އެމެރިކާގައި ކުރިއަށްދާ ސީފުޑް އެކްސްޕޯގައި ބައިވެރިވެވަޑައިގަތުމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޑރ.ހުސެއިން ރަޝީދު ހަސަން އެމެރިކާއަށް ވަޑައިގަންނަވައިފިއެވެ.
މިމަހުގެ 13އިން 15އަށް ކުރިއަށްދިޔަ މިއެކްސްޕޯގެ ސަބަބުން ބޭރުގެ ބާޒާރުތަކުގައި ރާއްޖޭގެ މަސްވެރިކަން އިޝްތިހާރުކޮށް މާކެޓް ހޯދުމުގެ ފުރުސަތު ފަހިވެގެންދާނެކަމަށް ފިޝަރީޒް މިނިސްޓްރީން ވިދާޅުވެއެވެ. ހަމައެއާއެކު ރާއްޖޭގައި އުފައްދާ މަހުގެ ބާވަތްތަކަށް ބޭރުގެ މާކެޓްތަކުގައި އޮތް ފުރުސަތުތައް ދެނެގަނެވޭނެކަމަށްވެސް އެމިނިސްޓްރީން ވިދާޅުވެއެވެ. މީގެ ސަބަބުން ރާއްޖޭގައި މަސްވެރިން ބާނާ މަހަށް ހަމައަގެއް ހޯދައިދިނުމަށް ސަރުކާރުން ކުރާ މަސައްކަތަށް އިތުރު މަގުތަކެއް ފަހިވެގެންދާނެކަމަށްވެސް ފިޝަރީޒް މިނިސްޓްރީއިން ވިދާޅުވެއެވެ.
މިދަތުރުފުޅުގައި މިނިސްޓަރ ޑރ.ހުސެއިންއާއެކު ޑިރެކްޓަރ ޖެނެރަލް އާދަމް ޒިޔާދު ބައިވެރިވެވަޑައިގަންނަވައެވެ. އަދި ސީފުޑް އެކްސްޕޯއަށްފަހު ކެލިފޯނިއާގެ ޔުނިވަރސިޓީ އޮފް ސެންޓަ ބަރބަރާގެ ސައިންޓިސްޓުންނާ ބައްދަލުކޮށް ހިމާޔަތްކުރެވިފައިވާ ތަންތަނާއި ދެމެހެއްޓެނިވިގޮތެއްގައި މަސްވެރިކަންކުރެވޭނެ ގޮތްތަކާއި ގުޅޭގޮތުން މުހިއްމު މަޝްވަރާތަކެއް ކުރުމަށް ހަމަޖެހިފައިވާކަމަށް ފިޝަރީޒް މިނިސްޓްރީއިން ވިދާޅުވެއެވެ.
ރާއްޖޭގެ އިޤްތިޞާދު ތިންދަފާތުކޮށް ކުރިއެރުވުމަކީ ސަރުކާރުގެ މުހިއްމު ސިޔާތަކެވެ. މިގޮތުން މަސްވެރިކަމަށް ކުރިމަތިވެފައިވާ ދަތިތައް ހައްލުކޮށް ކުރިއެރޭނެ މަގުފަހިކުރުމަށް އަންނަނީ މަސައްކަތްކުރަމުންނެވެ. މީގެ އިތުރުން މަސްވެރިކަމަށް މިހާރަށްވުރެ ބޮޑު މާކެޓް ހޯދައިދީ ދިވެހި މަސްވެރިން ބާނާ މަހަށް ހަމައަގެއް ހޯދުމަކީވެސް ސަރުކާރުގެ އަމާޒެކެވެ. މިކަންކަމަށް ވާޞިލުވުމަށް ބައިނަލްއަޤުވާމީ އެކި ޕްލެޓްފޯމްތަކުގައި ރާއްޖެއިން އަންނަނީ މަސައްކަތްކުރަމުންނެވެ.