ކެނެޑާއަށް އުފަން މަޝްހޫރު ލަވަކިޔުންތެރިޔާ ސެލީން ޑިއޯން އަށް ނާރުގެ ބައްޔެއް ޖެހި، އޭނާގެ ކުރިއަށް ހުރި ޝޯވތައް ކެންސަލް ކޮށްފިއެވެ.
ޔޫރަޕުގެ އެކި ސަރަހައްދުތަކުގައި އޭނާ ދޭން ރާވާފައިވާ ޝޯވތައް ކެންސަލްކޮށް ބައެއް ޝޯވތައް ފަސްކުރީ ވަރަށް މަދުން ނޫނީ ނުފެންނަ ނާރުގެ ބައްޔެއް ކަމަށްވާ "ސްޓިފް ޕާސަން ސިންޑްރޯމް" އޭނާގެ ހުރިކަން ފާހަގަވެފައިވާތީއެވެ.
މިކަން ހިއްސާކޮށް ސެލީން ވަނީ އޭނާގެ ސޯޝަލް މީޑިއާ ޕްލެޓްފޯމްތަކުގައި ވީޑިއޯ އެއް އާންމުކޮށްފައެވެ. އޭނާ ބުނީ މިލިއަނަކުން އެކަކު ނުވަތަ ދެ މީހަކަށް ޖެހޭ އެ ބަލީގެ ސަބަބުން އޭނާގެ ދިރިއުޅުމަށް ބޮޑެތި އަސަރުތަކެއް ކުރަމުންދާ ކަމަށެވެ. އާންމު ދިރިއުޅުމުގައި ވެސް ދަތިތައް ކުރިމަތިވަމުންދާ ކަމަށާއި އެގޮތުން ހިނގައި އުޅުމުގައި، އަދި ލަވަކިޔާއިރު އަޑަށް އުނދަގޫތައް ދިމާވާ ކަމަށް ބުންޏެވެ.
"މައި ހާޓް ވިލް ގޯ އޮން"، "އައިމް އެލައިވް" އަދި "ދެޓްސް ދަ ވޭ އިޓް އިޒް" ފަދަ މަޝްހޫރު ލަވަތައް ކިޔާފައިވާ 54 އަހަރުގެ ލަވަކިޔުންތެރިޔާ ސޯޝަލް މީޑިއާގައި ބުނިގޮތުގައި އޭނާ ބަލިވެ އުޅޭތާ ދުވަސްތަކެއް ވެއްޖެއެވެ.
ކެނެޑާގެ ލަވަކިޔުންތެރިޔާ ބުނީ ފެބްރުއަރީގައި އޭނާ ޔޫރަޕުގައި ދޭން އޮތް ޝޯވތައް ކެންސަލް ކުރަން ޖެހޭތީ ހިތާމަ ކުރާ ކަމަށާއި، އެކަމަކު މިވަގުތު ލަވަކިޔައި އުޅެން އުނދަގޫ ކަމަށެވެ. ކައިރީގައި ދަރިން ހިތްވަރުދޭން ތިބި އިރު ޑޮކްޓަރުންގެ އެހީތެރިކަން ލިބެމުންދާ ކަމަށް އޭނާ ބުންޏެވެ.
މިކަމާއި ގުޅިގެން އުތުރު އެމެރިކާ ސަރަހައްދުގައި ދޭން އޮތް ޝޯވތަކެއް ވެސް ސެލީން ވަނީ ކެންސަލް ކޮށްފައެވެ.