ގުރައިދޫ މަރުކަޒަށް ގެންދާ ގިނަމީހުން ރަނގަޅުވުމުންވެސް އާއިލާތަކުން ހަވާލުނުވޭ: މިނިސްޓަރ ޢައިޝާ
ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒަށް ގެންދިޔުމަށްފަހު އެމީހަކު ރަނގަޅުވުމުންވެސް ޢާއިލާތަކުން އަނބުރާ ގެންދަން ބޭނުން ނުވާ ކަމަށް މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދު ދިދީ ވިދާޅުވެއްޖެއެވެ. މިނިސްޓަރ ވިދާޅުވީ އެމަރުކަޒަށް ގެންދިޔުމަށްފަހު އެމީހަކު ނިމިގެންދަނީ އެމަރުކަޒުގައި ކަމަށްވުމީ ގުރައިދޫ މަރުކަޒުގެ ހަގީގަތްކަމަށެވެ.
ބައިނަލްއަޤުވާމީގޮތުން ފާހަގަކުރާ އުމުރުން ދުވަސްވީ މީހުންނަށް ކުރާ އަނިޔާއާއި ދެކޮޅަށް ހޭލުންތެރިކަން އިތުރުކުރުމުގެ ދުވަހާއި ގުޅިގެން ޖެންޑަރ މިނިސްޓްރީންވަނީ އެކި ޢުމުރުފުރާތަކުގެ މީހުންނަށް އަމާޒުކޮށް ފޯރަމެއް ބާއްވާފައެވެ. މިފޯރަމް ޝަރަފްވެރިކޮށްދެއްވާ ވާހަކަފުޅު ދައްކަވަމުން މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދު ދިދީވަނީ ގުރައިދޫ މަރުކަޒުގައި ތިބޭ މީހުންގެ ޙާލަތާއި އެތަނަށް މީހުން ގެންދިޔުމަށްފަހު ޢާއިލާތަކުން އަޅާނުލާކަމުގެ ކަންބޮޑުވުން ފާޅުކުރައްވާފައެވެ. އަދި މިއީ ބަދަލުކުރަންޖެހޭ ކަމެއްކަމަށާއި ފޯރަމްތަކުގެ ހަގީގީ މަޤްސަދަކީ މުޖުތަމަޢަށް ނުފެންނަ އެހެންނަމަވެސް އެމަރުކަޒުތަކުގައި ތިބި މީހުން އުފުލަމުންދާ ވޭނާއި ޝަކުވާއާއި ދައުލަތުން އުފުލާ މާލީ ބުރައަށް ޙައްލެއް ހޯދުންކަމަށް މިނިސްޓަރ ވިދާޅުވިއެވެ.
"އަޅުގަނޑުމެން މަރުކަޒަށް ދާ ކޮންމެ ދުވަހަކު އެމީހުން އަހާނެ ތިމަންނާގެ ދަރިންނާއި ދިމާވިހޭ، ބުނެދެއްޗޭ މިހާރު ތިމަންނަ ރަނގަޅޭ ދެން ގެންދަން ވީނޫންހޭ، އަޅުގަނޑުމެން ގުޅަން، ވަރަށް މަސައްކަތްކުރަން ޢާއިލާއާއި ހަވާލުކުރުމަށް، އެކަމަކު އެތަނަށް ދާ މީހަކު ނިޔާވެގެންދަނީ އެމަރުކަޒުގައި، ވަޅުލަނީ ގުރައިދޫ މަރުކަޒުގައި." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ދައުލަތުގެ ފަރާތުން އުމުރުން 65 އަހަރުން މަތީގެ މީހުންނަށް ދެމުންދާ 5000 ރުފިޔާއަކީ އެމީހުން މަސައްކަތް ނުކުރާ ޢުމުރަށް ދިޔުމުން ދިރިއުޅުމުގެ ޢާއްމު ބޭނުންތައް ފުއްދުމަށް ދައުލަތުން ވެދޭ އެހީއެއްކަމަށެވެ. އަދި އެއީ އެއްގޮތަކަށްވެސް ދަރިން މައިންބަފައިންނަށް ޚަރަދު ކުރަން ނުޖެހޭ ސަބަބެއް ނޫން ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ބަދަލުވަމުންދާ ދުނިޔޭގައި ދިވެހިންގެ އުޅުމާއި ގުޅުމަށް ބަދަލުތައް އަންނަމުންދާކަމަށެވެ. އޭގެ ސަބަބުން ހިތްދަތި އެތައްކަމެއް ދިމާވަމުންދާކަން މިނިސްޓަރވަނީ ފާހަގަކުރައްވާފައެވެ.
"5000 ރުފިޔާ ލިބުމަކީ ދަރިން މައިންބަފައިންނަށް ޚަރަދު އިތުރަށް ކުރަން ނުޖެހޭ ސަބަބެއް ނޫން. އެއީ އެމީހުން ޢުމުރުން ދުވަސްވެ މަސައްކަތްކުރުމުގެ މަގު ބަންދުވުމުން ޢާއްމު ބޭނުންތައް ފުއްދުމަށް ދައުލަތުން ދޭ އެއްޗެއް. ކޮންމެ މީހަކުވެސް ބޭނުންވާނެ އެމީހަކު ދަރިންނަށް ޚަރަދުކުރިހެން ދަރިންވެސް އެމީހުން މުސްކުޅިވީ ދުވަހު ޚަރަދު ކުރަން." ޖެންޑަރ މިނިސްޓަރ ވިދާޅުވިއެވެ.
އުމުރުން ދުވަސްވީ މީހުންނަށް ކުރާ އަނިޔާއާއި ދެކޮޅަށް ހޭލުންތެރިކަން އިތުރުކުރުމަށް ބޭއްވި ފޯރަމްގެ މައިގަނޑު މަޤްސަދަކީ އުމުރުން ދުވަސްވީ މީހުންނަށް މުޖުތަމަޢުތެރޭގައި ލިބެމުންދާ އަނިޔާއާއި ގުޅޭގޮތުން މުޖުތަމަޢުގެ ހުރިހާ ފަރާތެއްގެ މެދުގައި ޚިޔާލު ބަދަލުކޮށް އެމައްސަލަތައް ޙައްލުކުރުމަށް ގުޅިގެން މަސައްކަތް ކުރުންކަމަށް ޖެންޑަރ މިނިސްޓްރީން ވިދާޅުވެއެވެ. ސްކޫލް ކުދިންނާއި ސަރުކާރުގެ މުއައްސަސާތަކާއި އަމިއްލަ ޖަމިއްޔާ ޖަމާޢަތްތަކުން 77 ފަރާތަކުންވަނީ ޖެންޑަރ މިނިސްޓްރީން ބޭއްވި ފޯރަމްގައި ބައިވެރިވެފައެވެ.
ރާއްޖޭގައި ހެދިފައިވާ އެކި ޤާނޫނުތަކުން ގެވެށިއަނިޔާގެ 17 ބާވަތެއް ހިމެނެއެވެ. އަދި އިޙްމާލުވުމާއި ޚަރަދު ނުކުރުމާއި ޒަރޫރީ ބޭނުންތައް ފުއްދުމުގައާއި ނަފްސާނީ އަދި ޖިސްމާނީ އަނިޔާތައް ހިމެނޭއިރު މިކަންކަމަށް ގިނަ ބަޔަކު އަހުލުވެރި ނުވުމަކީވެސް އަނިޔާއަށް ހުށައެޅޭ ސަބަބެއްކަމަށް ޖެންޑަރ މިނިސްޓްރީއިން ވިދާޅުވެއެވެ.