިޔައިރު ހީވަނީ އިއާންއަށް ވެސް އޭނާގެ ލޯބިވެރިޔާ ގެއްލިދާނެކަމުގެ ބިރު ހީވާހެނެވެ. ނައުރާއަކީ އެންމެ ކުރިންސުރެ އިއާންގެ ހިތުގައިވެސް ރަސްކަން ކުރަމުންދިޔަ ރާނީއެވެ. އިއާންގެ ހިތުގައި ނައުރާއަށް އޮތް ލޯބި ވަޅުލީ އެދުވަހު ވެސް ނައުރާގެ އުފަލަށްޓަކައެވެ. ނައުރާގެ ހިތް އެދޭ ލޯބި އޭނާއަށް ހޯދައިދިނުމަށްޓަކައެވެ. މިއަދު އިއާން ބޭނުންނަމަ އެލޯބި ހާސިލްކުރެވިދާނެއެވެ. އެހެންނަމަ ވެސް މިއަދު ވެސް އިއާން އިސްކުރާނީ ނައުރާގެ އުފާ ކަމާމެދު އެއްވެސް ޝައްކެއްނެތެވެ.
ޖެހިގެންއައި ހަފްތާގެ ހޯމަދުވަހު ނައުރާމެން ރަށަށް އައެވެ. އެރޭވެސް 3 އެކުވެރިން ބައްދަލުކުރީ ހަމަ އެ ހަނދާންތަކާ ގުޅިފައިވާ ތުނޑިންނެވެ. ތުނޑިއަށް ދިއުމުގެ ކުރިން އިއާން ނައުރާއަށް ހުރިހާ ވާހަކައެއް ކިޔާދިނެއެވެ. ޔާނިއުގެ ބަލީގެ ހާލަތާ، ކަންތަށްތަށް ދިމާވެގެންދިޔަ ހުރިހާ ގޮތެއް އަކުރުން އަކުރަށް ތަފްސީލްކޮއްދިނެވެ. އެހެން ނަމަވެސް ނައުރާގެ މޫނުމަތިން އުފާވެރިކަމުގެ އެއްވެސް އަސަރެއް ނުފެނެއެވެ. ނަމަވެސް އެ ހިތުގައި މިއަދު ޝަކުވާ ވަނީ އަހައެކަނި ޔާނިއުއަކަށް ނޫނެވެ. އިއާން އަށްޓަކައިވެސް އެހިތުގައި ޝަކުވާ ވިއެވެ. މިއަދުވެސް އިއާން ހަތިޔާއު ބެހެއްޓުމަށްފަހު މައިދާނުން ފިލާފާނެ ކަމުގެ ޝަކުވާއެވެ.
ނައުރާގެ ހިޔާލު ދަތުރު ކުރީ މި ތުނޑީގައި ބޭއްވި އިޔާންގެ އުފަންދުވަހުގެ އެ ބޮޑު ޕާޓީއަށެވެ. އެއީ އިއާންގެ ހަގީގަތް އޭނާއަށް ފަޅާ އެރިދުވަހެވެ. އިއާންގެ ހިތުގައި އޭނާއަށްޓަކައި އޮތް ލޯބި ހާމަ ވިރެއެވެ. އަދި އިއާންގެ ހުރި ހިތްވަރުގަދަކަން ވެސް ހާމަވެގެން ދިއަ ރެއެވެ. ނައުރާ ދެކެ ވާލޯބި އިއާން ހާމަކުރަމުން ގެންދިއައީ އޭނާގެ އަމިއްލަ ނަފަސަށް ގޮވި އެތިވަރުތަކުނެވެ. ރޮމުންނާއި ހެމުން އޭނާ އަމިއްލަ ނަފްސައް އަޑުލުން ދިއައިރު ބައެއް ފަހަރަން ކަރުނަ ފޮހެލައެވެ. އެހުރިހާ ކަމެއް ނައުރާ ބަލަންހުރިކަމެއް އަދި އަދައްވެސް އިއާން އަށް ނޭގޭނެއެވެ. އެ ހުރިހާ ސަކަރަތަކަށް ފަހު ޔާނިއުއާއި ނައުރާގެ ލޯބި އެކެއް އަނެއްކަކަށް އަންގައިދިނީ ވެސް ހަމަ އިއާންއެވެ. ހުދު ނައުރާ އަށް ވެސް އިއާން ކަމުދެއެވެ. ނޫންކަމަށް ހެދިގެން އެތަށް އިރެއް ވަންދެން ބަލަން އޮންނަ ކަންވެސް އެނގެއެވެ. ނަމަވެސް ޔާނިއުއަކީ ނައުރާގެ ހުވަފެނުގެ ރާޖާއެވެ. އޭނާ ހޭލާ ހުރެގެންނާއި ނިދީގައިވެސް ބެލީ ޔާނިއުގެ ހުވަފެނެވެ.
