މާލޭގެ ރައްޔިތުންނަށް ބޯހިޔާވަހިކަން ހަމަޖައްސައި ދިނުމުގެ ގޮތުން ސަރުކާރުން ހުޅުވާލާފައިވާ ދެ ސްކީމަށް މިހާތަނަށް 14000އަށްވުރެ ގިނަ މީހުން ފޯމު ހުށައަޅާފައިވާކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ހާމަކުރައްވައިފިއެވެ.
ސަރުކާރުން މިސްކީމްތަކަށް ކުރިމަތިލުމަށް ހުޅުވާލާފައިވަނީ ޖޫންމަހުގެ 26ވަނަ ދުވަހުގައެވެ.
ރާއްޖޭގެ އެހެން ރަށްރަށަށްވެސް ކުރިމަތިވެފައިވާހެން މާލެއަށްވެސް ކުރިމަތިވެފައިވާ އެންމެބޮޑު އިޖުތިމާޢީ އެއް މައްސަލައަކީ ބޯހިޔާވަހިކަމުގެ މައްސަލައެވެ. މިމައްސަލަ ޙައްލުކުރުމަށް ބޯހިޔާވަހިކަމުގެ ގިނަ މަޝްރޫޢުތަކެއް ސަރުކާރުން އަންނަނީ ހިންގަވަމުންނެވެ. މިއާއެކުވެސް މާލޭގެ ރައްޔިތުންނަށް ޚާއްސަ ސްކީމެއްގެ ދަށުން ބޯހިޔަވަހިކަން ހަމަޖައްސައިދިނުމަށް ސަރުކާރުންވެފައިވާ ވަޢުދާއެއްގޮތަށްވަނީ 2 ސްކީމެއްގެ ދަށުން ބޯހިޔާވަހިކަމަށް ކުރިމަތިލުމަށް ހުޅުވާލާފައެވެ. އެގޮތުން ގެދޮރުވެރިޔާ ސްކީމާއި ބިންވެރިޔާ ސްކީމަށް ފޯމު ހުށައެޅުމަށް ހުޅުވާލިފަހުން މިވީ ދެމަސްދުވަހުގެ ތެރޭގައި 14805 މީހަކު ފޯމު ހުށައަޅާފައިވާކަމަށް ހައުސިންގ މިނިސްޓްރީއިން ވިދާޅުވެއެވެ.
މާލޭގެ ރައްޔިތުންނަށް ގޯއްޗާއި ފްލެޓް ދޫކުރުމަށް ސަރުކާރުން ފަށްޓަވާފައިވާ ބިންވެރިޔާ ސްކީމާއި ގެދޮރުވެރިޔާ ސްކީމްގެ ދަށުން ގޯއްޗާއި ފްލެޓް ދިނުމަށް ހަމަޖެހިފައިވަނީ ހުޅުމާލެއާއި ގުޅީފަޅުންނެވެ. މިސްކީމްތަކުން ގޯއްޗާއި ފްލެޓަށް ޝަރުތުހަމަވާ ފަރާތްތަކުން އެކަމަށް އެދި އެޕްލިކޭޝަން ހުށަހައަޅަންޖެހެނީ ގެދޮރުވެރިން ޕޯޓަލް (https://gedhoruverin.gov.mv) މެދުވެރިކޮށެވެ. ޕޯޓަލް މެދުވެރިކޮށް ގެދޮރުވެރިކަމަށް އެދި ހުށަހެޅުމުގެ ފުރުސަތު މިމަހުގެ 26ވަނަ ދުވަހު ހަމަވާނެއެވެ. އެހެންކަމުން ފޯމު ހުށައަޅަން ބޭނުންވާ ފަރާތްތަކުން ފަހުވަގުތަށް މަޑުނުކޮށް ފޯމު ހުށަހަޅައި ފޯމުގައި ހުރި މަޢުލޫމާތު ސައްޙަތޯ ވަގުތު އޮއްވައި ޔަގީންކުރުމަށް ހައުސިންގ މިނިސްޓްރީން އެދެއެވެ.
ގެދޮރުވެރިން ޕްރޮގްރާމްގެ ދަށުން ހުޅުވާލާފައިވަނީ 4000 ފްލެޓަށާއި 3000 ގޯއްޗަށް ކުރިމަތިލުމަށެވެ. މީގެތެރެއިން 1000 ގޯއްޗާއި 4000 ފްލެޓް ދޫކުރުމަށް ހަމަޖެހިފައިވަނީ ހުޅުމާލެއިންނެވެ. ބާކީ 2000 ގޯތި ދޫކުރުމަށް ހަމަޖެހިފައިވަނީ ގުޅިފަޅުންނެވެ.