އިންޑިއާގެ ފިލްމުތަކަށް ދޭ އިންޓަނޭޝަނަލް އިންޑިއަން ފިލްމު އެކެޑަމީ އެވޯޑްސް "އައިފާ" އެވޯޑުގެ 23 ވަނަ ހަފްލާވެސް އަބޫދާބީގެ ޔަސް އައިލޭންޑްގައި ބާއްވަން ހަމަޖައްސައިފިއެވެ.
އަންނަ އަހަރުގެ ފެބްރުއަރީ މަހު ބާއްވަން ނިންމާފައިވާ މި ހަފްލާ ބާއްވާނީ އަބޫ ދާބީގެ ޑިޕާޓްމަންޓް އޮފް ކަލްޗަރ އެންޑް ޓޫރިޒަމް އާއި އެ ގައުމުގެ ލީޑިންގ ކްރިއޭޓަރ އޮފް އިމަރސިވް ޑެސްޓިނޭޝަންސް އެންޑް އެކްސްޕީރިއަންސް، މިރާލް އާއި ގުޅިގެންނެވެ.
މިއަހަރު ބޭއްވި 22 ވަނަ އައިފާވެސް ބާއްވާފައިވަނީ އަބޫ ދާބީގެ ޔަސް އައިލޭންޑްގައެވެ. ވަރުން ދަވަނާއި، ޓައިގާ ޝްރޮފާއި، ސާރާ އަލީ ޚާނާއި، ޝާހިދު ކަޕޫރާއި، ނޯރާ ފަތޭހީ، އަނަންޔާ ޕާންޑޭ ފަދަ ތަރިންގެ ފޯރިގަދަ ނެށުމުގެ ހަރަކާތްތައް ވެސް ފެނިގެން ދިޔަ މިއަހަރުގެ އައިފާ ހޯސްޓް ކުރީ ސަލްމާން ޚާނާއި ރިތޭޝް ދޭޝްމުކްގެ އިތުރުން މަނީޝް ޕޯލެވެ.
3 ދުވަހަށް ދިގުދެމިގެންދިޔަ މި އެވޯޑު ހަފްލާއަށް ހަފްތާ ބަންދުގައި ދުނިޔޭގެ 17 ޤައުމަކުން 350 އަށް ވުރެ ގިނަ މީޑިއާ ބައިވެރިވެފައިވާއިރު 20،000 އަށް ވުރެ ގިނަ މީހުން ވަނީ އެ މައިދާނަށް ޖަމާވެފައެވެ.
ނިމިދިޔަ އެވޯޑް ހަފުލާގައި އެންމެ މޮޅު ފިލްމުގެ މަޤާމު ހޯދީ މިދިޔަ އަހަރު ރިލީޒްކުރި ބައޮގްރަފިކަލް ފިލްމް "ޝޭރްޝާހު" އަށް ލިބުނު އިރު، ސިދާތު ލީޑް ރޯލުން ފެނިގެންދިޔަ މި ފިލްމަކީ ކަރަން ޖޯހަރްގެ ދަރުމާ ޕްރޮޑަކްޝަނަށް ވިޝްނޫވަރުދާން ޑައިރެކްޓްކުރި އެއްޗެކެވެ. އެންމެ މޮޅު އެކްޓަރުގެ އެވޯޑް ވިކީ ކޯޝަލް ހޯދިއިރު، އެންމެ މޮޅު އެކްޓްރެސްގެ އެވޯޑް ލިބިފައިވަނީ ކްރިތީ ސެނޯނަށެވެ.