ސަރުކާރުން ހިންގަވާ މަޝްރޫޢުތަކަށް ބޭރު ޤައުމުތަކުންނާއި، ޖަމްޢިއްޔާ ޖަމާޢަތްތަކުން ދޭ އެހީތަކާއި ލޯނު އެހީގެ ފައިސާ ވަކި އެކައުންޓުތަކެއްގައި ބަހައްޓަވާގޮތަށް މާލިއްޔަތު ޤާނޫނަށް ހުށައެޅުއްވި އިޞްލާޙުގެ ބިލް ރައީސުލްޖުމްހޫރިއްޔާ ތަސްދީޤްކުރައްވައިފިއެވެ.ރައީސް މިއަދު ތަސްދީޤްކުރެއްވި އިޞްލާހުގައި ވަނީ، ދައުލަތުގެ އެންމެހާ ފައިސާ ބަހައްޓަން ވާނީ އެ މާއްދާގައި ބަޔާންކޮށްފައިވާ ޕަބްލިކް ބޭންކް އެކައުންޓެއްގައި ކަމަށެވެ. ނަމަވެސް ބައެއް ހާލަތްތަކުގައި ޕަބްލިކް ބޭންކް އެކައުންޓުގެ އިތުރުން އިތުރު އެކައުންޓެއް ނުވަތަ އެކައުންޓުތަކެއް ހުޅުވައި ދައުލަތުގެ ފައިސާ ބެހެއްޓުމުގެ އިޚުތިޔާރު މިނިސްޓަރަށް ލިބިގެންވާކަމަށެވެ. އަދި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ މަރުކަޒެއް ނުވަތަ އެ އޮތޯރިޓީގެ އެކައުންޓެއް އޮތް ބޭންކެއް ވެސް ނެތް ރަށެއްގައި ހިނގާ ދައުލަތުގެ އޮފީހަކުން ދައުލަތުގެ ފައިސާ ބެހެއްޓުމަށްޓަކައި އެކައުންޓެއް ހުޅުވަންޖެހޭނެކަމަށްވެސް މި އިސްލާހުގައިވެއެވެ.ރައީސް މިއަދު ތަސްދީޤްކުރެއްވި މި އިޞްލާހުގައި ވަނީ، ދައުލަތުގެ ފައިސާގެ ތެރެއިން ވަކި މަޝްރޫއަކާ ގުޅޭ ފައިސާ ވަކި އެކައުންޓެއްގައި ބެހެއްޓުމަށް ރައީސުލްޖުމްހޫރިއްޔާ ކަނޑައަޅުއަވަންޖެހޭނެ ކަމަށެވެ.މާލިއްޔަތު ޤާނޫނަށް ރައްޔިތުންގެ މަޖިލީހުން ގެނައި މި އިސްލާހު ސަރުކާރުގެ ފަރާތުން މަޖިލީހަށް ހުށައެޅީ ގެމަނަފުށީ ދާއިރާގެ މެންބަރު ޖަމީލް އުޘްމާންއެވެ.މި އިޞްލާހު ރައީސް ތަސްދީޤްކުރެއްވުމާއި ގުޅިގެން ވަނީ ސަރުކާރުގެ ގެޒެޓުގައި ޝާޢިއުކުރައްވާފައެވެ.