އަންނަ އަހަރު ފެބްރުއަރީ މަހު ބާއްވަން ހަމަޖެހިފައިވާ ސުޕަރ ބައުލް ހާފް ޓައިމް ޝޯވގައި މަޝްހޫރު ލަވަކިޔުންތެރިޔާ ރިހާނާ ލަވަ ކިޔާނެ ކަމަށް ބުނެފިއެވެ.
ގްރެމީ އެވޯޑު 9 ފަހަރު ހޯދާފައިވާ ރިހާނާ ވަނީ ނޭޝަނަލް ފުޓްބޯލް ލޯގް، އެން.އެފް.އެލް ބްރޭންޑުގެ ފުޓްބޯޅައެއް ހިފަހައްޓައިގެން އޭނާ ހުރި ފޮޓޯއެއް އިންސްޓަގްރާމްގައި އާންމުކޮށްފައެވެ. މި ޝޯވ ކުރިއަށްދާނީ ސްޓޭޓް ފާމް ސްޓޭޑިއަމްގައި އަންނަ އަހަރު ފެބްރުއަރީ މަހު 12 ވަނަ ދުވަހުއެވެ.
އެން.އެފް.އެލް ލީގްގެ އޮފިޝަލް ލައިވް މިޔުޒިކް އެންޓަރޓެއިންމެންޓް ސްޓެރެޖީ، ސުޕަރ ރޮކް ނޭޝަނުން ވެސް ވަނީ ރިހާނާ ލަވަކިޔާނެކަން ކަށަވަރުކޮށްދީފައެވެ.
ކުރިއަށް އޮތް ސުޕަރ ބޯލް ހާފްޓައިމް ޝޯވ ސްޕޮންސާ ކޮށްފައިވަނީ އެޕަލް މިއުޒިކުންނެވެ. މި ޝޯވ މީގެކުރިން ދިގު މުއްދަތަކަށް ސްޕޮންސާ ކުރީ ޕެޕްސީ އިންނެވެ.
ބާބެޑޯސްއަށް އުފަން 34 އަހަރުގެ ރިހާނާއަށް މިދިޔަ މެއިމަހު ވަނީ ފިރިހެން ކުއްޖަކުވެސް ލިބިފައެވެ. އޭނާގެ ބައިވެރިޔަކީ އެމެރިކާގެ ރެޕާ އޭސަޕް ރޮކީއެވެ.
ދުނިޔޭގެ އެންމެ ނުފޫޒު ގަދަ އަންހެން ލަވަކިޔުންތެރިންގެ ތެރޭގައި ހިމެނޭ އަދި މިހާރު ވިޔަފާވެރިއެއްގެ ގޮތުގައިވެސް މަޝްހޫރު ރިހާނާގެ "ފެންޓީ" ބްރޭންޑަކީ މިހާރު ވަރަށް މަޤުބޫލު ވިޔަފާރީއެކެވެ. އޭނާގެ މިލްކިއްޔާތު މިހާރު 1.7 ބިލިއަން ޑޮލަރަށް އަރައެވެ.