ގްރޭޓާރ މާލޭ ސަރަހައްދުގައި ކެމިކަލްސް މެނޭޖުކުރާ މަރުކަޒެއް ގާއިމުކުރުމަށް ބޭނުންވާ ދިރާސާތައް ހެދުމަށް ޖަރުމަނުގެ ކުންފުންޏަކާ ޙަވާލުކޮށްފިއެވެ.
ވަރޗުއަލްކޮށް ބޭއްވި ރަސްމިއްޔާތެއްގައި މިއެއްބަސްވުމުގައި މިނިސްޓްރީ އޮފް އެންވަޔަރަމަންޓް ސައިންސް އެންޑް ޓެކްނޮލޮޖީގެ ފަރާތުން ސޮއިކުރެއްވީ މިނިސްޓަރ އާމިނަތު ޝައުނާއެވެ. ޖަރުމަނު ކުންފުނީގެ ފަރާތުން ސޮއިކުރެއްވީ އެކުންފުނީގެ އެގްޒެކިޓިވް ޑިރެކްޓަރު އެލެކްސެންޑަރ ބޯމްކަމަށް އެންވަޔަރަމަންޓް މިނިސްޓްރީއިން ވިދާޅުވެއެވެ. ޖަރުމަނުގެ ކުންފުނީގެ ސަބްކޮންސަލްޓެންޓެއްގެ ގޮތުގައި ރާއްޖޭގެ ރިނިއަބަލް އެނަރޖީ މޯލްޑިވްސް ޕްރައިވެޓް ލިމިޓެޑްވަނީ ހަމަޖައްސާފައެވެ.
މިއެއްބަސްވުމުގެ ދަށުން ގްރޭޓާރ މާލޭ ސަރަހައްދުގައި ކެމިކަލްސް މެނޭޖުކުރާ ފެސިލިޓީއެއް ގާއިމުކުރުމަށް ފީސިބިލިޓީ ސްޓަޑީ ތައްޔާރުކުމަށްވަނީ ހަމަޖެހިފައެވެ. މިމަޝްރޫޢު ކުރިއަށްގެންދަނީ ގްލޯބަލް އެންވަޔަރަންމަންޓް ފެސިލިޓީގެ މާލީ އެހީތެރިކަމާއެކުގައެވެ. "އެލިމިނޭޓިން ޕަރސިސްޓަންޓް އޯގަނިކް ޕޮލިއުޓަންޓަސް ތްރޫ ސައުންޑް މެނޭޖްމަންޓް އޮފް ކެމިކަލްސް" މަޝްރޫއުގެ ދަށުން، ގްރޭޓާރ މާލޭ ސަރަހައްދުގައި ކެމިކަލްސް މެނޭޖުކުރާ ފެސިލިޓީއެއް ގާއިމުކުރުމަށް ފީސިބިލިޓީ ސްޓަޑީ ތައްޔާރުކުމަށް ޖަރުމަނުގެ ކުންފުންޏާއެކު އެއްބަސްވެފައިވަނީ 6 މަސް ތެރޭގައި މަސައްކަތް ނިންމާގޮތަށެވެ.
މިއީ ޖުމްލަ 1.6 މިލިއަން ރުފިޔާގެ މަޝްރޫޢެކެވެ. އެންވަޔަރަމަންޓް މިނިސްޓްރީއިން ވިދާޅުވީ މި ފީސިބިލިޓީގައި، ދެމެހެއްޓެނިވި ގޮތެއްގައި ކެމިކަލްސް މެނޭޖްކުރާ ފެސިލިޓީ ހިންގޭނެ އިންތިޒާމުތައް ބަލައި ދިރާސާކުރުމާއި ފެސިލިޓީގެ އިންޖިނިއަރިންގ ޑިޒައިން ތައްޔާރު ކުރުން ހިމެނޭކަމަށެވެ. މިރަސްމިއްޔާތުގައި ވާހަކަދައްކަވަމުން އެންވަޔަރަމަންޓް މިނިސްޓަރ އާމިނަތު ޝައުނާ ވިދާޅުވީ ރާއްޖޭގެ އިޤްތިޞާދު ބިނާވެފައިވަނީ ގުދުރަތީ ވެއްށީގެ ރައްކާތެރިކަމުގެ މައްޗަށް ކަމަށެވެ. އެހެންކަމުން އެކަން ކަށަވަރުކުރުމަކީ މިއަދު ރާއްޖެއަށް ކޮންމެހެންވެސް ކުރަންޖެހޭކަމެއްކަމަށެވެ.
