ރާއްޖޭގައި ކުޑަކުދިން ބޭނުންކޮށްގެން ކުށްކުރުވާ މީހުންނަށް ދެވެންއޮތް ހުރިހާ އަދަބެއް ދޭން މަސައްކަތްކުރާނެކަމަށް ޕްރޮސެކިއުޓަރ ޖެނަރަލް ޙުސައިން ޝަމީމް ވިދާޅުވެއްޖެއެވެ.
ޕްރޮސެކިއުޓަރ ޖެނަރަލް ޙުސައިން ޝަމީމް މިހެން ވިދާޅުވީ މިދިޔަ ޖޫން މަހުގެ ތެރޭގައި 13 އަހަރުގެ ކުއްޖަކަށް ޖިންސީ އަނިޔާކޮށް ރަހުމް ކުޑަގޮތަކަށް މަރާލި މައްސަލައިގެ ދައުވާކުރުމަށް ނިންމައި، އެކަމާއި ގުޅޭގޮތުން ވާހަކަފުޅުދައްކަވަމުންނެވެ.
13 އަހަރުގެ ކުއްޖަކު ރަހީނުކުރުމަށްފަހު އެކުއްޖާއަށް ޖިސްމާނީ އަނިޔާދީ ރަހުމްކުޑަ ގޮތަކަށް މަރާލުމަށްފަހު، ފޮއްޓެއްގެ ތެރެއަށްލައި ހުޅުމާލެ ދެވަނަ ފިޔަވަހީގެ އިރުއުތުރު ފަޅުތެރެއަށް އެއްލާލާފައި އޮއްވާ ފެނުނީ މިދިޔަ ޖޫންމަހުގެ 21 ވަނަ ދުވަހުގެ ރޭގެ ވަގުތެއްގައެއެވެ.
މިމައްސަލައިގެ ތަހުޤީގު ނިންމާފައިވާނީ 13 އަހަރުގެ ކުއްޖާގެ ގިނަ ޓެސްޓުތަކާއި، ޕޯސްޓްމޯޓަމްގެ އިތުރުން މައްސަލައިގެ ވަށައިގެންވާ އެތައްކަމެއް ބެލުމަށްފަހުގައެވެ. ޕްރޮސެކިއުޓަރ ޖެނަރަލް ހުސައިން ޝަމީމް ވިދާޅުވީ ރަހުމްކުޑަ ގޮތަކަށް 13 އަހަރުގެ ކުއްޖާ މަރާލި މައްސަލައިގެ ތަފްސީލްތައް ފެނުމުން އެމަނިކުފާނަށްވެސް ވަރަށް އުނދަގޫފުޅުވިކަމަށެވެ. މައްސަލައިގެ ތަޙުޤީގު ރިޕޯޓު ކިޔާލުމުންވެސް އުނދަގޫ އިހުސާސްތަކެއް ކުރެވުނުކަން ހާމަކުރައްވަމުން ޝަމީމް ވިދާޅުވީ މިމައްސަލައިގެ މައުލޫމާތު ހާމަކުރެވޭނީވެސް ޤާނޫނުތަކާއި ޤަވާއިދުތައް ތަންދޭ މިންވަރުންކަން ކަމަށެވެ. އަދި މިމައްސަލައިގަ ހިނގާފައިވަނީ ރާއްޖޭގައި އެއްގޮތަކަށްވެސް ހިނގައިގެންވާނޭ ކަހަލަ ކަމެއް ނޫންކަމަށްވެސް ޝަމީމް ވިދާޅުވިއެވެ.
ޝަމީމް ވިދާޅުވީ މިމައްސަލައިގައި ދައުވާކުރާ މީހުންގެ ތެރޭގައި ކުޑަކުއްޖަކު ހިމެނޭއިރު، ކުޑަކުދިން ބޭނުންކޮށްގެން ކުށްކޮށްގެން ސަލާމަތްވާނޭކަމަށް ބައެއް ފަރާތްތަކުން ދެކުނުކަމަށްވިޔަސް، އެކަމަށް ޖާގަ ނުދެއްވާނެކަމަށެވެ.
"މިގޮތަށް ކުޑަކުދިން ބޭނުންކޮށްގެން، ކުޑަކުދިންލައްވައި ކުށްކުރުވާ މީހުންނަށް ވަރަށް ސާފު މެސެޖެއް ދޭން ބޭނުންވޭ. އެސަކަރާތެއް ނުޖެހޭނޭ. އަޅުގަނޑު މިމަޤާމުގައި ހުރެގެން އެގޮތަށް އެކަންކުރަން ޖަގައެއް ނުދޭނަން. ހަމަކިރިޔާވެސް ދަޢުވާއެއް ކުރެވެންއޮތިއްޔާ އެކަހަލަ ކަންކަމުގައި އުޅޭމީހުންގެ މައްޗަށް ދަޢުވާކުރާނަން" ޕޮރޮސިކިއުޓަރ ޖެނަރަލް ވިދާޅުވިއެވެ.