"ނައު... ނައު.. ޔާނިއު ނައުރާގެ ކޮޑުގައި ހިފައި ތަޅުވާލިއެވެ. ހިޔާލީ ދުނިއެއިން ނައުރާ އަށް ނިކުމެވުމުން ޔާނިއު ކިހިނެއްވީހޭ ބުނާފަދަ ގޮތަކަށް ނިތް އަރުވާލިއެވެ. ނައުރާ ޖަވާބެއް ނުދެއެވެ. ނައުރާއާއި ބައްދަލު ވުމުން ޔާނިއުގެ ހިތްމިއަދު އުފަލުން ތެޅި ފޮޅެއެވެ. ނައުރާގެ މޫނުމަތިން ފެންނަނީ މާޔޫސްކަމެވެ. އެހެން ފަހަރުތަކެކޭވެސް އެއްފަދައިން މިރޭވެސް ޔާނިއުއާއި ނައުރާއަށް ވަގުތުދެމުން އިއާން ތަންކޮޅެއް ދުރުގައި އިށީނެވެ.
އިއާންގެ ނަޒަރު ހުރީ އެދެމީހުންނަށެވެ. އެހިތުގައި ވަނީ ވަރުގަދަ ތޫފާނެއް އުފެދިފައިއެވެ. އެ އިހުސާސްތަށް އޭނާ ގޮވައިގެން ދިއައީ މީގެ އެތަށް އަހަރެއް ކުރިއަށެވެ. އިއާން އާއި ނައުރާގެ އާއިލާއަކީ އާދައިގެ ދިރިއުޅުމެއް އުޅެމުން ދިއަބައެކެވެ. ނައުރާގެ ގެ ހުންނަނީ އިއާންގެ ގެ ގޭގެ ދޮތުމަތީގައިއެވެ. އާދައިގެ ގޮތަކަށް ހަދާފައިވާ ދެގޭގައި ގޯތިތެރޭގައި ހިނގާ ކަންކަން އަނެއް ގެއަށް ފެނެއެވެ. ޒުވާން އުމުރަށް އަޅައިގެން އައީއިއިރު ސިއްރު ސިއްރުން ނައުރާގެ ހަރަކާތްތަކަށް އިއާން ދިއައީ ފާރަލަމުންނެވެ. އަބަދުވެސް އިއާން އަށް ނައުރާ ކަމުދެއެވެ. ގަޔާވެވެއެވެ. އެ ގަޔާވުން ލޯތްބަށް ބަދަލުވީ ކޮންއިރަކުކަމެއް އިއާން އަކަށް ނޭގެއެވެ. އަބަދުވެސް އޭނާގެ ދެލޯ ހޯދަނީ ނައުރާއެވެ. ނައުރާ އެކި އެކި މަސައްކަތުގައި އުޅޭ އިރު އެތަށް އިރެއްވަންދެން މާ ނޫންކަމަށް ހެދިގެން ހޮޅުއަށީ ކުރުއަތް ދަނޑިމަތީ އޯށޯވެ އޮވެ އިޔާން ބަލައެވެ.
ނައުރާގެ ގިނަ ހަތަކާތްތަކެއް އިއާން ދިއައީ ހިތުގައި ނޯޓް ކުރަމުންނެވެ. އުފާވީމާ ނައުރާ އުޅޭ ގޮތެވެ. ދެރަވީމާ އެވާ ގޮތެވެ. ރުޅިއައިސްގެން ކާޅުތަކަށް ގޭ ދޮށް ގަޑިކުރަނީއޭ ކިޔައިގެން އެ ލަވާ ހަޅޭކެވެ. އިއާން އަށް ކަމުދަނީ ދޭތެރައަކުން މޫނު މައްޗަށް އެ ވެއްޓޭ އިސްތަށިކޮޅު ގެނެސް ކަންފަތްކާރިއަށް ލާ އެ ހައްޔަރުކޮއްލާ ގޮތެވެ. އެ ހިނިތުން ވުމުގައި ހުންނަ ފަރި ގޮތެވެ. ހިނިތުން ވުމުން އެމޫނު އިތުރަށް ފުރިހަމަ ވެގެން ދާގޮތެވެ. އެހުރިހާ ސިފަތަކެއް ވެސް އޭނާ އަށް ކަމުދެއެވެ. ހަގީގަތުގައި ކަމު ނުދާނެ މީހަކު ނުހުންނާނެވެ. ނައުރާ އަކީ އެފަދަ ކުއްޖެކެވެ. އެލޯބި ލޯބި މޫނު ކޮޅުގައި ބޮސްދޭން ބޭނުން ނުވާނީ ކާކުހެއްޔެވެ. އެފަދަ ކުއްޖަކު ހަޔާތުގެ ބައިވެރިއަކަށް ހަދަން ބޭނުން ނުވާނީ ކާކު ހެއްޔެވެ. ބަސްއަހާ ކިޔަމަންތެތި ކަމުގެ މާނައަކީ ނައުރާއެވެ. އެއީ ހަރުދަނާ ކުއްޖެކެވެ.
