ޑުވޭން ޖޯންސަން އާއި އެމިލީ ބްލަންޓް ފެނިގެންދާ ފިލްމު "ޖަންގަލް ކްރޫޒް" އަށް އެމެރިކާގެ ބޮކްސް އޮފީހުގައި ބޮޑު ތަރުހީބެއް ލިބިއްޖެއެވެ.
ފިލްމު އެޅުވި ފުރަތަމަ ހަފްތާގައި މުޅިދުނިޔެއިން 61.8 މިލިއަން އެމެރިކާ ޑޮލަރު ވަނީ ލިބިފައެވެ. އޮންލައިން ޕްލެޓްފޯމުން ފިލްމަށް 30 މިލިއަން އެމެރިކާ ޑޮލަރު ލިބިފައިވާއިރު މުޅި ޖުމްލަ މި ފިލުމަށް މިހާތަނަށް ވަނީ 91.8 މިލިއަން އެމެރިކާ ޑޮލަރު ލިބިފައެވެ.
ކޯވިޑްގެ ބަލިމަޑުކަމުގެ ތެރޭގައި ރިލީޒްކުރި މި ފިލުމަށް 47 މާކެޓަކުން 27.6 މިލިއަން އެމެރިކާ ޑޮލަރު ވަނީ ލިބިފައެވެ. ނަމަވެސް ބަލިމަޑުކަމުގެ ކުރީގެ ދުވަސްތަކާއި އަޅާބަލާއިރު މިއީ އަދިވެސް ވަރަށް ދަށް ޢަދަދެކެވެ.
"ޖަންގަލް ކްރޫޒް" އަކީ މަޖާ އަދި އާއިލާއާއިއެކީ ބަލާލަން ރަގަޅު ފިލްމުކެވެ. ޖޯންސަން އާއި ބްލަންޓްގެ އިތުރުން ޖެކް ވައިޓްހޯލް ލީޑްރޯލުން ފެނިގެންދާ މި ފިލްމަށް ކްރިޓިކުންގެ ފަރާތުންވެސް ވަނީ ރަގަޅު ތަރުހީބެއް ލިބިފައެވެ.
މި ފިލްމުގެ އިތުރުން ވިން ޑީސަލްގެ "ފާސްޓް އެންޑް ފިޔޫރިއަސް 9" އާއި ސްކާލެޓް ޖޮހަނަސްގެ މާވެލް ފިލްމު "ބްލެކް ވިޑޯ" އަށްވެސް ވަނީ ރަގަޅު ތަރުހީބެއް ލިބިފައެވެ.
މީގެއިތުރުން ދާދިފަހުން އެމެރިކާގައި ރިލީޒްކުރި ބިޔަ ފިލްމު ޑީސީ އެކްސްޓެންޑެޑް ޔުނިވާރސްގެ "ސޫސައިޑް ސްކްއެޑް" އަށްވެސް ވަނީ ބެލްޖިއަމް، ފަރަންސޭސިވިލާތް، އަޔަރލޭންޑް، ސްވިޓްޒަރލޭންޑް، ތުރުކީވިލާތް އަދި އިނގިރޭސިވިލާތުން 7 މިލިއަން އެމެރިކާ ޑޮލަރު ހޯދާފައެވެ.