ފިޒިކަލް ފިޓްނެސް ދާއިރާގެ މީހުނަށް ހުނަރު ދައްކާލުމުގެ ފުރުސަތު ފަހިކޮށްދިނުމަށް ބާއްވާ ރޭސް "ވީރު2022"އަށް ސްޕޮންސަރ ކުރުމުގެ ފުރުސަތު ޕީއެސްއެމްއިން ހުޅުވާލައިފިއެވެ.
ޕީއެސްއެމްއާއި މޯލްޑިވްސް ޕޮލިސް ސަރވިސް ގުޅިގެން ކުރިއަށްގެންދާ މި ޕްރޮގްރާމްއަށް ސްޕޮންސަރ ކުރަންބޭނުންވާ ފަރާތްތަކަށް އަންނަ ބުރާސްފަތި ދުވަހުގެ މެންދުރު 1400ޖެހުމާއި ހަމައަށް އެޕްލިކޭޝަން ފޯމު ހުށައެޅުމުގެ ފުރުސަތުވަނީ ހުޅުވާލާފައެވެ. އެޕްލިކޭޝަން ފޯމު ހުށައަޅަންޖެހެނީ ޕީއެސްއެމްގެ ރޭޑިއޯ ބިލްޑިންއަށެވެ. އަދި އެޕްލިކޭޝަން ފޯމު ހުށައެޅުމަށް ބޭނުންވާ މަޢުލޫމާތާއި ގައިޑްލައިން ޕީއެސްއެމްގެ ވެބްސައިޓުގައި ހުންނާނެކަމަށް ޕީއެސްއެމުން ވިދާޅުވެއެވެ.
ވީރު ޕްރޮގްރާމްގައި 6 ބައިވެރިން 5 ރޭސް ފުރިހަމަކުރުމަށްވަނީ ހަމަޖެހިފައެވެ. މިރޭސްތައް ފަރުމާކޮށްފައިވަނީ ފުލުހުންގެ ތަޖުރިބާކާރު އިންސްޓްރަކްޓަރުންގެ އެހީތެރިކަމާއެކުގައެވެ. ޕްރޮގްރާމް ޝޫޓިން ކުރިއަށްދަނީ ދ.ވާނީގައި ހުންނަ ފުލުހުންގެ ތަމްރީން ހަދާ މަރުކަޒުގައެވެ. މި ޕްރޮގްރާމްގައި ބައިވެރިންގެ ހަށިގަނޑުގެ ވަރުގަދަކަމާއި ސްޕީޑާއި ބުންވަރު ވަޒަންކުރެވޭނެ ތީމްތަކަށް ރޭސްތައްވަނީ ބަހާލާފައެވެ.
މިއަހަރުގެ ރަމަޟާންމަހަށް އަމާޒުކޮށްގެން ކުރިއަށްގެންދާ ވީރު ޕްރޮގްރާމްގައި ޕީއެސްއެމްއާއި މޯލްޑިވްސް ޕޮލިސް ސަރވިސްއާއި ދެމެދުވަނީ އެއްބަސްވުމެއް ޤާއިމުކޮށްފައެވެ. މިއެއްބަސްވުމަކީ ވީރު ޕްރޮގްރާމް އުފެއްދުމުގައި ފުލުހުންގެ ފަރާތުން ބޭނުންވާ ފަންނީ އެހީތެރިކަން ފޯރުކޮށްދިނުމަށް ވެވުނު އެއްބަސްވުމެކެވެ. ޕްރޮގްރާމް ޝޫޓް ކުރުމުގެ މަސައްކަތް މިހާރު ކުރިއަށްދާއިރު ޕްރޮގްރާމް ސްޕޮންސަރކުރުމުގެ ފުރުސަތުވެސްވަނީ ހުޅުވާލާފައެވެ.