ވެރިކަންކުރާއިރު ރައްޔިތުންނަށް ބޭނުންވާ ޚިދުމަތްތައް ފޯރުކޮށްދިނުމައްޓަކައި މަޖިލީހުގެ މެޖޯރިޓީ މުހިއްމުކަމަށާއި، މިއަދު މަސައްކަތް ކުރައްވަމުންގެންދަވަނީ ރައްޔިތުންގެ މަޖިލީހުގެ މެޖޯރިޓީއާއެކުކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވެރިކަންކުރާ މައިޕާޓީ ދެބައިވެފައިވާކަން ޕާޓީގެ އިސް ބައެއް ބޭފުޅުންގެ ވާހަކަފުޅުތަކުން ހާމަވާކަމަށް ބުނެ ނޫސްވެރިއަކު ދެންނެވި ސުވާލެއްގެ ޖަވާބުގައި ރައީސް ވިދާޅުވީ ސިޔާސީ ބައެއް ކަންކަމުގައި ރައީސް ނަޝީދާއި އެމަނިކުފާނާ ބައެއް ފަހަރު ޚިޔާލުތަފާތުވާކަމަށެވެ. އެގޮތުން ރައީސް ނަޝީދު ވެރިކަމުގައި ހުންނެވިިއިރު ނިންމެވި ބައެއް ނިންމެވުންތައް ކަމުނުގޮސްގެންވެސް އެކަންކަމުގެ ވާހަކަ ރައީސް ނަޝީދާއި ޙިއްސާކުރެއްވިކަމަށް އެމަނިކުފާނު ވިދާޅުވިއެވެ. ނަމަވެސް ވެރިކަމުގައި ހުންނަވާއިރު ރައީސް ނަޝީދުވެސް އަދި އެމަނިކުފާނުވެސް ކަންކަމުގައި ގޮތް ނިންމަވާނީ ވަރަށް ބޮޑަށް ވިސްނެވުމަށްފަހު، އަދި ވަރަށް ގިނަ ކަންތައްތައް ބެއްލެވުމަށްފަހުކަމަށް ވިދާޅުވިއެވެ.
ރައީސް ޞާލިހް ވިދާޅުވީ މިހާރު އެމަނިކުފާނު ނިންމަވާ ބައެއް ނިންމެވުންތަކާއި ރައީސް ނަޝީދު ޚިޔާލުތަފާތުވީނަމަވެސް ސަރުކާރު ހިންގަން ހުރި ވެރިއެއްގެ ހައިސިއްޔަތުން އެމަނިކުފާނު ކަންކަން ނިންމަވަންވަންޖެހޭނީ ވަރަށް ގިނަ ކަންކަމާއި މައުލޫމާތުތަކުގެ މައްޗަށް ބިނާކޮށްކަމަށް ރައީސް ޞާލިޙް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ވެރިކަމުގައި ހުންނައިރު، ރައްޔިތުންނަށް ބޭނުންވާ ޚިދުމަތްތައް އެންމެ ރަނގަޅުގޮތުގައި ފޯރުކޮށްދެއްވުމަށް ރައްޔިތުންގެ މަޖިލީހުގެ މެޖޯރިޓީ ނުހަނު މުހިއްމުވާކަމަށެވެ.
ރައީސް ޞާލިހު ވިދާޅުވީ 2008 ވަނަ އަހަރުން ފެށިގެން އުފެދުނު ހުރިހާ ސަރުކާރުުތަކަށް މަޖިލީހުގެ މެޖޯރިޓީއަކީ ކިހާ މުހިއްމު އެއްޗެއްކަން ހާމަވެފައިވާކަމަށެވެ. އަދި މަޖިލީހުގެ މެޖޯރިޓީ ނެތުމުން ދިމާވާ ދަތިތައް އެމްޑީޕީގެ ފުރަތަމަ ސަރުކާރުންވެސް ފެނިގެންދިޔަކަމަށް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު ވެރިކަމުގައި ހުންނައިރު މަޖިލީހުގެ މެޖޯރިޓީ ސަރުކާރަށް އޮންނަން ބޭނުންފުޅުވާކަމަށާއި ކުރިއަށް އޮތްތަނުގައިވެސް މަސައްކަތްކުރައްވާނީ މެޖޯރިޓީ ދިފާޢުކުރެއްވުމުގައިކަމަށެވެ.
"އިރާދަކުރެއްވިއްޔާ މިއަދު އަޅުގަނޑުމިހުރީ މަޖިލީހުގެ މެޖީރިޓީއާއެކީގައި. އެހެންވީމަ ސަރުކާރުން ސުމޫތުކޮށް ރައްޔިތުންނަށް ބޭނުންވާ ޚިދުމަތްތައް ފޯރުކޮށްދިނުމަށްޓަކައި ރައްޔިތުންގެ މަޖިލީހުގެ މެޖޯރިޓީ އަޅުގަނޑު ހިފަހައްޓާނަން" ރައީސް ޞާލީޙް ވިދާޅުވިއެވެ.
ނޫސްވެރިންގެ ބައްދަލުވުމުގައި ރައީސް ޞާލިޙް ވަނީ އެމަނިކުފާނަކީ އެމްޑީޕީގެ މެމްބަރެއްކަމާއިމެދު ވިލުފުށި ދާއިރާގެ މެމްބަރު ހަސަން އަފީފް ޝައްކު އުފެދޭ ގޮތަށް ދެއްކެވި ވާހަކަފުޅުތަކަށްވެސް އަލިއަޅުއްވާލައްވާފައެވެ. އެގޮތުން އެމަނިކުފާނަކީ އެމްޑީޕީ އުފެދުނީއްސުރެ އެޕާޓީގައި ދެމިހުންނެވި ފަރާތަކަށްވާއިރު، ޙަސަން އަފީފު ފަދަ އެމްޑީޕީގެ އިސް ބޭފުޅަކު އެފަދަ ވާހަކަތަކެއް ދެއްކެވުމަކީ ބަލަންޖެހޭކަމެއްކަމަށް އެމްޑީޕީގެ ޗެއަރޕާސަންއަށް ދަންނަވާފައިވާކަމަށެވެ،
ވެރިކަމަށް ވަޑައިގަތީ ކޯލިޝަނެއްގެ ތެރެއިންކަން އިޝާރާތްކުރައްވަމުން ރައީސް ވިދާޅުވީ ވެރިކަންކުރާއިރު ކޯލިޝަންގެ އިސްފަރާތްތަކާއި އެމަނިކުފާނު ކުރައްވަންޖެހޭ މަޝްވަރާތައް ކުރައްވަމުންގެންދަވާނެކަމަށެވެ.