ހަނިމާދޫ އެއަރޕޯޓު ތަރައްޤީކުރުމުގެ މަޝްރޫޢާ މެދު ރައްޔިތުންގެ ކަންބޮޑުވުންތައް ޙައްލުކުރެއްވިއްޖެ: ރައީސްއޮފީސް
ހދ.ހަނިމާދޫ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢާ މެދު ރައްޔިތުންގެ ހުރި ކަންބޮޑުވުންތައް ޙައްލުކުރެއްވިއްޖެ ކަމަށް ރައީސުލްޖުމްހޫރިއްޔާގެ އޮފީހުން ހާމަކުރައްވައިފިއެވެ.
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު މިހާރު އުތުރުގެ އަތޮޅުތަކަށް ކުރައްވަމުންގެންދަވާ ދަތުރުފުޅުގައި މިއަދުވަނީ ހަނިމާދޫއަށް ވަޑައިގެން އެރަށުގެ ކައުންސިލްއާއި އަދި ރައްޔިތުންނާއި ބައްދަލުކުރައްވާފައެވެ. މިބައްދަލުކުރެއްވުމުގައި ތަރައްޤީއާއި ގުޅުންހުރި މަޝްރޫޢުތަކާއި ގުޅޭގޮތުންވަނީ މަޝްވަރާކުރައްވާފައެވެ.
އެގޮތުން ހަނިމާދޫ އިންޓަރނޭޝަނަލް އެއަރޕޯޓު ތަރައްޤީކުރުމާއި ގުޅޭގޮތުން ރައްޔިތުންގެ މެދުގައި ހުރި ކަންބޮޑުވުންތަކާއި މެދު މަޝްވަރާކުރެވި މިމަސައްކަތް ކުރިއަށްގެންދެވޭނެ ގޮތަކާމެދު މިހާރު އެއްބަސްވެވިފައިވާ ކަމަށް ސަރުކާރުން ހާމަކުރައްވައެވެ.
ހަނިމާދޫ އެއަރޕޯޓު ބޮޑުކުރުމަށް ރަށުގެ ބިމުން ބޮޑު ސަރަޙައްދެއް ނެގުމާއި ގުޅިގެން ކައުންސިލާއި މަޝްވަރާކުރުމަށްފަހު ގެންނަންޖެހޭ ބަދަލެއް ގެންނަން ތައްޔާރު ކަމަށް ސަރުކާރުން މީގެކުރިންވެސްވަނީ ހާމަކުރައްވާފައެވެ. އެގޮތުން މުޅި ޕްރޮޖެކްޓް ކޮމްޕްރޮމައިޒް ނުވާ ލެވެލް އެއްގައި ގެންނަންޖެހޭ ހުރިހާ ބަދަލެއް ރަށު ކައުންސިލުން ބޭނުންވާ ގޮތަށް ގެންނާނެ ކަމަށް ސަރުކާރުންވަނީ ވިދާޅުވެފައެވެ.
ރާއްޖެއާއި އިންޑިއާއިން ސޮއިކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓް އެއްބަސްވުމުގެ ދަށުން ހަނިމާދޫ އިންޓަރނެޝަނަލް އެއަރޕޯޓު ތަރައްޤީކުރުމަށް ވަރަށް އަވަހަށް ސޮއިކުރެވިގެންދާނެކަމަށް ސަރުކާރުން ވިދާޅުވެއެވެ.