އިއާންހުރީ ނައުރާގެ ލޯބީގައި ފިދާވެފައިއެވެ. އެލޯބި ހާސިލު ކުރުމަށް އޭނާ ދިއައީ އެކިއެކި ގޮތް ގޮތް ރާވަމުންނެވެ. ނަމަވެސް އެންމެ ފަހުވަގުތު ފަސްޖެހެވީއެވެ. ކިތަންމެ ފުރުސަތެއް ލިބުނަސް އިސްނަގަން ޖެހިލުންވަނީއެވެ. މި ސަކަރާތް ގަނޑެއްގައި އުޅެނިކޮށް އެންމެ ފަހުން ތެޔޮނާށި ކާޅުޖަހައިގަތީއެވެ. އެއީ އިއާންގެ ހިތް ކުދިކުދިވި ދުވަހެއެވެ. ނައުރާ ހާސިލް ކުރީ ދެވަނަ ދެމީހެއް ނޫނެވެ. އޭނާގެ އެންމެ ގާތް ރަހުމަތެރިއާއެވެ. އެއާ އެކު އިއާން ހަތިޔާރު ބަހައްޓާ މައިދާނުން ފޭބީއެވެ. އޭނާގެ ހިތުގައި އޮތް ލޯބި ސިއްރު ކުރީ އެ ހިތުގެ އެންމެ ފުނުގައިއެވެ. ޔާނިއުގެ ހިޔާލި ދުނިޔެ ފުޑުފުޑުވެގެން ފޭބީ ޖެހި ވަރުގަދަ ގުގުރިއާއި އެކު ވިދާލި ވިދުންގަނޑައިއެކު އޮއްސާލި ވާރެއާއި އެކުއެވެ. އެމީންގެ މެދުގައި ވާ ތޫފާންގަޑުގެ ހަބަރު ލިބުނީވެސް ތޯއްޗެއެވެ.
ޔާނިއު އޭނާގެ ހާލަތާ ޝަކުވާތަށް ނައުރާއަށް ހުއްޓުމެއްނެތި ކިޔައިދެމުންދިޔައެވެ. މުސްތަޤުބަލު ނައުރާއާއި އެކު ރާވާފައިވާ އުފާވެރި ގޮތުގެ ތަސައްވަރު ކިޔައިދެމުން ދިޔައެވެ. މިވާހަކަތަށް އަޑުއަހަންހުރި ނައުރާގެ ލޮލުން ހުއްޓުމެއްނެތި ކަރުނަ އޮހެމުންދެއެވެ. ޔާނިއު ހީކުރީ އެއީ އުފާވެރިކަމުގެ ކަރުނަ ކަމަށެވެ.
"ހުއްޓާލާ" .... ނައުރާގެ އަޑުގައިވަނީ ރުޅިވެރިކަމެވެ. "މިއަދު އަހަރެންނަށް މާފުކޮއްދީ... އަހަރެންމީ އެހެންމީހެއްގެ ހައްޤެއް....." ނައުރާ އޭނަގެ ހާލަތު ވިސްނައިދިނުމަށް މަސައްކަތްކުރިއެވެ.
ޔާނިއުގާތަށް އައީ ފާޑެއްގެ ލާނެތް ހިންޔެކެވެ. ދުރުގައިއިން އިއާން އަށް ގޮވާ ކައިރިއަށް ގެނައެވެ. ޔާނިއުއާއި ނައުރާ ކައިވެނި ކުރުމުގައި އެއްވެސް މައްސަލައެއް އޮތްތޯ އިއާން ކުރެން ސުވާލުކުރިއެވެ. ޖަވާބުގައި އިއާން އާއެކޭ ބުނަން ބޭނުންވިޔަސް ނޫނެކޭބުނެ ބޯހޫރާލިއެވެ.
