ބޮލީވުޑް ތަރި ޝިލްޕާ ޝެޓީ، ޕަރޭޝް ރާވަލް މީޒާން ޖެފަރީ، ޕްރަނީތާ ސުބާޝް ރާޖްޕާލް ޔާދަވް އަދި މަނޯޖް ޖޯޝީ ފެނިގެންދާ ކޮމެޑީ ފިލްމު "ހަންގާމާ 2" ގެ ސެޓެލައިޓް ރައިޓްސް ނުލާ 30 ކްރޯޑް ރުޕީސްއަށް ޑިޒްނީ ޕްލަސް ހޮޓްސްޓާއަށް ވިއްކާލައިފިއެވެ.
ޑިޖިޓަލް ޕްރިމިއަރ އަކަށް ދާން ކުރިން ނިންމާފައިވާ މި ފިލްމު ވިއްކާލުމުން ލިބޭ ޖުމްލަ ފައިދާ 36 ކްރޯޑް ރުޕީސްއަށް އަރާކަމަށް ބައެއް މީޑިއާތަކުން ރިޕޯޓްކުރެއެވެ. މީގެ އިތުރުން ފިލްމުގެ މިޔުޒިކާއި އެހެނިހެން ގޮތުން ބޮޑު ޢަދަދެއްގެ ފައިދާއެއް ފިލްމު ޕްރޮޑިއުސްކުރާ ވީނަސްއަށް ވަނީ ލިބިފައެވެ.
މީޑިއާތަކުން ދާދިފަހުން ރިޕޯޓްކޮށްފައިވާ ގޮތުގައި ހޮރޯ ކޮމެޑީ "ބޫތް ޕޮލިސް" ގެ ސެޓެލައިޓް އަދި ޑިޖިޓަލް ރައިޓްސްވެސް ވަނީ 60 ކްރޯޑް ރުޕީސްއަށް ޑިސްނީ ޕްލަސް ހޮޓް ސްޓާއަށް ވިއްކާލާފައެވެ.
"ހަންގާމާ 2" އަކީ 2003 ވަނަ އަހަރު ދެއްކި ކާމިޔާބު ފިލްމު "ހަންގާމާ" ކަހަލަ މަޖާ ފިލްމެކެވެ. އަދި މިއީ ހަތް އަހަރަށްފަހު ޑައިރެކްޓަރ ޕްރިޔާދަރްޝަން ޑައިރެކްޓްކުރާ ފުރަތަމަ ފިލްމެވެ. އޭނާ އެންމެފަހުން ޑައިރެކްޓްކުރި ހިންދީ ފިލްމަކީ 2013 ވަނަ އަހަރު ދެއްކި "ރަންގްރޭޒް" އެވެ. މީގެއިތުރުން ފިލްމު "އަޕްނޭ" އަށްފަހު 13 އަހަރުވަންދެން ފިލްމެއް ނުކުޅެހުރުމަށްފަހު ޝިލްޕާ ޝެޓީ ފެނިގެންދާ ފުރަތަމަ ފިލްމަކީވެސް މި ފިލްމެވެ.