ރާއްޖޭގައި ހުންނަ ސްޓޭޓް ބެންކް އޮފް އިންޑިޔާ، އެސް.ބީ.އައި އިން ދޫކުރާ އޭޓީއެމް ޑެބިޓް ކާޑު ރާއްޖެއާއި އިންޑިޔާ ފިޔަވައި އެހެން ގައުމުތަކުގައި މާދަމާއިން ފެށިގެން ބޭނުން ނުކުރެވޭނެކަމަށް އެ ބެންކުން ހާމަކޮށްފިއެވެ. އެސްބީއައިން މިގޮތަށް ނިންމާފައިވަނީ އެ ބޭންކުން ދޫކޮށްފައިވާ އޭޓީއެމް ޑެބިޓް ކާޑަކީ ދުނިޔޭގެ ކޮންމެ ގައުމެއްގެ މާސްޓާ ކާޑް އެސްޓާބްލިޝްމެންޓެއްގައި ބޭނުންކުރެވޭ ކާޑަކަށްވުމުން ސެކިއުރިޓީ މިންގަޑުތައް ދަށްްގައުމުތަކުގައި ޑެބިޓް ކާޑުގެ ބޭނުން ނަހަމަގޮތުގައި ހިފުމުގެ ފުރުސަތު އޮންނާތީއެވެ. ނަމަވެސް އެހެން ގައުމުތަކުގައި ކާޑު ބޭނުން ކުރަން އެދި ހުށަހެޅުމުން އެކަން ފަހިކޮށްދޭނެ ކަމަށް އެބޭންކުން ބުނެއެވެ. އެގޮތުން މިކަމަށް އެދި ހުށަހަޅާ ފޯމް އެސްބީއައިގެ ބްރާންޗުތަކާއި ބޭންކުގެ ވެބްސައިޓުން ލިބެން ހުންނާނެކަމަށް އެބޭންކުން މައުލޫމާތުދޭއެވެ. މިގޮތަށް އެދި ފޯމް ހުށަހަޅާާތާއި 48 ގަޑިއިރުތެރޭގައި އެޚިދުމަތް އެ ފަރާތަކަށް ލިބޭނެކަމަށްވެސް އެބޭންކުން މައުލޫމާތުދެއެވެ.