ހިންދީ، ތަމަޅަ އަދި ތެލުގޫ ފިލްމުތަކުންވެސް ފެންނަ ބޮލީވުޑްތަރި ތާޕްސީ ޕަންނާގެ ކުރިއަށް ހުރި ފިލްމުތަކުގެ ތެރޭގައި ސްޕޯރޓްސް ޑްރާމާ ފިލްމު "ރަޝްމީ ރޮކެޓް" ބަޔޯޕިކް ފިލްމު "ޝާބަޝް މީތޫ" މިސްޓްރީ ތްރިލަރ "ހަސީން ދިލްރުބާ" ތްރިލަރ ފިލްމު "ދޮބާރާ" އަދި އެކްޝަން ކޮމެޑީ ރޮމޭންސް ފިލްމު "ލޫޕް ލަޕޭޓާ" ހިމެނެއެވެ.
މި ފިލްމުތަކުގެ އިތުރުން ތާޕްސީ އަނެއްކާވެސް ތްރިލަރ ފިލްމެއް ކުޅުމަށް މިވަނީ ސޮއިކޮށްފައެވެ. ކޯޓް ޑްރާމާ ފިލްމު "ސެކްޝަން 375" ގެ ޑައިރެކްޓަރ އަޖޭ ޕާލް ޑައިރެކްޓްކުރާ މި ފިލްމާއި ބެހޭ މާގިނަ ވާހަކަތަކެއް އަދި ތިލައެއް ނުވެއެވެ.
"ސެކްޝަން 375" ބެލުމަށްފަހު ޑައިރެކްޓަރ އަޖޭގެ މަސައްކަތަށް ތާފްސީ ވަނީ ވަރަށް ބޮޑަށް ތަޢުރީފު ކޮށްފައެވެ. އަދި އަޖޭ އާއެކު މަސައްކަތްކުރަން ބޭނުންވާކަމަށްވެސް ތާފްސީ ވަނީ ބުނެފައެވެ. މިވާހަތަކަށް ދެކެވިފައި ވަނިކޮށް ޑައިރެކްޓަރ އަޖޭއަށް އަލަށް ލިބުނު ފިލްމުގައި ތާފްސީ ހިމަނަށް އޭނާ ބޭނުންވިއެވެ. އަދި މިކަން ޕްރޮޑިއުސަރުންނަށް އަންގާ ތަފްސީއަށް ފިލްމުން ލީޑް ރޯލު ދިނުމަށް އަޖޭވަނީ ޕްރޮޑިއުސަރުން އެއްބަސްވެސް ކުރުވާފައެވެ.
ފިލްމުގެ ސްކްރިޕްޓް ބެލުމަށްފަހު ތާފްސީވެސް ވަނީ މި ފިލްމުގައި ސޮއިކޮށްފައެވެ. ފިލްމުގައި ފިރިހެން ލީޑްރޯލުން ފެނިގެންދާނީ 'ހޭޓް ސްޓޯރީ' އަދި 'ހަންޓަރ' އިންވެސް ފެނިގެންދިޔަ ކަރްނާޓަކާ އެކްޓަރ ގުލްޝަން ދޭވިއާކަމުގައި ޚަބަރުތައް ބުނެއެވެ.