މެލޭޝިޔާގެ ވެރިރަށް ކުއާލަލަންޕޫރު ގެ ޓުއަރިސްޓް ސަރަހައްދު ތަކަށް ޙަމަލާއެއް އައުމުގެ ފުރުސަތު އެބައޮތްކަމަށް އެޤައުމުގެ ފެޑަރަލް ޓެރިޓަރީސް މިނިސްޓަރ އަދްނާން މަންސޫރް ވިދާޅުވެއްޖެއެވެ.އޭނާ މިހެން ވިދާޅުވީ އެޤައުމުގައި ބޮމުގެ ހަމަލާއެއް ދޭންއުޅުނު ކަމަށް ޝައްކު ކުރެވުނު މީހަކު ހައްޔަރުކޮށްފައި ވަނިކޮށެވެ. އަދި ދާދިފަހުން އަވަށްޓެރި އިންޑޮނީޝިޔާގައިވެސްވަނީ ޓެރަރިސްޓް ހަމަލާތަކެއް ދީފައެވެ.އަދްނާން މަންސޫރް ވިދާޅުވީ ބަޔެއް މަޤްބޫލް ޓުއަރިސްޓް ތަންތަނުގެ އިތުރުން ބަޔެއް ޝޮޕިންގ މޯލްތަކަށް ވެސް ޙަމަލާތައް އައުމުގެ ނުރައްކާތެރިކަން އެބައޮތް ކަމުގައެވެ. އެހެންކަމުން ތައްޔާރީ ހާލަތަށް އައިސްފައިވާކަމަށް މިނިސްޓަރު ވިދާޅުވިއެވެ. އަދި މިކަމުގައި ޑިފެންސް ޑިޕާޓްމަންޓް ގެ އެހީ ހޯއްދެވުމާމެދު ވިސްނަވަމުންގެންދަވާ ކަމަށްވެސް މެލޭޝިޔާގެ މިނިސްޓަރު ވިދާޅުވިއެވެ.މެލޭޝިޔާގެ ސަރުކާރުގެ އިމާރާތަކަށް ބޮމުގެ ހަމަލާއެއް ދޭންއުޅުނު ކަމުގެ ތުހުމަތުގައި އުމުރުން 28 އަހަރުގެ މީހަކު އިއްޔެ މެލޭޝިޔާގެ ފުލުހުން ހައްޔަރު ކޮށްފައިވެއެވެ. އިންޝުއަރަންސް އޭޖެންޓެއްގެ ގޮތުގައި މަސައްކަތް ކުރަމުން އައި މިމީހާއުޅުނީ އެކަނި ކަމަށްވެސް ރިޕޯޓްތައްބުނެއެވެ.