ޖޫން މަހުގެ ފަހުކޮޅު މަރާލި 13 އަހަރުގެ ކުއްޖާގެ މައްސަލައިގެ ތަހުޤީގު ނިންމައި ދެމަހެއްހާ ދުވަހުގެ ތެރޭގައި ދަޢުވާކުރަން ފޮނުވިފައި މިވަނީ ގިނަ އަދަދެއްގެ އާންމުންގެ ހީނުކުރާވަރުގެ ހިތްވަރުގަދަ އަމަލުތަކާއިވެސް އެކުކަމަށް ޕީޖީ ވިދާޅުވިއެވެ. އަދި މިފަދަ ޖަރީމާތައް ހުއްޓުވައި ކުށްކުރާ މީހުން އިންސާފުގެ ކުރިމައްޗަށް ގެނައުމަށް އާންމުންގެ ޒިންމާވެސް އޮތްކަން ޕީޖީ ފާހަގަކުރެއްވިއެވެ.
"ޤަބޫލުކުރަންޖެހޭ ހުރިހާ ކަމެއް ފުލުހުންނަކަށް ނުކުރެވޭނެކަން. އެހެންވީމަ އާންމުންގެ ބޮޑު ރޯލެއް އެބައޮތް. މިމައްސަލައިގައިވެސް މިހިސާބަށް ދެވުނީ އެކުއްޖާ ފެނުނީވެސް އާންމުން ރިޕޯޓުކުރީމަ. އެހެންވީމަ އެކަހަލަކަމެއް ދިމާވެގެން އުޅެންޏާ ފުލުހުންނަށް ރިޕޯޓުކުރައްވާށޭ." ޕީޖީ ޝަމީމް ވިދާޅުވިއެވެ.
ޕީޖީ ވިދާޅުވީ މިމައްސަލަވެސް ކޯޓުގައި ސާބިތުކުރަން ފަސޭހަވާނީ މައްސަލައިގެ ޝަރީޢަތް އަވަސްކޮށްގެންކަމަށެވެ.
މިމައްސަލައިގަ 13 އަހަރުގެ ކުއްޖާއަށް އަނިޔާކޮށް މަރާލުމުގައި ބައިވެރިވި 17 އަހަރުގެ ކުޑަ ކުޑަކުއްޖާއާއި ނ. ލަންދޫ، ބަގީޗާގެ، އިބްރާހީމް ޒިހާނަށް ދަޢުވާކުރަން ކްރިމިނަލް ކޯޓަށާއި ޖުވެނައިލް ކޯޓަށް މިހާރުވަނީ ހުށަހަޅާފައެވެ.
މިގޮތުން ޒިހާންގެ މައްޗަށްވަނީ ޤަސްދުގައި މީހަކު މެރުން، ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ޤަޞްދުގައި އަތްލުމުގެ 5 ދަޢުވާ، ކުޑަކުއްޖަކަށް މަސްތުވާއެއްޗެއް ދީގެން، އެ ކުއްޖާއާއެކު، ޖިންސީ ޢަމަލެއް ހިންގުމިގެ ދަޢުވާގެ އިތުރުން، ކުޑަކުއްޖަކަށް ޖިންސީ ގޯނާކުރުމަށްޓަކައި އެކުއްޖާ ގްރޫމްކުރުމުގެ ދަޢުވާއާއި ހުއްދަނޫން ގޮތުގައި މީހަކު ހިފެހެއްޓުމާއި، މައްޔިތާގެ ބޭނުން ނަހަމަ ގޮތުގައި ކުރުމުގެ ދަޢުވާއަކާއި، ޖިނާއީ ކުށެއް ކުރުމުގައި ކުޑަކުއްޖަކު ބޭނުންކުރުމުގެ ކުށުގެ 3 ދަޢުވާ ހިމެނޭހެން ޖުމަލް 13 ދަޢުވާ އުފުލާފައެވެ. މި ދައުވާތަައް ސާބިތު ވެއްޖެނަމަ މީނާއަށް 100 އަހަރާ ގާތްކުރާ މުއްދަތެއްޖެ ޖަލު ޙުކުމް އަންނާނެއެވެ.
މިމައްސަލައިގައި ހިމެނޭ 18 އަހަރު ނުފުރޭ ކުއްޖާގެ މައްޗަށް ޤަސްދުގައި މީހަކުމެރުމާއި، ހުއްދަނޫން ގޮތުގައި މީހަކު ހިފެހެއްޓުމުގެ އިތުރުން، މައްޔިތާގެ ބޭނުން ނަހަމަ ގޮތުގައި ކުރުމުގެ ދަޢުވާ ޖުވެނައިލް ކޯޓަށް ވަނީ ހުށައަޅާފައެވެ.