ތޫނިސްގެ އިޤްތިސާދާއި އެޤައުމުގެ ވަޒީފާގެ ބާޒާރުގައި ފުރުޞަތުތައް މަދުވުމުގެ ސަބަބުން ތޫނިސްގައި
ކުރަމުންދާ މުޒާހަރާތަކާއި ހިނގަމުންދާ ހަމަނުޖެހުންތަކާއި ގުޅިގެން އެޤައުމުގެ ހުރިހާ
ސަރަހައްދެއްގައި ކާފިއު ހިންގުމަށް ތޫނިސްގެ ރައީސް ނިންމަވައިފިއެވެ.
މިކަން އިޢުލާނުކުރައްވައި، ޤައުމާއި މުޙާތަބުކުރައްވައި ދެއްވި ޚިތާބެއްގައި ތޫނިސްގެ ރައީސް ބާޖީ ކާއިދް އަސަބްސީ
ވިދާޅުވީ، ތޫނިސްގައި ކާފިއު އިޢުލާނުކުރީ ވޭތުވެދިޔަ 4 ދުވަހު އެޤައުމުގައި ކުރި
މުޒާހަރާތަކުގައި ދައުލަތާ ޢާއްމުންގެ މުދަލަށް ގެއްލުންދީ ހަދާފައިވާތީ ކަމަށާއި މިއީ ތޫނިސްގެ ސަރުކާރުން ބަލައިގަންނަނާނެ ކަމެއް ނޫން ކަމަށެވެ. އަސަބްސީ ވިދާޅުވީ،
ތޫނިސްގައި ވަޒީފާ ނެތް މީހުންގެ ހާލަތު ވިސްނިވަޑައިގަންނަވާ ކަމަށާއި ވަޒީފާއެއް ނެތުމަކީ މީހާ މުޅިން މާޔޫސްކޮށްލާނެ
ކަމެއް ކަމަށެވެ. އެހެން ނަމަވެސް މިފަދަ ކަމެއްގައި
ވެސް މުޒާހަރާތައް ކުރުމުން އެކަންކަން ހަމަނުޖެހުންތަކަށް ބަދަލުކުރުމަށް
މަސައްކަތް ކުރާނެ ފަރާތްތައް ތޫނިސްގައި އުޅޭ ކަމަށް އަސަބްސީ ވިދާޅުވިއެވެ.
ތޫނިސްގައި ވަޒީފާ ހޯދަން
އުދަނގޫ މައްސަލައިގައި ކުރަމުންދާ މުޒާހަރާތަކުގައި ވޭތުވެދިޔަ ދުވަސްތަކުގައި
ގިނަ އަދަދެއްގެ ކުރިމަތިލުންތަކެއްވެސް ހިނގާފައިވެއެވެ.