މިދައުރު ނިމޭއިރު، ލަފާފުރުމުގެ ދަތިކަން ހައްލުނުވާ އެއްވެސް ރަށެއް ނޯންނާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މ.ވޭވަށުގައި ސަރުކާރުން ތަރައްޤީކޮށްދެއްވި ބަނދަރު ހުޅުއްވައިދެއްވާ ދެއްކެވި ވާހަކަފުޅުގައެވެ.
ރައީސްގެ ވާހަކަފުޅުގައި ރާއްޖޭގެ އާބާދީގެ ތެރެއިން ކުދި އާބާދީ އޮތް ރަށްރަށަށް ދިމާވެފައިވާ މައްސަލަތައް ވޭވަށަށްވެސް ދިމާވެފައިވާ ކަމަށް ވިދާޅުވިއެވެ. ސަރުކާރުން ދެކުނީ އާބާދީ ކުޑަ ނަމަވެސް ރައްޔިތުންނަށް ބޭނުންވާނެ ޚިދުމަތްތަކެއް ހުންނާނެކަން ކަމަށާއި، އެހެންކަމުން ފެނާއި ނަރުދަމާއާއި، ސިއްޙީ ޚިދުމަތް ރަށާއި އެ ސަރަހައްދުން ލިބޭނެ އިންތިޒާމް ޤާއިމްކުރުމާއި، ތައުލީމް ފޯރުކޮށްދިނުންފަދަ އަސާސީ މުހިންމު ޚިދުމަތްތައް ރައީސް ފާހަގަކުރެއްވިއެވެ. 4 އަހަރެއްހާ ދުވަހުގެ ތެރޭގައި އޭގެ ތެރެއިން ވަރަށް ގިނަ މަޝްރޫޢުތައް ކުރިއަށް ގެންދެވުނު ކަމަށް ރައީސް ވިދާޅުވިއެވެ.
ވޭވަށަށް ޒަމާނުއްސުރެ އޮތް ދަތިކަމަކީ ބަނދަރުގެ ދަތިކަންކަމަށާއި، މިރަށަކީ މަސް ގަނެ ހިއްކައިގެން ބޭރަށް މަސް އެކްސްޕޯޓްކުރާ ރަށެއްކަމުން، ދޯނިފަހަރު ރަށަށް އައިސް މަސްކޮޅު ވިއްކާލުމަށް ބޮޑެތި ދަތިކަން ފޯރާކަަމަށް ރައީސް ވިދާޅުވިއެވެ. ދުވާލަކަށް 25 ޓަނުގެ މަސް ކައްކާއިރު މިއީ ކުޑަ އާބާދީއަކަށް ބޮޑު އަދަދެއްކަން އެމަނިކުފާނު ފާހަގަކުރެއްވިއެވެ. އެފަދަ މުހިންމު މަސައްކަތަކަށް އެންމެ ފުރަތަމަ ބޭނުންވަނީ ޒަމާނީ ބަނދަރެއްކަމަށާއި، މިހާރު ސަރުކާރުން ތަރައްޤީކުރި މިބަނދަރު އެއްވެސް ދަތިކަމެއް ނެތި ގިނަ އަހަރުތަކެއް ވަންދެން ބޭނުންކުރެވޭނެ ކަމަށް އުއްމީދު ކުރައްވާކަމަށް ރައީސް ވިދާޅުވިއެވެ.
މިދައުރު ނިމޭއިރު، ރާއްޖޭގެ ލަފާފުރުމުގެ ދަތިކަން އޮތް އެއްވެސް ރަށެއް ނޯންނާނެކަމުގެ ޔަޤީންކަން ރައްޔިތުންނަށް ދެއްވާކަމަށް ރައީސް ވިދާޅުވިއެވެ.
ބަނދަރާއި ގޮނޑުދޮށް ހިމާޔަތްކުރުމުގެ މަޝްރޫޢާއެކު ޖުމްލަ 115 މަސައްކަތް އެމްޓީސީސީން ކުރިއަށް ގެންދާކަން ފާހަގަކުރައްވާ ރައީސް ވިދާޅުވީ، 38 ރަށުގެ މަސައްކަތް ނިންމާ ގިނަ މަސައްކަތް މިހާރުވެސް ކުރިއަށްދާކަމަށެވެ.
ވޭވަށުގައި އެންމެ ބާރަށް މިހާރު ކުރިއަށްދަނީ ފެނާއި ނަރުދަމާކަމަށާއި، ރައްޔިތުން ބޭނުންވާ ޚިދުމަތް ފޯރުކޮށްދިނުމުގައި ސަރުކާރުގެ ޕްލޭނާ އެއްގޮތަށް ކުރިއަށްދާނެ ކަމަށް ރައީސް ވިދާޅުވިއެވެ. އެކަމަށްޓައި ރައްޔިތުންގެ އެއްބާރުލުން ސަރުކާރަށް ދެއްވުމަށް ރައީސް އެދިވަޑައިގެންނެވިއެވެ. ވެވަށުގެ ތަރައްޤީއަށް މީގެ ކުރީ ސަރުކާރުގެ 5 އަހަރުގެ ތެރޭގައި ޚަރަދުކުރީ 2 މިލިއަން ރުފިޔާކަމަށާއި، މިސަރުކާރުގެ 4 އަހަރު ތެރޭގައި 100 މިލިއަން ރުފިޔާ ޚަރަދުކޮށްފައިވާ ކަމަށް ރައީސް ވިދާޅުވިއެވެ.
މެދުރާއްޖެ ތެރޭގެ ރަށްތަކަކީ ވަރަށް ބޮޑަށް އަޅާނުލެވިފައި އޮތް ސަރަހައްދެއްކަމަށާއި، ކުރީ ސަރުކާރުތަކުން ގިނަ މަޝްރޫޢުތައް ހިންގަނީ އުތުރާއި ދެކުނުގައި ކަމަށް އެމަނިކުފާނު ވިދާޅުވިއެވެ. ނަމަވެސް އެ މަޝްރޫޢުތައް ވަކި ހިސާބަކުން ހުއްޓޭކަމަށާއި، މެދުރާއްޖެ ތެރެ ބާކީކޮށްފައި އޮތްކަން އެމަނިކުފާނުގެ ދަތުރުފުޅުތަކުން ފާހަގަވާ ކަމަށް ރައީސް ވިދާޅުވިއެވެ. ނަމަވެސް މި ސަރުކާރުން ވަކި އަތޮޅެއް ވަކި ރަށެއް ބާކީ ނުކުރާނެ ކަމަށް ރައީސް ވިދާޅުވިއެވެ.
ވޭވަށަށް އަދިވެސް ބޭނުންވާ ކަންކަން ހުންނާނެކަމަށާއި، އެކަންކަންވެސް ފުރިހަމަކޮށްދިނުމުގައި ކުރިއަށްދާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.