ދެވަނަ ފަހަރަށް ރެއާލް މެޑްރިޑް ދޫކޮއްލަން ޖެހުނީ ކުލަބުން އޭނާއަށް އިތުބާރު ނުކުރާކަން އިހްސާސް ކުރެވޭތީ ކަމަށް ޒައިނުއްދީން ޒިދާން ބުނެފިއެވެ.
ސްޕެއިނުގެ ނޫހެއް ކަމަށްވާ އޭއެސް އިން ވަނީ ޒިދާން އެ ކްލަބްގެ ސަޕޯޓަރުންނަށް ފޮނުވި ސިޓީއެއް ހިއްސާކޮށްފައެވެ. އެ ސިޓީގައި ޒިދާން ބުނީ 2018 ވަނަ އަހަރު އެންމެ ފުރަތަމަ އޭނާ ރެއާލް ދޫކޮށްލީ ވަރަށް ރަނގަޅަށް އެ ކްލަބް ކުރިއަރުވައި ކާމިޔާބީގެ އެންމެ މަތީ ފަންތީގައި ބޭއްވުމަށް ފަހު ކަމަށެވެ. އެހެންނަމަވެސް ދެ ވަނަ ފަހަރު ޓީމު ދޫކޮށްލަން ޖެހުނީ މުޅިން ތަފާތު ހާލަތެއް އޮއްވައި ކަމަށް ޒިދާން ވަނީ ބުނެފައެވެ.
ރެއާލަކީ އެންމެ މަތީ ލެވަލްގައި އޮންނަން ޖެހޭ ކްލަބަކަށް ވެފައި އޭނާ ހުރެ އެކަން އެގޮތަށް ނުކުރެވޭއިރު މަގާމުގައި ދެމިހުންނަން ބޭނުންނުވީ ކަމަށް ޒިދާން ވަނީ ބުނެފައެވެ. ޒިދާން ވަނީ ސެވިއްޔާ އާއި ރެއާލް އެއްވަރުވި މެޗުގައި މި ސީޒަނަށް ފަހު ދެން އޭނާ ރެއާލްގެ ކޯޗުގެ މަގާމުން ނުފެންނާނެ ކަމަށް ކުޅުންތެރިން ގާތުގައި ބުނެފައެވެ. ސީޒަން ނިމުނުތަނާ ޒިދާން ވަނީ ދެ ވަނަ ފަހަރަށް ރެއާލް ދޫކޮށްލަން ނިންމިކަން ކްލަަބަށް އަންގައި މަގާމު ދޫކޮށްލައިފައެވެ. ރެއާލް ކޯޗުކަން ފުރަތަމަ ދޫކޮށްލިތާ އަހަރެއް ނުވަނިސް ޒިދާން އެ ޓީމާ ދެ ވަނަ ފަހަރަށް ހަވާލުވީ 2019 ވަނަަ އަހަރުގެ މާޗް މަހުގައެވެ. މިއީ މިދިޔަ 10 އަހަރު ތެރޭ ރެއާލުން ތަށްޓެއް ނުލިބި ސީޒަނެއް ނިންމާލި ފުރަތަމަ ފަހަރެވެ.