އިންޑިއާގެ މަޝްހޫރު އެޕިކް ސްޓޯރީ "ރާމަޔާނާ"ގެ މައްޗަށް ހަދާ ދެ ފިލްމު އަންނަ އަހަރު ބެލުންތެރިންނަށް ފެނިގެންދާނެކަމަށް މިހާރު މިވަނީ ބެލެވެން ފަށާފައެވެ. މީގެތެރެއިން އެއް ފިލްމަކީ އޯމް ރާތޫ ޑައިރެކްޓްކޮށް ސައިފް އަލީ ޚާން، ޕްރަބާސް އަދި ކްރިތީ ސެނަން ލީޑް ރޯލުން ފެނިގެންދާނެ ފިލްމެވެ. އަނެއް ފިލްމަކީ އަލޫކާކިކް ދެސާއީ ޑައިރެކްޓްކުރާ ފިލްމެކެވެ.
އޯމް ރާތޫ ޑައިރެކްޓް ކުރާ ފިލްމު 'އަދިޕްރޫޝް' އަށް ބަލާއިރު އެންމެ ފަހުން މީޑިއާގައި ފިލްމާއި ބެހޭގޮތުން ދެކެވުނު ވާހަކައަކީ ޓީވީ އެކްޓަރ އަދި ބިގް ބޮސް ސީޒަން 13 ކާމިޔާބުކުރި ސިދާތް ޝުކުލާއަށް ފިލްމުގައި މުހިއްމު ރޯލެއް ހުށަހެޅި ވާހަކަތަކެވެ. އެހެންނަމަވެސް ސިދާތު މި ވާހަކަތައް ދޮގުކުރެއެވެ. އެނާ ބުނީ ޕްރޮޑިއުސަރުން އޭނާއާއި އެއްވެސް ވާހަކައެއް ދައްކާފައި ނުވާކަމަށެވެ.
ހިންދީ އަދި ތެލުގޫ ބަހުންވެސް ހަދާ މި ފިލްމު ޕްރޮޑިއުސް ކުރަނީ ޓީ ސީރީޒް އަދި ރެޓްރޯފައިލްސްއެވެ. ފިލްމުގައި ޕްރަބާސް ފެނިގެންދާނީ އަދިޕުރޫޝްގެ ރޯލުންނެވެ. ދެން ލީޑުން ފެނިގެންދާނީ ސައިފް އާއި ކްރިތީއެވެ.
ތްރީޑީކޮށް ދައްކަން ހަމަޖެހިފައިވާ މި ފިލްމަކީ ހިންދީ ސިނަމާގައި މިހާތަނަށް ހަދާ އެންމެ އަގު ބޮޑު ފިލްމަށްވާނެކަމަށް ޚަބަރުތައް ބުނެއެވެ. އަންނަ އަހަރުގެ އޯގަސްޓް މަހު ފެނިގެންދާނެކަމަށް ބުނެފައިވާ މި ފިލްމު ރިލީޒްކުރަން އަދި ހަމަޖެހިފައި އޮތީ ސިނަމާތަކުގައެވެ.