ޝަޚުސު އޮޅުވާލައިގެން ރާއްޖެއަށް އެތެރެވާން މަސައްކަތްކުރި މީހަކު މޯލްޑިވްސް އިމިގްރޭޝަނުން ހިފަހައްޓައިފިއެވެ.
މޯލްޑިވްސް އިމިގްރޭޝަނުން ވިދާޅުވީ ޝަޚުސު އޮޅުވާލައިގެން ރާއްޖެއަށް އެތެރެވާން މަސައްކަތްކޮށްފައިވަނީ ޢުމުރުން 30 އަހަރުގެ ފިރިހެނެއްކަމަށެވެ. ނަމަވެސް ވަގު ޕާސްޕޯޓެއްގައި ރާއްޖެއަށް އެތެރެވެފައިވަނީ ސީދާ ކޮން ޤައުމަކަށް ނިސްބަތްވާ މީހެއްކަމެއް މޯލްޑިވްސް އިމިގްރޭޝަނުން ހާމައެއް ނުކުރައްވައެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން އިމިގްރޭޝަނުން ވިދާޅުވީ ޔޫރަޕް މީހެއްގެ ޕާސްޕޯޓް ބޭނުންކޮށްގެން ރާއްޖެއަށް އެތެރެވާން މަސައްކަތްކޮށްފައިވަނީ މެދުއިރުމަތީގެ ޤައުމަކަށް ނިސްބަތްވާ މީހެއްކަމަށެވެ. މިމީހާ ރާއްޖެއަށް ގަވާއިދާ ޚިލާފަށް ވަންނަން މަސައްކަތްކޮށްފައިވަމީ މިމަހުގެ 6 ވަނަ ދުވަހުގައެވެ. އަދި އެދުވަހު އޭނާ އަނބުރާ ޤައުމަށްވަނީ ފޮނުވާލާފައިކަމަށް އިމިގްރޭޝަނުން ވިދާޅުވެއެވެ.
ޝަހުސު އޮޅުވާލައިގެން ރާއްޖެ އެތެރެވުމަށް މަސައްކަތްކުރި 30 އަހަރުގެ ފިރިހެނަކު ހުއްޓުވައިފި.#MaldivesBorderSecurity pic.twitter.com/ij9sLqSTZL
— Maldives Immigration (@ImmigrationMV) June 12, 2021
ގަވާއިދާ ޚިލާފަށް ޤައުމުތަކަށް މީހުން އެތެރެވުމަކީ ދުނިޔޭގެ ގިނަ ޤައުމުތަކަށް ދިމާވެފައިވާ ބޯޑަރ ސެކިއުރިޓީއާއި ގުޅޭ ބޮޑު މައްސަލައެކެވެ. އެހެންކަމުން ރާއްޖެއިންވެސް އަންނަނީ މިކަމުން ސަލާމަތްވުމަށް މަސައްކަތްކުރަމުންނެވެ. ގަވާއިދާއި ޚިލާފަށް ރާއްޖޭގެ ބޯޑަރު ހުރަސްކުރުން ހުއްޓުވާ ބޯޑަރ ސެކިއުރިޓީ އިތުރަށް ވަނީ ވަރުގަދަކޮށްފައެވެ. އެގޮތުން ރާއްޖެ އެތެރެވާ މީހުންނާއި ބޭރުވާ މީހުންގެ މަޢުލޫމާތު ދެނެގަތުމަށްޓަކައި 2013 ވަނަ އަހަރުން ފެށިގެން ބޭނުންކުރަމުން އަންނަ ޕަރސަނަލް އައިޑެންޓިފިކޭޝަން ސެކިއުއަރ ކޮމްޕެރިޒަން އެންޑް އިވެލުއޭޝަން ސިސްޓަމް، "ޕައިސިސް" ވަނީ 2019 ވަނަ އަހަރު އަޕްގްރޭޑްކޮށްފައެވެ.