ހިޔާ ފްލެޓްތަކުގެ ގޭބިސީތަކުން އުފެދޭ ކުނިވާޒާތުގެ ކުނި އެޅުމަށް ޚާއްސަ ސަރަޙައްދުތަކެއް ކަނޑައަޅައިފިއެވެ.
މިފަދަ ކުނި އެޅުމަށް ޓަވަރުތައް ހިމެނޭ 6 ސަރަޙައްދެއްގައި ވަނީ ޑަސްބިން ބަހައްޓާފައެވެ.
ހިޔާ ފްލެޓްތަކަށް މީހުން ދިރިއުޅުން ބަދަލުކުރިނަމަވެސް، މާލޭ ސަރަޙައްދުގައި ކުނި އުކާލުމުގެ ޚިދުމަތްދެމުން އަންނަ ވެމްކޯގެ ޚިދުމަތްތައް އާއްމު އުސޫލުން އެ ޓަވަރުތަކަށް ފަށާފައެއް ނުވެއެވެ.
ހިޔާ ފްލެޓް ސަރަޙައްދުގައި އިމާރާތްކުރުމުގެ މަސައްކަތުގައި އުފެދޭ ކުނި އެޅުމަށް ޚާއްސަ ސަރަޙައްދުތަކެއް އެޗްޑީސީން ވަނީ ކަނޑައަޅާފަވެއެވެ. ނަމަވެސް ހިޔާ ޓަވަރުގެ އެކި ސަރަޙައްދުތަކުގައި ގޭގޭގައި އުފައްދާ ކުނިވާޒާތުގެ ކުނި ބަހައްޓަމުންދާތީ، އެ މައްސަލަ ޙައްލުކުރުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީއާއި ވޭސްޓް މެނޭޖްމަންޓް ކޯޕަރޭޝަން ވެމްކޯ ގުޅިގެން ވަނީ ފަށާފައެވެ.
އެގޮތުން ހިޔާ ޓަވަރުތައް ހިމެނޭ 6 ސަރަޙައްދެއްގައި، ކުނިވާޒާތުގެ ކުނި އެޅުމަށް މިހާރު ވަނީ ޑަސްބިންތައް ބަހައްޓާފައެވެ. އެގޮތުން ކޮންމެ ސަރަޙައްދެއްގައި 5 ޑަސްބިނާއެކު ޖުމްލަ 30 ޑަސްބިން ވަނީ، ގޭގެއިން އުފައްދާ ކުނިވާ ޒާތުގެ ކުނި އެޅުމަށް ބަހައްޓާފައެވެ.
ޑަސްބިން ބަހައްޓާފަވާ ސަރަޙައްދުތަކަކީ ހިޔާ-05، ހިޔާ-08، ހިޔާ-09، ހިޔާ-12، ހިޔާ-13 އަދި ހިޔާ-16 ޓަވަރު ހިމެނޭ ސަރަޙައްދެވެ. މި ޑަސްބިންތަކަށް އެއްކުރާ ކުނި، ވެމްކޯއިން ކޮންމެ ދުވަހަކުވެސް އުކާލާނެއެވެ. މިއީ ކުނީގެ މައްސަލަ ޙައްލުކުރުމަށް ވަގުތީގޮތުން އަޅާފައިވާ ފިޔަވަޅެކެވެ.
ހިޔާ މަޝްރޫޢުގެ ފްލެޓުތައް ހިމެނޭ އެއްމެދު ޢިމާރާތްތަކުގެ ފުލެޓު ތަކުން އުފެ ދޭ ކުނިވާޒާތުގެ ކުނި އެޅުމަށް ޚާއްސް ސަރަހައްދުތައް.
— HDC (@hdcmaldives) October 3, 2021
އިތުރު ތަފްސީލް: https://t.co/eokCDvFIxeހިޔާ-މަޝްރޫޢުގެ-ފްލެޓުތައް-ހިމެނޭ-އެ/ pic.twitter.com/pba8SYh5AW
ވެމްކޯއިން ވިދާޅުވީ އާއްމު އުސޫލާ އެއްގޮތަށް، ފްލެޓާ ހަމައިން ކުނި އުކާލުމުގެ ޚިދުމަތްދިނުމުގެ މަސައްކަތް ފެށުމަށް ތައްޔާރުވަމުންދާކަމަށެވެ. އަދި މި މަސައްކަތް ފެށުމަށް ވާންޖެހޭ ތައްޔާރީތައް މިހާރު ފަށާފައިވާކަމަށެވެ.
ހައުސިން ޑިވެލޮޕްމަންޓް ކޯޕަރޭޝަން އެޗްޑީސީން ވަނީ، ހިޔާ ފްލެޓްތަކުގައި ދިރިއުޅޭ މީހުން އެ ޓަވަރަކާއި އެންމެ ގާތް ސަރަޙައްދެއްގަ ބަހައްޓާފައިވާ ޑަސްބިންތަކަށް ކުނި އަޅަމުން ދިއުމަށް އަންގާފައެވެ. މި ސަރަޙައްދުތަކުން ކުނި ނެގުމަށް ހަމަޖެހިފައިވަނީ ހެނދުނު 08:00އިން ފެށިގެން މެންދުރު 12:00ދެމެދުގެ ވަގުތުގައެވެ. އެހެންކަމުން ފްލެޓްގައި ދިރިއުޅޭ މީހުންނާއި މަސައްކަތް ކުރަމުންދާ މީހުން ގަޑިއަށް ސަމާލްކަންދީ ކަނޑައެޅިފަވާ ވަގުތުގެ ކުރިން ޑަސްބިންތަކަށް ކުނި އެޅުމަށް އެޗްޑީސީން ވަނީ އެދިފައެވެ.
އަދި ހިޔާ ފްލެޓްގެ އެއްވެސް ތަނެއްގެ އެތެރޭގައާއި، ފްލެޓް ހިމެނޭ ސަރަޙައްދުތަކުގަވެސް ގޭބީސީން އުފެދޭ ކުނި ނުބެހެއްޓުމަށް ފްލެޓްތަކުގެ ވެރިންނަށް ވަނީ އަންގާފައެވެ. އަދި ފްލެޓްތައް ހިމެނޭ ސަރަޙައްދަކީ ސާފު، ދުޅަހެޔޮ ތަނަކަށް ހެދުމުގައި އެންމެންގެ އެއްބާރުލުން ދިނުމަށް އެޗްޑީސީން އެދެއެވެ.