މިދިޔަ މެއި މަހުގެ 6ވަނަ ދުވަހުގެރޭ ރައީސް ނަޝީދު އަވަހާރަކޮއްލަން ދިން ހަމަލާއާ ގުޅިގެން އެމަނިކުފާނަށް ފަރުވާދިން އޭޑީކޭ ހޮސްޕިޓަލުގެ ޑޮކްޓަރުން، ރައްޔިތުންގެ މަޖިލީހުން ކުރިއަށްގެންދާ އިންކުއަރީއަށް މަޢޫލޫމާތު ދެއްވައިފިއެވެ.
ރައްޔިތުންގެ މަޖިލީހުގެ ރައީސަށް ދެމުން ގެންދާ ސަލާމަތާއި ރައްކާތެރިކަން ބަލިކަށިވިގޮތް ހޯދުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ ނުވަތަ 241 ކޮމިޓީން ކުރިއަށް ގެންދާ ޕާލަމެންޓަރީ އިންކުއައިރީގައި އޭޑީކޭގެ ޑޮކްޓަރުންގެ ޓީމްއާ ސުވާލުކުރި ބައްދަލުވުންވެސް ކުރިއަށްގެންދިޔައީ ސިއްރުކޮށްގެންނެވެ.
މަޖިލީހަށް ވަޑައިގެން އޭޑީކޭގެ ޓީމުގައި ރައިސް ނަޝީދަށް ފަރުވާދެއްވުމުގައި އިސްކޮށް ހަރަކާތްތެރިވެވަޑައިގެންނެވި ޑރ.އަބްދުﷲ ނިޔާފާއި ޑރ.އަޙްމަދު ނިޝާން ހިމެނެއެވެ. އަދި އެހޮސްޕިޓަލުގެ މެނޭޖިން ޑިރެކްޓަރ މުޙައްމަދު އައްފާލާވެސް ކޮމިޓީންވަނީ ސުވާލުކޮށްފައެވެ.
ރައީސް ނަޝީދު އަވަހާރަކޮށްލުމަށް އެއްޗެއް ގޮއްވާލާ ދިން ޙަމަލާގައި އެމަނިކުފާނަށް ސީރިއަސް ޒަހަމްތަކެއް ލިބިވަޑައިގެން ގިނަ އޮޕަރޭޝަންތަކެއް ވަނީ ކޮށްފައެވެ. ރައީސް ނަޝީދަށް ހަމަލާދިނުމަށް ބޭނުންކުރި ބޮން ހަދާފައިވަނީ އެގައި ގިނަ އަދަދެއްގެ ރޭޒާފުކާއި އެހެނިހެން ގެއްލުންދޭ ތަކެތި ހިމަނައިގެންކަމުން، ބޮން ގޮއްވާލުމާއި އެކު މިތަކެތިވަނީ ރައީސް ނަޝީދުގެ ހަށިކޮޅުގެ ތެރެއަށް ވަދެފައެވެ. މިތަކެތި ނެގުމަށް އޭޑީކޭގެ ޑޮކްޓަރުންގެ ޓީމުންވަނީ 16 ގަޑިރުވަންދެން ސީރިއަސް އޮޕަރޭޝަންތަކެއް ކޮށްފައެވެ.
ޑޮކްޓަރުންގެ ޓީމުން މެއި 8 ގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ގޮއްވާލި ބޮމުން ބުރައިގެންދިޔަ ތޫނު ދަގަނޑު އެތިކޮޅުތަކުގެ ތެރެއިން އެތިކޮޅެއް، އެމަނިކުފާނުގެ ސީދާ ހިތަށް ނުވަދެ ހުރީ އެންމެ ސެންޓިމީޓަރެއްގެ ދުރުމިންކަމަށެވެ. އެ އެތިކޮޅު ރައީސް ނަޝީދުގެ ހިތަށް ނުވަދެ ސަލާމަތްވީ އެމަނިކުފާނުގެ މޭކަށިގަނޑުގައި ޖެހި ކަށިގަނޑު ފުނޑުފުނޑުވުމުގެ ސަބަބުން އެ އެތިކޮޅު އެތެރެއަށް ދިޔުން މަތަވެގެންކަމަށްވެސް ޑޮކްޓަރުން ވަނީ ވިދާޅުވެފައެވެ.
ރައީސް ނަޝީދަށް ލިބުވަޑައިގެން ޒަޚަމްތަކަށް ހައެއްކަ ދުވަސްވަންދެން އޭޑީކޭގައި ފަރުވާދީފައިވާއިރު، މިދިޔަ މަހުގެ 13ގައި ޖަރުމަނަށް ވަޑައިގެން އެމަނިކުފާނު މިހާރުވެސް ގެންދަވަނީ ލިބުނު އަނިޔާތަކަށް އެ ޤައުމުގެ ހޮސްޕިޓަލެއްގައި ފަރުވާ ހޯއްދަވަމުންނެވެ.
ޑޮކްޓަރުންގެ ޓީމުގެ އިތުރުން މަޖިލީހުގެ 241 ކޮމިޓީން ވަނީ ސަލާމަތީ ބާރުތަކުގެ އިސްފަރާތްތަކާއި އެކިއެކި އޮފިސަރުންގެ އިތުރުން ދަޢުލަތުގެ ބައެއް ވަޒިރުންނާއި، މިމައްސަލައާއި ގުޅިގެން މައުލޫމާތު ބޭނުންވާ އެކިއެކި ފަރާތްތަކާއި ސުވާލުކޮށްފައެވެ.
އިންކުއަރީއަށް ބޭނުންވާ ގިނަ މައުލޫމާތުތަކެއް މިހާރު އެއްކުރެވިފައިވާކަމަށާއި، މިިމަހުގެ ނިޔަލަށް އިންކުރީގެ ރިޕޯޓުއެކުލަވާލައި އާންމުކުރާނެކަމަށް 241 ކޮމިޓީންވަނީ ހާމަކޮށްފައެވެ.