" އިއާން މިކަމަށް އޯކޭ އޭ...ބިރުނުގަނެބަލަ...ހުރިހާކަމެއް ރަގަނޅުވާނެ" ރޮއެ ރޮއެ ހުރި ނައުރާ ގަޔާ ކައިރިކޮއްލަމުން ޔާނިއު ވިސްނާދިނެވެ.
ދެކުދިންނަށް ވަގުތު ދިނުމަށްފަހު އެތަނުން ދިއުމަށްޓަކައި އިއާން ހިގައިގަތެވެ. އެހެންނަމަވެސް ނައުރާ އިއާންގެ އަތުގަ ހިފާ ހުއްޓުވީ ނައުރާގެ ވާހަކަ އަދި ފުރިހަމަ ނުވާތީ ކަމަށްވެދާނެއެވެ. ނައުރާ ލޯފޮހެލަމުން އޭނާގެ އިހްސާސްތަށް އެދެއެކުވެރިންގެ ކުރިމަތީގައި ބަންޑުންޖަހާލިއެވެ.
" އަހަރެން ޔާނިއުދެކެ ވަރަށް ލޯބިވިން.. އެހެންނަމަވެސް މިއަދު އަހަރެންގެ އެހީތެރިކަން ޔާނިއުއަށްވުރެ ބޮޑަށް ބޭނުންވަނީ އިއާން އަށް. ޔާނިއުގެ އަށް ހުރިހާ އުފަލެއްވެސް ލިބޭނެ... އެކަމަކު ނިކަމެތި އިއާން އާއި އޭނަގެ މަންމަ އަށް އެހީވާނެ މިއަދު ހުރި ހަމައެކަނި މީހަކީ އަހަރެން... އަހަރެން ނިކަމެތިވެ ގޮތް ހުސްވި ދުވަހު ލޯބިދީ އޯގާތެރި ވި ބަޔަކީ މި... އިއާން އާއި އޭނަގެ މަންމަ.. އަހަރެން ބޭނުމީ އެ އޯގާތެރިކަން.. ދިރިއުޅުމުގެ ބާކީބައި އެ ދެމީހުންގެ ޙިދުމަތުގައި ހޭދަކުރަން އަހަރެން ނިންމައިފިން. ލޯތްބަކީ ހަމައެކަނި އުފާވެރިކަން ހިއްސާކުރާ ކަމެއްނޫން... ދިމާވާ ކޮންމެ ކަމެއްގައި އެކީގައި ކުރިމަތިލުންކަން އަހަރެންނަށް ދަސްކޮއްދިނީ އިއާން... މިއަދު އަހަރެންގެ ހިތުން އިއާން ހޯދައިފައިވަނީ ވަރަށްވެސް މަތީ ދަރަޖައެއް. މިއަދު އަހަރެންގެ ފިރިމީހާގެ މަގާމުގައި އިއާން އެހުރީ.. އެއީ އަހަރެންގެ މުސްތަގުބަލު. މުޅި އުމުރު އެކުގައި އުޅެން ބޭނުންވާ މީހާ ހަގީގަތުގައި ބުނަންޏާ އަހަރެންނަށް މިހާރު އިއާންދެކެ ލޯބިވެވިއްޖެ ..އަހަރެންނަށް މައާފްކުރޭ ޔާނިއު" ނައުރާގެ ވާހަކަތަކުން ޔާނިއުގެ ދުނިޔެ އެފުއްމިފުށަށް ޖެހުނު ފަދައެވެ. ހީވީ އޭނާގެ ހިތް ކުދިކުދި ވެގެން ފޭބިހެންނެވެ. އެހެން މަނަވެސް އެދެމީހުންގެ ކައިރީގައި މިއަދު އޭނާ އަކީ ކާކުހެއްޔެވެ. އެއީ މިއަދު ދެމަފިރިންނެވެ. އަނެއްކޮޅުން ނައުރާ މިހާރު އިއާން ދެކެ ލޯބިވާކަމުގައި ވަނީނަމަ އެކަން ޤަބޫލުކުރުން އެއީ މިއަދު އޭނާއަށް އޮތްގޮތެވެ.
