އަންނަ ފެބުރުއަރީމަހުގެ އެއްވަނަ ދުވަހުން ފެށިގެން ބީއެމްއެލްގެ ކިޔަވާ ލޯންގެ އިންޓްރަސްޓް ރޭޓް %5އަށް ދަށް ކުރަން ނިންމާފައިވާ ކަމަށް ހަމަޖެހިފައިވާ ކަމަށް އެބޭންކުގެ ޗެއަރޕާސަން ޔޫޝަޢު ސަޢީދު ވިދާޅުވެއްޖެއެވެ.
ބީއެމްއެލްގެ ކިޔަވާ ލޯންގެ އިންޓްރަސްޓް ރޭޓް ދަށްކުރަން ހަމަޖެހިފައިވާ ކަމަށް ޗެއަރޕާސަން ޔޫޝަޢު ސަޢީދު ވިދާޅުވީ ބީއެމްއެލްއަށް 40 އަހަރު ފުރުން ފާހަގަކުރުމުގެ ގޮތުން ބޭއްވި ޚާއްސަ ހަފްލާގައި ވާހަކަދައްކަވަމުންނެވެ.
މިހަފްލާގައި ވާހަކަދައްކަވަމުން ޔޫޝަޢު ސަޢީދު ވިދާޅުވީ ރާއްޖޭގައި އެންމެ ފުޅާދާއިރާއެއްގައި ބޭންކިންގ ޚިދުމަތް ފޯރުކޮށްދީ، އިންވެސްޓްކޮށްދޭ ބޭންކަކީ ބޭންކް އޮފް މޯލްޑިވްސް ކަމަށެވެ. އަދި މާލީ ދާއިރާގައި އެންމެ ގިނަ ވަޒީފާގެ ފުރުސަތު ފަހިކޮށްދޭ ބޭންކަކީވެސް ބީއެމްއެލް ކަމަށް އޭނާ ވިދާޅުވިއެވެ. އެހެންނަަމވެސް ބޭންކް އޮފް މޯލްޑިވްސްއިން ދެމުންދާ ޚިދުމަތްތައް އަދިވެސް ހަރުދަނާ ކުރަންޖެހޭކަމަށް އޭނާ ވިދާޅުވިއެވެ.
ޔޫޝައު އިތުރަށް ވިދާޅުވީ ބޭންކް އޮފް މޯލްޑިވްސްގެ އަމާޒަކީ ދިވެހި މުޖްތަމައު ބޭނުންވާ ހެޔޮ ބަދަލު ގެނެސްދިނުން ކަމަށެވެ. އެގޮތުން ބައެއް ފަރާތްތަކުން ބޭނުންވާ ހެޔޮ ބަދަލު ގެނައުމުގެ ނިޔަތުގައި، ބޭންކް އޮފް މޯލްޑިވްސްގެ ކިޔަވާ ލޯންގެ ރޭޓް ދަށްކުރަން ނިންމާފައިވާ ކަމަށެވެ. މިލޯންގެ ރޭޓް މަތިވުމުން އެކަން މުރާޖަޢާކޮށްދިނުމަށް ބައެއް ފަރާތްތަކުން އެދެމުންދާތީ މިކަމާ ގުޅޭގޮތުން ބަލަންޖެހޭ ކަންކަން މުރާޖަޢާ ކުރުމަށްފަހު ބޭންކްގެ ކިޔަވާ ލޯންގެ އިންޓްރެސްޓް 1 ފެބުރުއަރީން ފެށިގެން %9 އިން %5އަށް ދަށްކުރަން މިހާރު ނިންމާފައިވާ ކަމަށް ޔޫޝައު ވިދާޅުވިއެވެ.
" ބީއެމްއެލް ކިޔަވާ ލޯނަކީ ދަރިވަރުންނަށް މަތީ ތަޢުލީމު ހޯދުމަށް ލިބިގެންދާ ފަހި ފުރުސަތެއް. 1 ފެބްރުއަރީން ފެށިގެން ކިޔަވާ ލޯނުގެ އިންޓަރެސްޓް %9 އިން %5 އަށް ދަށްކުރެވިގެންދާނެކަން އުފަލާއެކު ފާހަގަކޮށްލަން. މި ބަދަލާއެކު، ކުރިން ނަގާފައިވާ، ބީއެމްއެލް ކިޔަވާ ލޯނުތަކުގެ ރޭޓްވެސް، 5 އިންސައްތައް އަށް ބަދަލުވެގެންދާނެ." ޗެއަރޕާސަން ޔޫޝައު ސަޢީދު ވިދާޅުވިއެވެ.
ފާއިތުވި 40 އަހަރުތެރޭގައި ބީއެމްއެލްއިން ރާއްޖެއަށް މުޅިން އަލަށް ތައާރަފްކުރި ޚިދުމަތްތަކަށް އަލިއަޅުއްވާލައްވަމުން ޔޫޝަޢު ވިދާޅުވީ ދިވެހިންގެ މެދުގައި މަޤްބޫލު އަދި މާލީ ދާއިރާގައި އެޚިދުމަތްތަކަކަށް އާންމުން މިހާރު އަހުލުވެރިވެފައިވާ ގިނަ ޚިދުމަތްތަކަކީ ބޭންކުން ފުރަތަމަ ތައާރަފްކުރި ހިދުމަތްތަކެއްކަމަށެވެ. އެގޮތުން، އޭޓީއެމްގެ ޚިދުމަތާއި، އިންޓަރނެޓް ބޭންކިންގ، ޕީއޯއެސް މެޝިން އަދި ނަގުދު ފައިސާއާ ނުލާ ދެވޭ ޚިދުމަތްތައް ހިމެނޭކަން ޔޫޝައު ފާހަގަކުރެއްވިއެވެ.
ބީއެމްއެލްގެ އަމާޒަކީ މުޅި ރާއްޖެ ހިމެނޭ ބޭންކިންގ ވިއުގަޔާއި، އެންމެ ޒަމާނީ އޮންލައިން ބޭންކިންގ ޚިދުމަތާއެކު އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށްވެސް ޔޫޝައު ވިދާޅުވިއެވެ.