މޫސުމީ ބަދަލުތަކުން އަރައިގަތުމަށް ޤައުމުތަކުން ކުރާ ހޭދަ ކޮޕް26 ސަމިޓުގެ ސަބަބުން އިތުރުވެގެންދާނެކަމަށް ބެލެވޭކަމަށް އެންވަޔަރަންމަންޓް މިނިސްޓަރ އާމިނަތު ޝައުނާ ވިދާޅުވެއްޖެއެވެ. މިނިސްޓަރ މިހެން ވިދާޅުވީ، ކޮޕް26 ސަމިޓުގެ ކުރިން އިނގިރޭސިވިލާތުގައި ހުންނަވައި ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ.
ކޮޕްސަމިޓާއެކު ކުރެވޭ އުންމިދުތަކާ ގުޅޭގޮތުން ވާހަކަފުޅުދައްކަވަމުން އެންވަޔަރަންމަންޓް މިނިސްޓަރ އާމިނަތު ޝައުނާ ވިދާޅުވީ، މޫސުމަށް އަންނަ ބަދަލުތަކަކީ ރާއްޖޭގެ ދެމިއޮތުމަށްވެސް އޭގެ އަސަރުކުރާ ކަމެއްކަމަށެވެ. މިނިސްޓަރުގެ ވާހަކަފުޅުގައި މޫސުމަށް އަންނަ ބަދަލުތަކާއެކު ރާއްޖޭގެ ރަށްތައް އިންތިހާއަށް ގިރައި، ރާއްޖޭގެ ކޮންމެރަށެއްގެ ފެންފަށަލަ ތަޣައްޔަރުވެފައި ވާކަމަށް ވިދާޅުވިއެވެ. މީގެއިތުރުން ފަރުތަކުގެ ދިރުން ނެތިގެންދާ ހިސާބަށްވެސް ގޮސްފައިވާކަން ފާހަގަކުރައްވައި މިނިސްޓަރ ޝައުނާ ވަނީ، ރާއްޖޭގެ އަޑު ދުނިޔެއަށް އިއްވުމަށް ވަރަށްބޮޑަށް މަސައްކަތްކުރެވެމުން އަންނަކަމަށް ވިދާޅުވެފައެވެ.
"އަޅުގަނޑުމެން ވަކާލާތު މިކުރަނީ މައިގަނޑު ގޮތެއްގައި ދެކަމަކަށް. އެއްކަމަކީ ދުނިޔޭގެ ހޫނުމިން 1.5 ޑިގްރީ ސެލްސިއަސްގައި ހިފެހެއްޓުމުގެ މުހިންމުކަން. ދެވަނަ ކަމަކީ ރާއްޖެއާ ރާއްޖެފަދަ އައިލެންޑް ނޭޝަންސްއަށް ލިބޭ ގެއްލުމުގެ ބަދަލާ އަދި އެކަންކަން ހައްލުކުރުމަށް ފައިސާ ޤައުމުތަކުން ވީހާވެސް އަވަހަށް ދޫކުރުމަކީ ވަރަށް މުހިންމުކަމެއް." މިނިސްޓަރ ޝައުނާ ވިދާޅުވިއެވެ.
ޤައުމުތަކުން އެފައިސާ އަވަހަށް ދޫނުކުރާނަމަ ރާއްޖެފަދަ ޤައުމުތަކުން އަމިއްލައަށް ހޯދާ ފައިސާ ޚަރަދުކުރަންޖެހެނީ ރަށްގިރުމާއި ފެންފަޝަލަ ތަޣައްޔަރުވުމާއި، އުދައެރުންފަދަ ބޮޑެތި ކަންކަން ހައްލުކުރުމަށްކަމަށްވެސް މިނިސްޓަރ ވިދާޅުވިއެވެ.
"ކްލައިމެޓް ފައިނޭންސިންގައި އެޓަޕްޓޭޝަނަށް ދޫކުރެވޭ ފައިސާގައި ޚާއްޞަ އަހަމިއްޔަތެއް ދެއްވާކަން މިހާރުވެސް ފާހަގަކުރެވޭ. އެހެންވީމަ އަޅުގަނޑު ޤަބޫލުކުރަނީ މިއީ އަޅުގަނޑުމެންގެ މަސައްކަތުން ހާސިލްކުރެވޭނެ ކަމެއްކަމަށްވާތީވެ އެޑަޕްޓޭޝަން ފައިނޭންސް އިތުރުކުރެވިގެން އަންނާނެކަމަށް." މިނިސްޓަރ ޝައުނާ ވިދާޅުވިއެވެ.
ކޮޕް26 ސަމިޓަކީ ރާއްޖޭގެ ދެމެހެއްޓެނިވި ތަރައްޤީގެ ޕްލޭންތައް ބައިނަލްއަޤްވާމީ މުޖްތަމަޢާ ޙިއްޞާކުރުމަށް ރާއްޖެއަށް ފަހިވެގެންދާ މުހިންމު ފުރުޞަތެކެވެ. ރާއްޖޭގެ ރައީސުލްޖުމްހޫރިއްޔާއަކީ، މޫސުމަށް އަންނަ ބަދަލުތަކާ ގުޅިގެން ކުދިޖަޒީރާ ޤައުމުތަކަށް ކުރިމަތިވާ ނާޒުކު ޙާލަތްތަކާއި ކުރިމަތިވާ މާލީ ދަތިކަމާބެހޭގޮތުން ބައިނަލްއަޤްވާމީ އެކި ފޯރަމްތަކުގައި ކުދިޖަޒީރާ ޤައުމުތަކުގެ ޙައްޤުގައި މިހާރު ވަކާލާތުކުރައްވަމުން ގެންދަވާ ލީޑަރެކެވެ. މީގެ އިތުރުން ދިވެހިރާއްޖެއިން ކުރިން ވަނީ 2030އާ ހަމައަށް އަންނައިރު ނެޓް ޒީރޯގެ ލަނޑުދަނޑި ހާސިލުކުރުމަށް އަމާޒުހިފާފައިވާކަން ވެސް އިޢުލާނުކޮށްފައެވެ.
ކޮޕް26ގެ ސަމިޓް އިންތިޒާމުކުރަނީ އިޓަލީވިލާތާ ގުޅިގެން އިނގިރޭސިވިލާތުންނެވެ. މި ސަމިޓަކީ ޕެރިސް އެގްރީމެންޓާއި، މޫސުމަށް އަންނަ ބަދަލުތަކާބެހޭ އދ.ގެ ފްރޭމްވަރކް ކޮންވެންޝަން އޮން ކްލައިމެޓް ޗޭންޖްގައި ކަނޑައަޅާފައިވާ ލަނޑުދަނޑިތަކަށް ވާޞިލުވުމަށްޓަކައި ފިޔަވަޅުތައް އެޅުން އަވަސްކުރުމަށް ކަމާބެހޭ ހުރިހާފަރާތްތައް އެއްތަންކުރުމުގެ ގޮތުން ބާއްވާ ސަމިޓެކެވެ. އެގޮތުން މި ސަމިޓްގައި ދުނިޔޭގެ 190އަށްވުރެ ގިނަ ޤައުމުތަކުން ލީޑަރުން ބައިވެރިވެވަޑައިގަންނަވާއިރު، އެތައް ހާސް ނެގޯޝިއޭޓަރުންނާއި، ސަރުކާރުތަކުގެ މަންދޫބުންނާއި، ވިޔަފާރިވެރިންނާއި، ޢާންމުފަރާތްތަކުން ބައިވެރިވެއެވެ.