އަހަރުގެ ފުރަތަމަ ހަފްތާގައި މޯލްޑިވްސް އިންލޭންޑް ރެވެނިއު އޮތޯރިޓީ މީރާއަށް 143 މިލިއަނަށްވުރެ ގިނަ ރުފިޔާ ބަލައިގަނެފައިވާ ކަމަށް ތަފާސްހިސާބުތަކުން ދައްކައިފިއެވެ.
މީރާއިން އާންމުކޮށްފައިވާ ތަފާސްހިސާބުތައް ދައްކާގޮތުން ޖަނަވަރީ 1 ވަނަ ދުވަހުން 7 ވަނަ ދުވަހުގެ ނިޔަލަށް މީރާއަށް މުޅި ޖުމްލަ 143،903،122 (ސަތޭކަ ސާޅީސް ތިން މިލިއަން ނުވަލައްކަ ތިންހާސް ސަތޭކަ ބާވީސް) ރުފިޔާ ވަނީ ބަލައިގަނެފައެވެ. މީގެތެރޭގައި އެންމެ ބޮޑު އާމްދަނީއެއް ލިބިފައިވަނީ ޓޫރިޒަމް ލޭންޑް ރެންޓުންނެވެ.
މިއަހަރުގެ ފުރަތަމަ ހަފްތާގައި މީރާއަށް ބަލައިގަނެފައިވާ އާމްދަނީގެ ތަފްސީލް:
* ބިޒްނަސް ޕްރޮފިޓް ޓެކްސް: 12،042،994 ރުފިޔާ
* ނޮން ރެޒިޑެންޓް ވިތްހޯލްޑިންގ ޓެކްސް: 1،110،338 ރުފިޔާ
* ޓޫރިޒަމް ދާއިރާގެ ޖީއެސްޓީ: 15،920،615 ރުފިޔާ
* ޓޫރިޒަމް ދާއިރާނޫން ދާއިރާގެ ޖީއެސްޓީ: 13،730،978 ރުފިޔާ
* ގްރީން ޓެކްސް: 12،845،052 ރުފިޔާ
* އެއަރޕޯޓް ސަރވިސް ޗާޖު: 8،161،133 ރުފިޔާ
* އެއަރޕޯޓް ޑިވެލޮޕްމަންޓް ފީ: 8،318،119 ރުފިޔާ
* ޓޫރިޒަމް ލޭންޑް ރެންޓް: 56،41،758 ރުފިޔާ
* އެހެނިހެން ޓެކުހާއި ފީތައް: 15،362،136 ރުފިޔާ
މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް 6 ވަނަ އިޞްލާޙު ގެނައުމުގެ ޤާނޫނުގެ ދަށުން، 1 ޖެނުއަރީން ފެށިގެން ޖީއެސްޓީގެ ރޭޓުތަކަށް ވަނީ ބަދަލު އައިސްފައެވެ. އެގޮތުން ޓޫރިޒަމް ދާއިރާގެ ޓެކްސް ނުވަތަ ޓީ.ޖީ.އެސް.ޓީ ރޭޓް %12 އިން %16 އަށް ވަނީ ބޮޑުވެފައެވެ. އަދި ޓޫރިޒަމް ދާއިރާ ނޫން ދާއިރާތަކުގެ ޓެކްސް ނުވަތަ ޖީ.އެސް.ޓީ ރޭޓް %6 އިން %8 އަށް ވަނީ ބަދަލުވެފައެވެ.
ޖީއެސްޓީއަށް މިއައި ބަދަލާއި ގުޅިގެން ވިޔަފާރިތަކުން ބަދަލުތައް ގެންނަންޖެހޭ ގޮތާއި ގުޅޭގޮތުން ހޭލުންތެރިކަން އިތުރުކުރުމަށް މައުލޫމާތު ދިނުމުގެ ސެޝަންތަކެއް މީރާއިން އަންނަނީ މާލެއާއި އަދި އަތޮޅުތަކުގައި ކުރިއަށްގެންދަމުންނެވެ. މީރާއިން ވިދާޅުވީ، ވިޔަފާރިތަކުންވެސް ޖީއެސްޓީގެ ރޭޓަށް މިއައި ބަދަލުތަކާއި ގުޅޭގޮތުން ސާފުކުރަން ބޭނުންވާ ކަމެއް އޮތްނަމަ މީރާއަށް ގުޅުމުން އެ މައުލޫމާތު ލިބޭނެކަމަށެވެ. އަދި މީރާގެ ވެބްސައިޓުންވެސް މިކަމާއި ގުޅޭ މައުލޫމާތުތައް ލިބެން ހުންނާނެކަމަށް މީރާއިން ބުނެއެވެ.