އަޔުޝްމާން ކުރާނާ އަދި ނުޝްރަތު ބަރުއްޗާ ފެނިގެންދިޔަ 2019 ވަނަ އަހަރުގެ ކޮމިކް ކެޕަރ "ޑްރީމް ގާރލް" ވެގެން ދިޔައީ ބޮޑު ކާމިޔާބަކަށެވެ. ބޮކްސް އޮފީހުގައި މި ފިލްމުގެ ވެގެންދިޔައީ އަޔުޝްމާންގެ އެންމެ ހިޓް ފިލްމަށެވެ. ފިލްމުގެ ފައިދާގެ ގޮތުގައި 142.26 ކްރޯޑް ރުޕީސް ވަނީ ލިބިފައެވެ.
އެކްތާ ކަޕޫރު ޕްރޮޑިއުސްކޮށްފައިވާ މި ފިލްމުގެ ޑައިރެކްޓްކޮށްފައިވަނީ ރާޖް ޝާންދިލްޔާއެވެ. ރާޖްގެ ޑައިރެކްޝަނަށް އެތައް ބައެއްގެ ތަރުހީބުވަނީ ލިބިފައެވެ. އަދި ފިލްމަށް ތައުރީފުކުރި ގިނަ މީހުން ބުނެފައިވަނީ އެ ފިލްމުން ހަނދާންވަނީ 90ގެ އަހަރުތަކުގައި މަޝްހޫރުވި އެކްޓަރ ގޯވިންދާގެ މަޖާފިލްމުތައްކަމަށެވެ.
މި ކާމިޔާބާއެކު މި ފިލްމުގެ ސީކުއަލް އެއް ހަދާ އުޅޭ ކަމުގެ ވާހަކަތައް ވަނީ ފެންމަތިވެފައެވެ. އޮރިޖިނަލް ފިލްމު ޑައިރެކްޓަރ ރާޖްގެ ޑައިރެކްޝަން ފެންނާނެ ކަމަށް ބެލެވޭ މި ފިލްމުގެ ސްކްރިޕްޓްގެ މަސައްކަތް ރާޖް ކުރަމުން އަންނަކަމުގައިވެސް ޕްރޮޑަކްޝަން ޓީމުން ބުނެއެވެ. ނަމަވެސް އެހެން ފިލްމެއްގެ ސްކްރިޕްޓްގެ މަސައްކަތްވެސް ރާޖް ކުރަމުން އަންނާތީ ފުރަތަމަ މަސައްކަތް ފަށާނީ ކޮން ފިލްމެއްގެ ކަމެއް އަދި ނޭގެއެވެ.
މި ފިލްމުގައިވެސް ލީޑްރޯލުން ފެނިގެންދާނީ އަޔުޝްމާން ކަމަށާއި ނަމަވެސް އޭނާ އަދި ސްކްރިޕްޓް ނުބަލާ ކަމަށް ޓީމުން ބުނެއެވެ.
އަޔުޝްމާންގެ ކުރިއަށް ހުރި ފިލްމުތަކުގެ ތެރޭގައި "ޑޮކްޓަރ ޖީ" ، "ގޫގްލީ"، "އަނެކް" ، "ޗަންދީގަރް ކަރޭ އާޝިޤީ" ، "ޗޯޓީ ސީ ބާތް" ، "ޝޫޓް ދަ ޕިއާނޯ ޕްލޭޔަރ" އަދި "ބަދާއީ ހޯ 2" ހިމެނެއެވެ.