އަޟްޙާ ޢީދަކީ މުސްލިމުންނަށް އަހަރުތެރޭ އަންނަ އެންމެ އުފާވެރި އެއް ދުވަހެވެ. މިޢީދަކީ އެންމެ ފޯރީގައި ދިވެހިން ޒަމާނުއްސުރެ ފާހަގަކުރާ ދިވެހިންގެ ބޮޑުޢީދެވެ. ކޯވިޑްގެ ބަލި މަޑުކަމުގެ ސަބަބުން މިދިޔަ އަހަރު އެއްވެސް ގޮތަކަށް ޢީދު ފާހަގަނުވިނަމަވެސް މިއަހަރުގެ އަޟްޙާ ޢީދު ދިވެހިން ދަނީ ފޯރީގައި ފާހަގަކޮށްފައެވެ.
އިސްލާމީ އުއްމަތަށް އަންނަ އެންމެ ބޮޑު ދެ ޢީދަކީ މުސްލިމުންގެ އުޅުމާއި ގުޅުން ރަނގަޅުކޮށް އުފާޅުކުރުމަށް މާތްﷲގެ ރަޙުމަތުން ދެއްވާފައިވާ އެންމެ ބޮޑު ދެދުވަހެވެ. މީގެތެރެއިން އަޟުޙާ ޢީދަކީ ޙައްޖުގެ މަތިވެރި މަނާސިކުތަކަށް ފަހު ލިބިގެންދިޔަ ރަޙުމަތަށްޓަކާ އުފާކޮށް އެކަން ފާހަގަކުރާ ދުވަހެވެ. މިއަހަރުގެ ފިތުރު ޢީދެކޭ އެއްފަދައިން އަޟްޙާ ޢީދުވެސް ފާހަގަކުރަން ޖެހިފައިވަނީ ތަފާތު ގޮތަކަށެވެ. ޒަމާނުއްސުރެ ރާއްޖޭގައިވެސް ކުލަގަދަކޮށް ފާހަގަކުރާ ބޮޑު ޢީދުގެ ކުލަ ކޯވިޑް-19އާއި ގުޅިގެން މިދިޔަ އަހަރު އެއްކޮށް އޮތީ ފަނޑުވެފައެވެ. އެހެންނަމަވެސް ކޭސްތައް މަދުވުމާއި ގުޅިގެން އެޗްޕީއޭއިން ދިން ލުއިތަކާއެކު މިއަހަރުގެ އަޟްޙާ ޢީދުގެ ފޯރި ކޯވިޑް ނެތް ގިނަ ރަށްރަށުން ވަނީ ފެނިގެންގޮސްފައެވެ.
ކޯވިޑްގެ ސަބަބުން މޮނީޓަރިންގެ ޙާލަތުގައި މިވަގުތު އޮތް 14 ރަށް ފިޔަވައި، އެހެން ރަށްރަށުގައި ކުލަޖެހުމާއި ފެންކުޅިކުޅުމާއި މާލި ކުޅުމާއި، ބޮޑު ބެރާއި ޢީދު މަޅިޖެހުމާއި ޢީދު ސައިހެދުން ވަނީ ކުރިއަށް ގެންގޮސްފައެވެ. ހަމައެހެންމެ ޢީދާ ގުޅިގެން ދިވެހިންގެ ސަޤާފަތުގެ ތެރެއިން ކުރިއަށްގެންދާ ތަފާތު ހަރަކާތްތައްވެސް ބައެއް ރަށްރަށުގައި ކުރިއަށްގެންގޮސްފައިވެއެވެ. އަދި ޢީދު ފާހަގަކުރުމަށް ރަށުން ބޭރުން އައިސްތިބި މެހެމާނުންނަށް މަރުޚަބާ ކިޔުމާއި، ޢީދު ހަދިޔާ ބެހުމުގެ ހަރަކާތްތައްވެސް ވަނީ ކުރިއަށްގެންގޮސްފައެވެ. މި ހަރަކާތްތަކުގައި ކުދި ބޮޑު އެންމެން ދަނީ ބައިވެރިވަމުންނެވެ.
އަތޮޅުތެރެއެކޭ އެއްފަދައިން މާލޭގައިވެސް ޢީދާ ގުޅުވައިގެންވަނީ ބައެއް ކަންކަން ކުރިއަށް ގެންގޮސްފައެވެ. އެހެން އަހަރުތަކުގައި ބާއްވާ ޢީދުގެ ބޮޑެތި ޝޯވްތަކާއި ޕެރޭޑުތައް ނުބޭއްވި ނަމަވެސް މާލެ ސިޓީ ކައުންސިލުން މިއަދު ހަވީރު 4 އަކުން ރޭގަނޑު 8 ޖެހުމާހަމައަށް ފައިމަގުގައި އުޅޭ ދުވަހެއްގެ ގޮތުގައި ހަމަޖެއްސުމުން އެތައް ދުވަހެއް ވަންދެން ގޭގައި ބަންދުވެގެން ތިބި ގިނަ ކުޑަކުދިންތަކަކަށް ހިތްގައިމު ވަގުތަކަށް ޢީދު ދުވަހުގެ ހަވީރު ވަގުތު ވަނީ ވެފައެވެ. މިއާއެކު ކުޑަކުދިންނާއި ޢާއިލާތައް ވަނީ މިނިވަންކަމާއެކު ޢާއްމުކޮށް ވެހިކަލްތަކުން ތޮއްޖެހިފައި އޮންނަ މާލޭގެ މަގުތަކުގައި އަމާންކަމާއެކު ވަގުތު ހޭދަކޮށްފައެވެ.
އަޟްޙާ ޢީީދާ ގުޅިގެން ޙަރަކާތްތައް ކުރިއަށް ގެންދިޔަ ނަމަވެސް އެޗްޕީއޭއިން ވަނީ ރައްކާތެރިވުމަށް އިލްތިމާސްކުރައްވާފައެވެ. އެގޮތުން ދަތުރުކުރުމުގައިވެސް އެކުގައި އުޅޭ މީހުން ފިޔަވައި އިތުރު މީހުންނާއި ބައްދަލު ނުވާނެހެން ކަންކަން އިންތިޒާމުކޮށް، ރަށްރަށުގައި އުޅޭއިރުވެސް ގައިދުރުކަން އިސްކުރުމަށް ވަނީ އިލްތިމާސްކޮށްފައެވެ. އެހެންނޫންނަމަ ބަލީގެ އިތުރު ރާޅެއް އައުމުގެ ފުރުސަތު އޮތްކަމަށްވެސް އެޗްޕީއޭއިން ވިދާޅުވެއެވެ.