ޔޫއެންޑީޕީއިން އަހަރަކު އެއްފަހަރު ޢާއްމުކުރާ އިންސާނީ ތަރައްޤީގެ މިންގަނޑުން ބަލާއިރު ދެކުނު އޭޝިއާގެ ޤައުމުތަކުގެތެރެއިން ރާއްޖެ 2 ވަނައިގައި ހިމެނިއްޖެއެވެ.
2021ވަނަ އަހަރުގެ ތަފާސްހިސާބާއި މަޢުލޫމާތުގެ މައްޗަށް ބިނާކޮށް މިއަހަރު ޢާއްމުކޮށްފައިވާ ރިޕޯޓުގެ އެއްވަނައިގައި މިސަރަޙައްދުގެ ޤައުމުތަކުން ހިމެނިފައިވަނީ ސްރީލަންކާއެވެ.
މިއަހަރު ޔޫއެންޑީޕީން ޢާއްމުކޮށްފައިވާ އިންސާނީ ތަރައްޤީގެ މިންގަނޑުން ރާއްޖެ ހިމެނިފައިވަނީ ހިއުމަން ޑިވެލޮޕްމަންޓް އިންޑެކްސްގެ 90ވަނައިގައެވެ. ދެކުނު އޭޝިއާ ސަރަޙައްދުގެ ޤައުމުތަކުން ރާއްޖެ މިލިސްޓުގެ 2ވަނައިގައި އޮތްއިރު އެއްވަނައިގައި އޮތީ ރޭންކިންގެ 73ވަނައާއެކު ސްރީލަންކާއެވެ. މި ލިސްޓުގެ ތިންވަނައިގައި މިސަރަޙައްދުން އޮތީ 127ވަނަގައި އޮތް ބޫޓާންއެވެ. ރޭންކިންގެ 129ވަނައިގައި ބަންގްލަދޭޝް އޮތްއިތު 5ވަނައިގައި އޮތީ އިންޑިއާއެވެ.
އިންސާނީ ތަރައްޤީގެ މިންގަނޑަކީ ޤައުމެއްގެ ސިއްޙީ ޙާލަތާއި ތަޢުލީމާއި ދިރިއުޅުމުގެ ފެންވަރު ވަޒަންކޮށް ޔޫއެންޑީޕީއިން ޢާއްމުކުރާ ރިޕޯޓެކެވެ. މިގޮތުން މިކަންކަން މިންކުރުމުގައި ދެމެހެއްޓެނިވި ތަރައްޤީގެ ލަނޑުދަނޑިތަކުގެތެރޭގައި ހިމެނޭ ދަރިމައިވުމުގެތެރޭގައި މަރުވާ ނިސްބަތާއި ތަޢުލީމީ ފެންވަރާއި ޤައުމީ އުފެއްދުންތެރިކަމާއި، ބޮލަކަށް ޖެހޭ ޢާމްދަނީގެ ނިސްބަތް މިންކުރެއެވެ.
ޔޫއެންޑީޕީއިން އެންމެ ފަހުން ޢާއްމުކޮށްފައިވާ 2020ވަނަ އަހަރުގެ މިރޭންކިންގައި ރާއްޖެ އޮތީ 97 ވަނައިގައެވެ. ޔޫއެންޑީޕީއިން ޢާއްމުކޮށްފައިވާ ރިޕޯޓާއި ގުޅޭގޮތުން އެއިދާރާއިން ވިދާޅުވީ ޢާއްމުގޮތެއްގައި ހުރިހާ ޤައުމެއްގައިވެސް ހުރިހާ ދާއިރާއަކުންވެސް ކަންބޮޑުވާކަންކަން ހުރިކަމަށެވެ. ސަބަބެއްކަމަށް ފާހަގަކޮށްފައިވަނީ މުޅި ދުނިޔެއަށް ކުރިމަތިވީ ކޯވިޑް-19ގެ ޕެންޑަމިކާއި ރަޝިޔާ-ޔޫކްރެއިންގެ ހަނގުރާމައާއި އެކި ޠޫފާންތަކާއި އަލިފާނުގެ ބޮޑެތި ޙާދިސާތަކުގެ ސަބަބުން ލިބިފައިވާ މާލީ ގެއްލުންތަކެވެ.