މާލޭ ސްޓްރީޓް ސްކޭޕިކް މަޝްރޫޢުގެ ފުރަތަމަ މަރުޙަލާގައި ކުރަމުން އަންނަ މަސައްކަތް އެއްކޮށް ނިންމާ މަގުތައް އަންނަ ހަފްތާގެ ތެރޭގައި ހުޅުވާލެވޭނެ ކަމަށް ރޯޑް ޑިވެލޮޕްމަންޓް ކޯޕަރޭޝަނުން ހާމަކުރައްވައިފިއެވެ. މިމަޝްރޫޢުގެ ދަށުން އެންމެ ފުރަތަމަ މަސައްކަތްކުރަމުން އަންނަނީ މާފަންނު ހުޅަނގު ސަރަޙައްދުގައެވެ.
މާލޭގެ މަގުތައް ޒަމާނީ ފެންވަރަށް ތަރައްޤީ ކުރުމަށް ކުރަމުން އަންނަ މަސައްކަތުގެ ދަށުން މިދިޔަ އަހަރު ފެށި ސްޓްރީޓް ސްކޭޕިންގ މަޝްރޫޢު އެންމެ ފުރަތަމަ ފަށާފައިވަނީ މާފަންނު ހުޅަނގު ސަރަޙައްދުގައެވެ. ކަނބާ އައިސާރަނި ހިނގުމުން މަސައްކަތް ފަށާ އެމަގުތައް ހުޅުވާލުމަށްފަހު އިތުރު ދެމަގެއްގެ މަސައްކަތް ކުރަމުން އަންނަނިކޮށްވަނީ މަސައްކަތް ހުއްޓާލަން ޖެހިފައެވެ.
މާލެ ސްޓްރީޓްސްކޭޕިންގ މަޝްރޫއުގެ ސެގްމަންޓް 1 މަސައްކަތް މިހާރު ކުރިއަށްދަނީ.މަސައްކަތް ލަފާކުރެވޭ ގޮތުގައި ޖޫން 15 ވަނަ ދުވަހު މަގު އެއްކޮށް އާމުންނަށް ހުުޅުވާލެވޭނެ . ހަނދުވަރީ ހިގުމުގެ ބުލޮކް 1 އަދި 2 މިހާރުވެސް ވަނީ އާމުންނަށް ހުޅުވާލެވިފައި. #ޓީމްއާރުޑީސީ pic.twitter.com/9pGI1gKiz5
— Road Development Corporation Ltd (@rdcmaldives) June 9, 2021
ޕީއެސްއެމް ނިއުސްއަށް މަޢުލޫމާތު ދެއްވަމުން އާރްޑީސީން ވިދާޅުވީ މަސައްކަތް އެއްކޮށް މެދުކަނޑާލަން ޖެހުނީ ކޯވިޑް-19އާއެކު އެޗްޕީއޭއިން ފިޔަވަޅުތައް ވަރުގަދަ ކުރުމުންކަމަށެވެ. އެހެންނަމަވެސް މިދުވަސްވަރު މަގުތަކުގައި މީހުން މަދުވުމާއެކު މަސައްކަތް އަވަހަށް ނިންމުމަށް ކަމާބެހޭ ފަރާތްތަކާއި މަޝްވަރާކޮށްގެން މަސައްކަތް އަލުން ފަށާފައިވަނީ މިމަހުގެ ފުރަތަމަ ދުވަހުއެވެ. ހަނދުވަރީ މަގުގެ އެއްވަނަ ބްލޮކާއި ދެވަނަ ބްލޮކްގެ މަސައްކަތް ނިމިފައިވާއިރު މިހާރުކުރިއަށްދަނީ ތިންވަނަ ބްލޮކާއި ހަތަރުވަނަ ބްލޮކްގެ މަސައްކަތެވެ. އާރްޑީސީން ވިދާޅުވީ މިމަގުތަކުގެ އަޑީގައި ކުރަންޖެހޭ މަސައްކަތްތައް މިހާރު ކުރަމުން އަންނަކަމަށެވެ. އަދި ހުރިހާ މަސައްކަތެއް ނިންމާ މިމަހުގެ 15 ވަނަ ދުވަހު މާފަންނުގެ ހުރިހާ މަގެއް ހުޅުވާލާނެކަމަށެވެ.
މާލޭގެ މަގުތަކަށް ދިމާވެފައިވާ މައްސަލަތައް ޙައްލުކުރުމަށް ކުރިޔަށްގެންދާ ސްޓްރީޓް ސްކޭޕިންގ މަޝްރޫޢުގައި މާފަންނުގެ މަގުތަކަށްފަހު ހެންވޭރުގެ މަގުތަކުގެ މަސައްކަތް ފެށުމަށް މާލެ ސިޓީ ކައުންސިލުންވަނީ ނިންމާފައެވެ. މިމަޝްރޫއުގެ ދަށުން މާލޭގެ 416 މަގެއް ޒަމާނީ ފެންވަރަށް ތަރައްޤީކޮށް ނިންމުމަށްވަނީ ހަމަޖެހިފައެވެ. އަދި އޭގެފަހުން މިމަގުތައް އަބަދު ކޮނެގެން އުޅެން ނުޖެހޭނެފަދަ ގޮތަކަށް މަގުތައްވަނީ ޑިޒައިންކޮށްފައެވެ. މިހުރިހާ މަގެއްގެ މަސައްކަތް 2023 ވަނަ އަހަރުގެ ކުރިން އެއްކޮށް ނިންމާލުމަށް ސަރުކާރުން އަންނަނީ މަސައްކަތްކުރަމުންނެވެ.