ސަލްމާން ޚާނާއެކު ފިލްމު "ރާދޭ: ޔުއަރ މޯސްޓް ވޯންޓެޑް" އަށްފަހު ބޮލީވުޑް އެކްޓަރ ޖެކީ ޝްރޮފް އޭނާ ދެން އެންމެ އަވަހަށް ފެނިގެންދާނެ ފިލްމަށް ތައްޔާރުވާން ފަށައިފިއެވެ. ސިންގަޕޫރުގެ ޕްރޮޑިއުސަރެއް ކަމަށްވާ ޝްރެޔާޝީ ސެން ޕްރޮޑިއުސް ކުރާ މި ފިލްމަކީ މިޔުޒިކް ކުޅުންތެރިޔާ ސްލޯ ޖޯ ގެ ޙަޔާތުގެ މައްޗަށް ބިނާކޮށް ހަދާ ބަޔޯޕިކް ފިލްމެކެވެ.
ސްލޯ ޖޯ އަކީ 1943 ވަނަ އަހަރު އިންޑިއާގެ ބޮމްބޭއަށް އުފަން މިޔުޒިކް ކުޅުންތެރިއެކެވެ. ޅެން ހަދަމުން ފްރާންސް އަދި އިންޑިއާ ފަދަ ޤައުމުތަކުގައި އޭނާ ވަނީ ދަތުރުކޮށްފައެވެ. މީހުންގެ ތެރޭގައި ލަވަ ކިޔާ އޭނާގެ ދިރިއުޅުން ބިނާވެފައި އޮތީ އެކަމުގެ މައްޗަށެވެ.
ނަން އަދި ހާމަނުކުރާ މި ފިލްމުގެ މަންޒަރުތައް ނެގުމަށް ހަމަޖެހިފައިވަނީ މުމްބާއި، ގޯއާ، އަދި އެމެރިކާގެ ރަށެއްކަމަށްވާ ލިޔޯން ގައެވެ. ފިލްމާއި ބެހޭ މާބޮޑު ތަފްޞީލެއް އަދި ނެތް މި ފިލްމު އިނގިރޭސި، ފްރެންޗް އަދި އިންޑޯ ޔޫރަޕިއަން ބަހެއްކަމަށްވާ ކޮންކާނީ ބަހުން ގެނެސްދިނުމަށް ހަމަޖެހިފައިވާ ކަމަށް ޚަބަރުތައް ބުނެއެވެ.
ދޭވް އާނަންދުގެ ފިލްމު "ސުވާމީ ދާދާ" އިން 1983 ވަނަ އަހަރު ފިލްމީ ކެރިއަރު ފެށި ޖެކީ މިހާތަނަށްވަނީ 13 ބަހަކުން ކުޅެފައިވާ 220 ފިލްމުގައި ޖެކީ މިހާތަނަށް ވަނީ މަސައްކަތްކޮށްފައެވެ. މީގެ އިތުރުން ޖެކީ ވަނީ 4 ފިލްމު ފެއަރ އެވޯޑްވެސް ޙާޞިލްކޮށްފައެވެ.
ތަމަޅަ އަދި ތެލުގޫ ފިލްމުތައް ޑައިރެކްޓް ކުރާ ސިވާގެ ތަމަޅަ ފިލްމު "އަންނާތޭ" އަކީ ޖެކީ ގެ ކުރިއަށް އޮތް ފިލްމެވެ. ޖެނުއަރީ މަހު ދެއްކި "ސަތާޔާ ސައި ބާބާ" ، "ފާމުއިސް' އަދި 'ޝަކްތީ" އަކީ ޖެކީގެ އެންމެ ފަހުގެ ފިލްމުތަކެވެ.