"މިކަމަކީ އާންމު ސިއްހަތާ، އަޅުގަނޑުމެންގެ ވަށައިގެންވާ ތިމާވެއްޓަށް އޭގެ ނޭދެވޭ އަސަރުކުރުވާ ކަމެއް. ރާއްޖެއަށް ބަލައިލާއިރު، ރާއްޖޭގެ އިގްތިސާދީ ބޮޑެތި ޞިނާޢަތްތައް ކަމުގައިވާ ފަތުރުވެރިކަމާއި މަސްވެރިކަން ބިނާވެފައި މި އޮތީ ތިމާވެށްޓާ. ދިވެހިރާއްޖޭގެ ގޮނޑުދޮށްތަކުގެ ރީތިކަމާއި ސާފުކަމާއި، ފަރުތަކުގެ ރީތިކަމާއި ސާފުކަމާއި، ދިރުން މިއީ ފަތުރުވެރިކަމުގެ ބިންގާ. އެހެން ކަމުން ރާއްޖެއަށް ކުރިމަތިވެފައިވާ ތިމާވެށީގެ މައްސަލަތަކުގެ ތެރެއިން ރަނގަޅު ގޮތުގައި ކެމިކަލް މެނޭޖުކުރުމަކީ މިއަދު އަޅުގަނޑުމެން ނުހަނު ސަމާލުކަން ދޭން ޖެހިފަވާ ކަމެއް." މިނިސްޓަރ ވިދާޅުވިއެވެ.
ފެސިލީޓީ ގާއިމުކުރުމުން ނުރައްކާތެރި ކުނީގެ ބާވަތްތައް ވަކި ކުރެވި ނުރައްކާތެރި ކުންޏާއި ކެމިކަލްސް މެނޭޖުކުރުމަށް ރާއްޖެއިން ކަނޑައަޅާފައިވާ ސިޔާސަތުތަކާއި ހަދާފައިވާ ގާނޫނުތަކާއި ގަވާއިދުތަކާއި އެއްގޮތަށް ބައިނަލްއަގުވާމީ މިންގަނޑުތަކަށް ފެތޭގޮތަށް ތިމާވެއްޓަށް ގެއްލުން ކުޑަކޮށް ކެމިކަލްސް އަދި ނުރައްކާތެރި ކުނި މެނޭޖްކޮށް، ދިވެހިރާއްޖޭގައި މެނޭޖުނުކުރެވޭނެ ފަދަ (މަރކިއުރީ އެކުލެވޭ) ކުނީގެ ބާވަތްތައް މި ފެސިލިޓީގައި ރައްކާކޮށް، ބޭރުގެ ފެސިލިޓީތަކަށް ގެންގޮސް ރައްކާތެރި ގޮތުގައި މެނޭޖްކުރުމަށް ރާވާފައިވާކަމަށް މިނިސްޓްރީން ވިދާޅުވެއެވެ.
(ޕެސްޓިސައިޑް ބޭނުންކޮށްފައި ހުންނަ ކަންވާރު،ދަވާދު ހުސްވާ ފީފާ ނުވަތަ ކޮންޓެއިނަރ،ލެބޯރެޓަރީތަކުގައި ބޭނުންކުރާ މުއްދަތު ހަމަވެފައިވާ) ކެމިކަލްގެ ބާވަތްތައް ދެމެހެއްޓެނިވި އުސޫލުތަކާއި އެއްގޮތަށް މެނޭޖުކުރުމަށް މަގުފަހިވެގެންދާނެކަމަށްވެސް އެންވަޔަރަމަންޓް މިނިސްޓްރީއިން ވިދާޅުވެއެވެ. މީއާއެކު މިފަދަ ބާވަތްތަކުން ގުދުރަތީ ވެއްޓަށް ލިބޭ ގެއްލުން ކުޑަކުރެވިގެންދަނެކަމަށް އެންވަޔަރަމަންޓް މިނިސްޓްރީއިން ވިދާޅުވެއެވެ.