ޕޭން އިންޑިއާ ބިގީ ޕްރޮޑިއުސްކުރާ ފިލްމު "އާރްސީ 15" ގެ މަސައްކަތް އަންނަ ސެޕްޓެމްބަރުގައި ފަށަން ނިންމައިފިއެވެ.
މިމަހު ޝޫޓިންތައް ފެށުމަށް ކުރިން ތާވަލުކޮށްފައިއޮތް ނަމަވެސް ކޯވިޑާއި ހެދި ޝޫޓިން ފެށުން އޮތީ ލަސްވެފައެވެ. ނަމަވެސް މިހާރު އަންނަ ސެޕްޓެމްބަރުމަހު ފުރަތަމަ ހަފްތާގައި ޝޫޓިންތައް ފެށުމަށް ތައްޔާރުވެފައިވާ ކަމަށް ޕްރޮޑަކްޝަން ޓީމުން ބުނެއެވެ.
ތެލުގޫ އެކްޓަރ ރާމް ޗަރަން ލީޑް ރޯލުން ފެނިގެންދާ މި ފިލްމުގެ އަންހެން ލީޑް ރޯލުން ފެންނާނީ "ކަބީރު ސިންގް" ގެ ތަރި ކިއަރާ އަދްވާނީއެވެ. ކިއަރާ ކުޅޭ ރޯލުގެ މާ ބޮޑު ތަފްސީލެއް އަދި ނޭގުނުނަމަވެސް ރާމް ޗަރަން މި ފިލްމުގައި ފެނިގެންދާނީ ޕޮލިސް އޮފިސަރެއްގެ ރޯލުންނެވެ. ނަމަވެސް ފިލްމުގެ ވާހަކަ ބިނާވެފައިވަނީ އެނާ ސިޔާސީ މީހަކަށްވުމުން ވާ ގޮތްތަކެއްގެ މައްޗަށެވެ.
ސައިންސް ފިކްޝަންގެ ގިނަ ފިލްމުތަކެއް ހަދާފައިވާ އެސް ޝަންކަރުގެ މި ފިލްމަކީ އެކްޝަން ޑްރާމާ ފިލްމެކެވެ.
"އާރްސީ 15" ގެ ޝޫޓިންތައް ނިންމާލުމަށްފަހު ޝަންކަރު ދެން އެންމެ އަވަހަށް ފަށާނީ ރަންވީރު ސިން ލީޑް ރޯލުން ފެނިގެންދާ ޝަންކަރުގެ ފިލްމު "އާޕާރިޗިޓް" ގެ މައްޗަށް ހަދާ ފިލްމެއްގެ މަސައްކަތެވެ. މި ފިލްމުގައިވެސް އަންހެން ލީޑް ރޯލުން ފެނިގެންދާނީ ކިއަރާ އެވެ.