ކޮލަންބިއާގެ އެންމެ ބޮޑު ހަނގުރާމަވެރި ޖަމާއަތް ކަމަށްވާ "ފާކް" ޖަމާއަތާއި އެގައުމުގެ ސަރުކާރާ ދެމެދު ކުރިޔަށްދާ ސުލްޙައިގެ ވާހަކަތައް ކާމިޔާބުވެ ސުލްހައިގެ އެއްބަސްވުމަކަށް އާދެވިއްޖެނަމަ އެޖަމާއަތުގެ ހަނގުރާމަވެރިންގެ އަތުން ހަތިޔާރު ނިގުޅައި ގަތުމަށް "ފާކް" ޖަމާއަތުގެ އިސްވެރިންނާއި ކޮލަންބިއާ ސަރުކާރުން އެއްބަސްވެއްޖެއެވެ. ދެފަރާތުން ނެރުނު ގުޅިފައިވާ ބަޔާނެއްގައި ބުނެފައިވަނީ މީގެ 50 އަހަރު ކުރިން ފެށިގެން ކޮލަންބިއާގައި ހިނގަމުންދާ ހަނގުރާމަ ނިމުމަކަށް ގެނައުމަށާއި ހަނގުރާމަވެރިންގެ އަތުން ހަތިޔާރުތައް އަތުލުމުގެ ކަންތައް އިންތިޒާމް ކޮށްދިނުމަށް އދ. ގެ ސަލާމަތީ މަޖިލީހުގައި އެދުމަށް ދެފަރާތް އެއްބަސްވާ ކަމަށެވެ. ނަމަވެސް މިކަމަށް އެދި ސަލާމަތީ މަޖިލީހަށް ހުށަހެޅޭނީ ދެފަރާތުގެ ދެމެދުގައި މިހާރު ކުރިޔަށްދާ ސުލްހައިގެ ވާހަކަތައް ކޮޅެއްގައި ޖެހި ސުލްހައިގެ އެއްބަސްވުމެއްގައި ސޮއިކުރެވިގެން ކަމަށްވެސް މިބަޔާން ބުނެއެވެ. ކޮލަންބިއާގެ ރައީސް ޚުވާން މަނުއެލް ސަންޓޯސް ވަނީ މިއީ ސުލްހައިގެ ވާހަކަތަކަށް ލިބުނު ކުރިއެރުމެއް ކަމަށް ސިފަކުރައްވާފައެވެ.