ނައުރާއާއި އިއާންގެ އުފާވެރި ދިރިއުޅުމަށް މަރުޙަބާ ކިއުމަށްފަހު އެތަނުން އެއްފަރާތްވާން މިއަދު ޖެހުނީ ޔާނިއުއަށެވެ.
މި ހުރިހާ ކަމެއް އިއާން ގެ ލޯ ކުރިމަތީ ހިނގަމުން ދިއައިރު އޭނާ ހުރީ ވާންވީ އުފާކަމެއް ނުވަތަ ދެރަކަމެއް ނޭގެއެވެ. މިއަދު ޔާނިއު ގެ އިހުސާސް ތަށް އޭނާ އަށް ވަރަށް ރަނގަޅަށް އެގެއެވެ. އެއީ އެއް އިރެއްގައި އޭނާވެސް ބަރުދާސްތު ކުރި ހިތާމައެކެވެ. ޔާނިއު އަށް ވާނެވަރު އޭނާ އަށް އަންދާޒާކުރެވެއެވެ. އަނެއްކޮޅުން އިއާންގެ ހިތުގައި ފަތަހައިގެ ރަނގަބީލު ވެސް ދިއައީ ޖަހަމުންނެވެ. އެ އުފާވެރި އިހުސާސުން އޭނާގެ ހިތް ނަށާލައިފިއެވެ. ނައުރާގެ މޫނަށް އޭނާ ބަލާލީ އަދިވެސް ޔަގީން ކުރަން ބޭންވާ ފަދަ ނަޒަރަކުންނެވެ. ނައުރާ އަކީ އިއާންގެ ހިތުގެ ފިނިކަމެވެ. އެހިތުގެ ދިރުމެވެ. އެދެލޮލިގެ ފިނިކަމެވެ. ހަމަ އެކަނި ލޯބިވި މީހަކީ ނައުރާއެވެ. އެއީ ދެދުވަހުން ވީ ލޯތްބެއް ނޫނެވެ. އެއީ މުޅި އުމުރުގައި ވެސް އޭނަވީ ލޯތްބެވެ. އެހުރިހާ ވާހަކައެއް އިއާންގެ ދުލަށް ގެންނަން ބޭނުންވިޔަސް އޭނާގެ ދޫ ތަޅުލެވިފައިވާކަހަލައެވެ. އެއްވެސް އެއްޗެއް ދުލަކަށް ނައެވެ. އެހެން ނަމަވެސް އެ ތުންފަތްމަތީ ހިނިތުންވުން ފިލައިގެންނެއް ނުދެއެވެ.
ލިބުނު ހިތާމައަށް ކެއްކުރަން އުނދަގޫވުމުން ރަށް ދޫކޮއް ރާއްޖެއިން ބޭރަށް ދިރިއުޅުން ބަދަލުކުރުމަކީ އެންމެ ރަގަނޅުގޮތްކަމަށް ބަލައި ޔާނިއުގެ އާއިލާ އަބަދުގެ އަބަދައް ޤައުމުދޫކޮށް ދިޔައީއެވެ. އެހެން ނަމަވެސް އިއާން އާއި ޔާނިއުގެ ރަޙުމަތްތެރިކަމަށް އެއްވެސް ބަދަލެއް ނާދެއެވެ. ދިރިއުޅުމުގެ ހުރިހާ ކަމެއް ހިއްސާކުރެއެވެ. ނައުރާ އާއި އިއާންގެ ބާއްޖަވެރި ކައިވެންޏައްޓަކައި ޔާނިއު ﷲއަށް އަބަދު ޝުކުރު އަދާކުރެއެވެ.
-ނިމުނީ-
އެޑިޓަރުގެ ނޯޓް
މީ ދިވެހިރާއްޖޭގެ އަޑުން މިރޯދަމަހު ގެެނެސްދޭ ކުރު ވާހަކަ މުބާރަތަށް ހުށައަޅާފައިވާ ވާހަކަތަކުގެ ތެރެއިން ވާހަކައެކެވެ. މި ވާހަކަ ލިޔުނީ މަރިޔަމް ސާމިލާ މުޙައްމަދު ހދ.ފިނޭ ނަސީމީ ހިޔާ އެވެ. ވާހަކަ ހުށައަޅަދިނީ ހދ.ފިނޭ ރޯޝަނީ ހިޔާއެވެ. ރޭޑިއޯއިން މި ވާހަކަ ބްރޯޑްކާސްޓްކޮށްފައިވަނީ 01 ޟައްވާލް 1442 އެވެ.